Top News

ယခုကာလအတွင်း ရန်ကုန်မြို့ပတ်ရထားစီးနင်းသူခရီးသည်ဦးရေ လျော့နည်းလာကြောင်း မြန်မာ့မီးရထားမှ သိရသည်။

ယခင်က မြို့ပတ်ရထားစီးနင်းသူခရီးသည် ဦးရေသည် တစ်ရက်လျှင် (၇၀၀၀) ဝန်းကျင်အထိရှိခဲ့သော်လည်း လက်ရှိတွင် မိုးတွင်းကာလဖြစ်သည့်အတွက် ရထားစီးသူခရီးသည်ဦးရေ လျော့ကျလာကြောင်း သိရသည်။

” အခုက မိုးတွင်းလည်းဖြစ်တယ်ဆိုတော့ ခရီးသည်သိပ်မရှိဘူး။ နည်းသွားတယ်။ ပြီးတော့ နောက်အသစ်ရောက်တဲ့ ရထားတွေနဲ့ ဘူတာ ပလက်ဖောင်းတွေနဲ့က သိပ်အဆင်မပြေဘူး။ ခရီးသည်တွေအတွက် အဆင်ပြေအောင် ပလက်ဖောင်းတွေကို အဆင့်မြှင့်တင်တာတွေလုပ်နေတယ်”ဟု မြန်မာ့မီးရထားမှ တာဝန်ရှိသူတစ်ဦးက ပေါ်ပြူလာနယူးစ်သို့ပြောသည်။

ရန်ကုန်မြို့ပတ်ရထားလမ်းပိုင်း၌ ယခင်က ရထားအခေါက်ရေ (၃၀) သာ ပြေးဆွဲပေးရာမှ ကိုဗစ်ကာလနှင့် ကိုဗစ်ကာလအလွန်တွင် ရုံးချိန်ရထား အပါအဝင် အခေါက်ရေ (၂၆) ခေါ က် ပြေးဆွဲပေးနေကြောင်း သိရသည်။

ရန်ကုန်မြို့ပတ်ရထားခရီးစဉ်တလျှောက်တွင် ဘူတာရုံပေါင်း (၃၈)ရုံရှိပြီး လတ်တလောကာလ၌ ရထားတွဲဆိုင်း (၆) ဆိုင်းဖြင့် ပြေးဆွဲပေးလျက်ရှိကြောင်း သိရသည်။

လက်ရှိတွင် ရန်ကုန်မြို့ပတ်ရထားလမ်းပိုင်းကို အဆင့်မြှင့်တင်မှုများပြုလုပ်နေပြီး အဆင့်မြှင့်တင်မှုလုပ်ငန်းများပြီးစီးပါက ရထားတစ်စင်းနှင့် တစ်စင်း (၁၀) မိနစ်မှ (၁၂) မိနစ်ခြားစီ ပြေးဆွဲမည်ဖြစ်ကာ မြို့တစ်ပတ်ကြာချိန်အား တစ်နာရီနှင့် မိနစ် (၅၀)သို့လျှော့ချနိုင်မည်ဖြစ်ကြောင်း သိရသည်။

ထို့ပြင် ရထားစီးခရီးသည် နှစ်သိန်းလေးသောင်းခန့်အား သယ်ယူပို့ဆောင်ပေးနိုင်မည်ဖြစ်ကြောင်းလည်း သိရသည်။