Top News

ရေကြီးမြေပြိုခဲ့သည့် ကလောတွင် ထောက်ပံ့ရေး ရိက္ခာနှင့် သောက်ရေ အခက်အခဲ ဖြစ်နေ

24htopnews | September 26, 2024 3:12 PM CST

ရှမ်းပြည်နယ် တောင်ပိုင်း၊ ကလောမြို့တွင် ရေကြီး၊ တောင်ပြိုကာ မြေပြိုခဲ့သောကြောင့် သွားလာရခက်နေပြီး ရိက္ခာအကူအညီနှင့် သောက်သုံးရေ လိုအပ်နေကြောင်း ကူညီကယ် ဆယ်ရေး ဆောင်ရွက်နေသူများက ပြောသည်။

“သုံးရေ သောက်ရေက အဓိက ပိုလိုအပ်နေတယ်၊ ရေသန့်လာလှူတာတွေတော့ရှိတယ်၊ မြို့အတိုင်းအတာနဲ့ဆို မလောက်ဘူး၊ တွင်းက ထွက်တဲ့ရေကိုက ညစ်သွားတာ” ဟု ကူညီကယ်ဆယ်ရေးတွင် ဆောင်ရွက်ပေးနေသူတစ်ဦးက ပေါ်ပြူလာနယူးသို့ ပြောသည်။

ကလောမြို့တွင် စက်တင်ဘာလ (၁၁)ရက်က စတင်ကာ ရွာသွန်းခဲ့သည့် မိုးကြောင့် ရေကြီးရေလျှံ၊ တောင်ပြိုမှုများ ဖြစ်ပေါ်ခဲ့သည့်အပြင် လက်ရှိတွင် မိုးရွာသွန်းမှုများ ရှိနေဆဲဖြစ် ကြောင်း သိရသည်။

ထိုကဲ့သို့ ရေကြီးရေလျှံ ဖြစ်ပေါ်ခဲ့မှုကြောင့် ကလောမြို့နှင့် အနီးဝန်းကျင်တွင် ယနေ့အထိ နေအိမ်များ ရေနစ်မြုပ်နေဆဲဖြစ်ကာ သွားလာရမလွယ်ကူသော နေရာများတွင်လည်း အကူအညီများ လိုအပ်နေဆဲ ဖြစ်ကြောင်း အထက်ပါ ကူညီရေးလုပ်ဆောင်နေသူကပင် ပြောသည်။

“တောင်ကိုးလုံး နားက ရွာတွေဆို လမ်းတွေ ပိတ်နေလို့ သူတို့ဆီ အကူညီ ရိက္ခာတွေ ခက်ခက်ခဲခဲ သယ်နေရတယ်” ဟု ၎င်းက ဆိုသည်။

လတ်တလောတွင် ယင်းရွာများနှင့် အနီးရှိရွာများသည်တောင်ကျရေကို သောက်နေရပြီး သီးနှံခင်းများ ပျက်စီးသွားသောကြောင့် ပြန်လည်ထူထောင်ရေးအတွက် အချိန်ယူရမည်ဟုလည်း ဒေသခံများကပြောသည်။

ပြည်တွင်းပြည်ပ ခရီးသွားများ လာရောက်မှု များပြားခဲ့သည့် ကလောတွင် ရေကြီးရေလျှံပြီး မြေပြိုခြင်းများကြောင့် ‌ေ-သဆုံးသူ‌ (၁၀၀)နီးပါးရှိပြီး လူ (၆၀) ထပ်မနည်း ပျောက် ဆုံးခဲ့ကာ အိမ်ခြေ (၁၀၀၀)ဝန်းကျင်ခန့် ပျက်စီးဆုံးရှုံးခဲ့ရသည်ဟု လူမှုကူညီကယ်ဆယ်ရေးလုပ်ဆောင်နေသူများက ခန့်မှန်းထားသည်။