Top News

၂၀၂၀ AFC Cup ပြိုင်ပွဲတွင် ဝင်ရောက်ယှဉ်ပြိုင်လျက်ရှိသော ပြိုင်ပွဲဝင်နိုင်ငံများ၌ ရောဂါပိုးကူးစက်ခံရမှု များလာသောကြောင့် ယခုနှစ်ပြိုင်ပွဲကို ဖျက်သိမ်းသွားရန် စီစဉ်နေကြောင်း နာမည်ကြီး အားကစားသတင်းဝက်ဘ်ဆိုက်ဖြစ်သည့် Goal  ၏ ဖော်ပြချက်အရ သိရသည်။

၂၀၂၀ AFC Cup ပြိုင်ပွဲကို ဇုန်အလိုက်အုပ်စုများအတွက် အိမ်ရှင်နိုင်ငံရွေးချယ်၍ ပြောင်းလဲကျင်းပရန် စီစဉ်ထားပြီးဖြစ်သည်။

သို့သော် အိမ်ရှင်အဖြစ်လက်ခံကျင်းပရန် ရွေးချယ်ထားသည့် နိုင်ငံများ၌ ရောဂါပိုးကူးစက်ခံရမှုများလာသောကြောင့် အိမ်ရှင်နိုင်ငံရွေးချယ်ရန် အခက်တွေ့နေခြင်းဖြစ်ကြောင်း Goal သတင်းဌာနက ဖော်ပြသည်။

ထို့ပြင် အရှေ့အလယ်ပိုင်းဒေသအုပ်စုများအတွက် အိမ်ရှင်အဖြစ် လက်ခံကျင်းပခွင့်ရရှိထားသည့်နိုင်ငံများ၌ ရောဂါပိုးကူးစက်ခံရမှုှု မြင့်တက်လာသောကြောင့် အိမ်ရှင်အဖြစ် လက်ခံကျင်းပလိုသည့်နိုင်ငံရွေးချယ်ရာတွင် အခက် အခဲရှိနေသောကြောင့် AFC အနေဖြင့် ပြိုင်ပွဲအားဖျက်သိမ်းရန် စီစဉ်နေခြင်းဖြစ်ကြောင်း သိရသည်။

၂၀၂၀ AFC Cup ပြိုင်ပွဲမှာ လက်ရှိအချိန်အထိ အုပ်စုအဆင့်ပွဲစဉ်များပင် ပြီးဆုံးသည်အထိ ယှဉ်ပြိုင်ရခြင်းမရှိသေးသဖြင့် ပြိုင်ပွဲပြီးဆုံးသည်အထိ ဆက်လက်ကျင်းပရန် အခက်အခဲရှိနေခြင်းဖြစ်သည်။

AFC  သည် ပြီးခဲ့သည့် သြဂုတ်လပထမပတ်တွင် ၂၀၂၂ ကမ္ဘာ့ဖလားနှင့်၂၀၂၃ အာရှ ဖလား ခြေစစ်ပွဲစဉ်များကို ၂၀၂၁ ခုနှစ်သို့ ရွှေ့ဆိုင်းခဲ့သည်။

ထို့ပြင် မြန်မာကလပ် ရန်ကုန်အသင်းပါဝင်သည့် AFC Cup ပြိုင်ပွဲ အာဆီယံဇုန် အုပ်စုနှစ်ခုကို ဗီယက်နမ်နိုင်ငံတွင် လက်ခံကျင်းပရန် စီစဉ်ခဲ့သော်လည်း ယခုအခါ အိမ်ရှင်နိုင်ငံပြန်လည်ရွေးချယ်ရန် စီစဉ်ထားကြောင်း သိရသည်။

ယခုနှစ် AFC Cup ပြိုင်ပွဲတွင် မြန်မာကလပ် ရန်ကုန်ယူနိုက်တက်နှင့်  ရှမ်းယူနိုက်တက်အသင်းတို့ ဝင်ရောက်ယှဉ်ပြိုင်လျက်ရှိပြီး အုပ်စုအဆင့် ဒုတိယအကျော့လက်ကျန်ပွဲစဉ်များ ယှဉ်ပြိုင်ကစားရဦးမည်ဖြစ်သည်။

ရန်ကုန်ယူနိုက်တက်အသင်းသည် သုံးပွဲကစား ရမှတ်ခုနစ်မှတ် ရရှိထားသောကြောင့် နောက်တစ်ဆင့်တက်ရန်အတွက် မျှော်လင့်ချက်ရှိနေသော်လည်း ရှမ်းယူနိုက်တက်အသင်းမှာမူ သုံးပွဲစလုံး ရှုံးနိမ့်ထားသည်။

အဆိုပါ အုပ်စုလက်ကျန်ပွဲစဉ်များကို စက်တင်ဘာ ၂၃၊ ၂၆၊ ၂၉ ရက်တွင် ပြန်လည်ကျင်းပရန် စီစဉ်ထားသည်။

သို့သော် လက်ရှိအခြေအနေအရ ယင်းကာလတွင် ယှဉ်ပြိုင်ကစားနိုင်ရန် မသေချာသေးဘဲ ၂၀၂၀ AFC Cup ပြိုင်ပွဲ ဆက်လက်ကျင်းပနိုင်ခြင်းရှိမရှိကို ယခုလအတွင်း ဆုံးဖြတ်သွားမည်ဖြစ်သည်။

AFC အနေဖြင့် ရွေးချယ်စရာ အိမ်ရှင်နိုင်ငံအခက်အခဲကြောင့် ပြိုင်ပွဲကို ဖျက်သိမ်းရန်စဉ်စားနေရခြင်းဖြစ်ကြောင်း သိရသည်။