Top News

ထိုင်းမြန်မာနယ်စပ် မြဝတီမြို့တွင် ရေပြန်ကျပြီးနောက် ဖုန်းလိုင်းများ ပြတ်တောက်နေ

24htopnews | September 12, 2024 5:13 PM CST

ထိုင်း-မြန်မာနယ်စပ် မြဝတီမြို့၌ ယနေ့ စက်တင်ဘာ(၁၂)ရက် နံနက်ပိုင်းတွင်
ရေပြန်လည်ကျဆင်းပြီးနောက် ဖုန်းလိုင်းများ ယာယီပြတ်တောက်နေကြောင်း သိရသည်။

မြဝတီမြို့ သောင်ရင်းမြစ်ရေသည် စက်တင်ဘာ (၁၀)ရက်နေ့ ညနေပိုင်းမှစတင်၍ မြင့်တက်လာခဲ့ပြီးနောက် စက်တင်ဘာ (၁၁)ရက်နေ့တွင် မြို့ပေါ်ရပ်ကွက်များအထိ ရေကြီးရေလျှံဖြစ်ပေါ်နေရာမှ ယနေ့ စက်တင်ဘာ(၁၂)နံနက်ပိုင်းတွင်ရေပြန်လည်ကျဆင်းသွားပြီဖြစ်ကြောင်း သိရသည်။

သို့သော် ယနေ့နံနက်ပိုင်း (၁၁)နာရီ အချိန်အထိ ဖုန်းလိုင်းများပြတ်တောက်နေပြီး၊ ရေကြီးမှုဖြစ်စဉ် အခြေအနေအတွက် ဒေသခံလူမှုကယ်ဆယ်ရေးအဖွဲ့များထံသို့ ဆက်သွယ်ရာတွင် ဖုန်းခေါ်ဆို၍ မရရှိခဲ့ပေ။

” ညကနေ တစ်ဖြည်းဖြည်းကျတယ်ပြောတယ်။ ဒီမနက်တော့ကျသွားပါပြီ။မြဝတီဘက် ဖုန်းလိုင်းတွေ ခေါ်မရဘူး ပြတ်နေတယ်”ဟု မြဝတီလူမှုကယ်ဆယ်ရေးအသင်းတစ်ခုနှင့် မိတ်ဖက်အဖွဲ့ဖြစ်သည့် မော်လမြိုင် လူမှုကယ်ဆယ်ရေးအဖွဲ့တာဝန်ခံတစ်ဦးကပြောသည်။

ဒေသခံ တစ်ဦးဖြစ်သည် “ဘီဝမ်း” အကောင့်ပိုင်ရှင်၏ ဖေ့ဘွတ်လူမှုကွန်ယက်စာမျက်နှာတွင် ယနေ့ စက်တင်ဘာ (၁၂) ရက် နံနက်(၆)နာရီခွဲအချိန်တွင် သောင်ရင်းမြစ်ရေ ပြန်လည်ကျဆင်းနေကြောင်းနှင့် အနိမ့်ပိုင်းတွင်နေထိုင်သည့်ဒေသခံများ နေအိမ်နှင့်လမ်းများကို သန့်ရှင်းရေး စတင်ပြုလုပ်နေပြီဖြစ်သည်ဟု ရေးသားမျှဝေထားသည်ကိုတွေရသည်။

ထိုင်း-မြန်မာနယ်စပ် မြဝတီမြို့သည်
ယခုနှစ် ဇူလိုင်လ နောက်ဆုံးပတ်အတွင်း တစ်ကြိမ်၊ ယခု စက်တင်ဘာလ ဒုတိယပတ်အတွင်း တစ်ကြိမ် သောင်ရင်းမြစ်ရေမြင့်တက်မှုကြောင့် ရေကြီးရေလျှံဖြစ်ပွားခဲ့ရသည်။

ဓာတ်ပုံ-ဘီဝမ်း