Top News

ရှမ်းပြည်နယ်တောင်ပိုင်း ကလောမြို့တွင် ယခုလအတွင်းဖြစ်ပွားခဲ့သည် ရေဘေးကြောင့် အိုးမဲအိမ်မဲ့ ဖြစ်သွားခဲ့‌သော ရေဘေးသင့် ကျူးကျော်မိသားစု(၁၈)စု အတွက် အိမ်ပိုင်ရရှိရေး လုပ်ဆောင်ပေးနေပြီဖြစ်ကြောင်း ရောင်စဉ်မဲ့ လူမှုကူညီရေးအသင်း တာဝန်ခံတစ်ဦးက ပေါ်ပြူလာနယူးစ်ကို ပြောသည်။

အဆိုပါ ကျူးကျော် မိသားစု(၁၈)စု အတွက် အောင်ပန်းမြို့နယ် ၊ လွယ်မခမ်းကျေးရွာရှိ မြေ (၂)ဧကပေါ်တွင် မြေတန်ဖိုးမပါ နေအိမ်တစ်လုံးတန်ဖိုး ကျပ်သိန်း(၃၀)နှင့် ကျပ်သိန်း (၅၀)အကြား ကုန်ကျခံ ဆောက်လုပ်ပေးသွားမည်ဖြစ်သည်ဟု ၎င်းက ဆိုသည်။

“ကျွန်တော်တို့ မြေကို သိန်း(၇၀၀)နဲ့ဝယ်ပြီးပါပြီ။ လွယ်မခမ်း ကျေးရွာ ပင်းတယအထွက်ဘက်လမ်းမပေါ်မှာပါဘဲ။ သူတို့အတွက် ဆောက်ပေးတဲ့အိမ်မှာ ရေရော မီးရော ပါမှာပါ။ အခုတော့ရေ ရနေပြီ။ ကျန်တာတွေတော့တဆင့်ချင်းသွားမှာပါ။ သူတို့ကို တစ်အိမ်ထောင်စု သုံးသိန်း လေးသိန်း ငါးသိန်းပေးလိုက်လည်း သုံးတဲ့အထဲပါသွားမှာလေ။ ဘာမှထူးခြားမလာဘူးလေ။ တကယ် ဒုက္ခရောက်နေတော့ သူတို့ နေရာကို မြေပြင်ဆင်းကြည့်တော့ သူတို့နေရာက ပြန်ဆောက်လို့မရတော့ဘူး။ ရေဘေးကြောင့် ကွယ်လွန်သွားတဲ့သူတွေရှိရင်လည်း သူတို့ကို အိမ်ပိုင်မြေပိုင်လေး ဖြစ်စေချင်တာပါ။”ဟု ရှင်းပြသည်။

ထို နေထိုင်ခွင့်ရရှိမည့် ကျူးကျော်မိသားစု(၁၈)စုကို ရောင်းစားခြင်းမျိုးမပြုလုပ်ဘဲ အမှန်တကယ်နေထိုင်ပြီး(၃)နစ်ပြည့်ပါက ပိုင်ဆိုင်မှုများကို ၎င်းမိသားစုများထံအသီးသီးလွှဲပြောင်း ပေးအပ်သွားမည်ဖြစ်ကြောင်း သိရသည်။

လက်ရှိ ဝယ်ထားသော မြေ (၂)ဧကပေါ်၌ လူသားချင်းစာနာသောအားဖြင့် အိမ်ဆောက်‌လှူဒါန်းလိုသူများကိုလည်း ဖိတ်ခေါ်ကြောင်း ရောင်စဉ်မဲ့ လူမှုကူညီရေးအသင်းထံက သိရသည်။

ပုံစာ- ယနေ့ မြေအရောင်းအဝယ်စာချုပ်ချုပ်နေသည့် မြင်ကွင်း(ပေးပို့)