ပခုက္ကူသီးနှံစျေးကွက်အတွင်း ယခုဒီဇင်ဘာလ တတိယပတ်တွင် နှမ်းနက်(စမုန်) စျေးနှုန်း ထပ်မံကျဆင်းလာရာ အမြင့်ဆုံး တစ်တင်း ကျပ် ၆၁၀၀၀ ပေါက်စျေးရှိပြီး ပဲစင်းငုံသစ်များ စတင်ဝင်ရောက်လာကြောင်း ကုန်သည်များထံမှ သိရသည်။
ပခုက္ကူသီးနှံကွက်သို့ နှမ်းနက် (စမုန်)သစ်များ စတင်ဝင်ရောက်ချိန် နိုဝင်ဘာလကုန်ပိုင်းက တစ်တင်းလျှင် ကျပ် ၇၁၀၀၀ ခန့်ထိ ပေါက်စျေးရှိခဲ့ပြီးနောက် ဝယ်လက်များ စျေးချဝယ်ယူခြင်းကြောင့် စျေးနှုန်း ကျဆင်းလာခြင်းဖြစ်ကြောင်း သိရသည်။
ပခုက္ကူကုန်စည်ဒိုင်၏ ဒီဇင်ဘာလ ၂၀ ရက်နေ့စျေးကွက်တွင် နှမ်းနက်(စမုန်ရှယ်)တစ်တင်း ကျပ် ၆၁၀၀၀ ၊ နှမ်း နက် (စမုန်ပုံမှန်) တစ်တင်း ကျပ် ၄၀၀၀၀ မှ ကျပ် ၅၉၀၀၀ ပေါက်စျေးရှိပြီး တရုတ်ဝယ်လက်များ အဓိက ဝယ်ယူနေကြောင်း သိရသည်။
“ အရင်ရက်တွေ စာရင်တော့ နှမ်းနက်စျေးက အကျဘက်မှာရှိတယ်။ ကုန်းလမ်းတင်ပို့မှု အဆင်မပြေပေမဲ့ ရန်ကုန်ကနေ သင်္ဘောလမ်းကြောင်းနဲ့ ပို့နေရတော့ အရောင်းအဝယ် ဖြစ်တယ်။ နှမ်းကလည်း အတော်များများ ရိတ်ပြီးကြတော့ ကုန်ဝင်လည်း များတယ်။ ထိပ်စတွေကတော့ အရောင်းအဝယ်ဖြစ်တယ်။ ဝယ်တဲ့ဝယ်လက်လည်း ပေါတယ်။ သူစျေးနဲ့သူတော့ ရောင်းဝယ်နေကြတယ်” ဟု ပခုက္ကူမြို့မှ သီးနှံကုန်သည် ကိုစိန်လွင်က ပြောကြားသည်။
လက်ရှိဖြစ်ပေါ်နေသည့် နှမ်းစျေးနှုန်းအရ တောင်သူများ အကျိုးအမြတ်နည်းသွားကြောင်းနှင့် နှမ်းပေါ်ချိန် စျေးနှုန်းနှင့် နှိုင်းယှဉ်ပါက တစ်ဧကလျှင် ကျပ် ၅၀၀၀၀ မှ ကျပ် ၁၀၀၀၀၀ ခန့်ထိ နစ်နာကြောင်း တောင်သူများထံမှ သိရသည်။
“တစ်ဧက နှမ်းက ငါးတင်းကနေ ကိုးတင်းလောက်ထိ ထွက်တော့ လက်ရှိစျေးနဲ့ တွက်ရင် တောင်သူက နစ်နာတယ်။ နှမ်း စပေါ်တုန်းလေးပဲ စျေးကောင်းရတယ်။ နောက်ပိုင်းဆိုရင် စျေးက ကျတော့တာပဲ။ နှမ်းနက်က အရင်းကြီးတယ်။ ဒီနှစ်ဆိုရင် မြေဆီမြေသြဇာစျေးကြီးတော့ နှမ်းတစ်တင်း ခြောက်သောင်းကျော် ခုနစ်သောင်းလောက်မှ မရောင်းရရင် တောင်သူက မြတ်ဖို့ဆိုတာ မလွယ်ဘူး။ ပြီးခဲ့တဲ့ သုံးနှစ်လောက်ကဆိုရင် နှမ်းတစ်တင်း ရှစ်သောင်းကျော်လောက်ထိ ရောင်းရဖူးတယ်” ဟု တောင်သူ ကိုမြင့်နိုင်က ပြောကြားသည်။
ပခုက္ကူသီးနှံစျေးကွက်သို့ ပဲစင်းငုံအသစ် အနည်းငယ်စတင်ဝင်ရောက်လာပြီး တစ်တင်းလျှင် ကျပ် ၃၂၅၀၀ ပေါက်စျေးရှိပြီး ယခင်နှစ်များနှင့် နှိုင်းယှဉ်ပါက ပဲစင်းငုံစျေးမှာ သိသွာစွာ မြင့်တက်လာကြောင်း ကုန်သည်များထံမှ သိရသည်။
-
မြောက်ဦးမြို့နယ်တွင် တပ်မတော်နှင့် AA အဖွဲ့ အချိန်ကြာမြင့်စွာ တိုက်ပွဲဖြစ်ပွားရာ၌ တပ်မတော်ဘက်က စစ်သည်အချို့ ကျဆုံးပြီး AA ဘက်မှ အလောင်းအချို့နှင့် သေနတ်ခြောက်လက် သိမ်းဆည်းရမိခဲ့ကြောင်း တပ်မတော်ပြောကြား
-
မြောက်ဦးမြို့နယ် လက္ကာကျေးရွာအနီးတွင်ဖြစ်ပွားခဲ့သော တပ်မတော်နှင့် AA အဖွဲ့တိုက်ပွဲအတွင်းAA အလောင်းကိုးလောင်းရရှိခဲ့ပြီး တပ်မတော်က နယ်မြေလုံခြုံရေးဆောင်ရွက်နေကြောင်း သတင်းထုတ်ပြန်
-
မြန်မာနိုင်ငံတွင် ပြည့်စုံသော ဒီမိုကရေစီကို အသွင်ပြောင်းရန်အတွက် ဖွဲ့စည်းပုံအခြေခံဥပဒေ ပြင်ဆင်ရမည် ဖြစ်သော်လည်း လာမည့်နှစ် ရွေးကောက်ပွဲမတိုင်မီ ဖြစ်နိုင်ခြေ မရှိကြောင်း ဒေါ်အောင်ဆန်းစုကြည် ပြောကြား
-
အဲဗာတန်အားရှုံးနိမ့်ခြင်းမှာ ပျင်းရိခြင်းကြောင့်ဟု ဝေဖန်ခဲ့သော မော်ရင်ဟိုကို စပါးကစားသမားများ မကျေမနပ်ဖြစ်နေပြီး စုပေါင်းပုန်ကန်ဖွယ်ရှိ
-
ကိုရိုနာဗိုင်းရပ်စ်ကြောင့် ပရီးမီးယားလိဂ်အသင်းများ ရုပ်သံဝင်ငွေ(၁၀.၇%)စီ ပြန်ပေးရမည်ဖြစ်ပြီး လီဗာပူးလ် အနစ်နာဆုံးဖြစ်
