Top News

ရှမ်းပြည်နယ်၊ တာချီလိတ်မြို့တွင် ပြီးခဲ့သည့်ရက်ပိုင်းအတွင်းကဖြစ်ပေါ်ခဲ့သည့် စံချိန်တင်ရေကြီးရေလျှံမှုကြောင့် လျှပ်စစ်ဓာတ်အားပြတ်တောက်လျက်ရှိသဖြင့် လျှပ်စစ်မီးအမြန်ဆုံးပြန်ရရန်‌ဆောင်ရွက်နေသည်ဟု မြို့မီးလင်းရေးဦးဆောင်ကော်မတီ(လျှပ်စစ်ဓာတ်အားဖြန့်ဖြူးရေးလုပ်ငန်း)တာချီလိတ်မြို့ထံမှ သိရသည်။

၎င်းတို့ လျှပ်စစ်ဓာတ်အားဖြန့်ဖြူးလျက်ရှိသည့်ဧရိယာအတွင်း ကြုံတွေ့ခဲ့ရသော ရေကြီးရေလျှံမှုကြောင့် မြေနိမ့်ပိုင်းရပ်ကွက်များနှင့် ထိုင်း-မြန်မာနယ်စပ် အမှတ်(၁)ချစ်ကြည်ရေးတံတားတို့တွင် ရေကြီးရေလျှံမှုများနှင့်အတူ ရွှံ့နွံများဝင်ရောက်ခဲ့သဖြင့် လျှပ်စစ်ဓာတ်အားပြတ်တောက်နေကြောင်း သိရသည်။

လက်ရှိအချိန်၌ ရေများပြန်လည်ကျဆင်းသွားသော်လည်း တချို့နေရာများတွင် ရေများနှင့်ရွှံ့နွံများကျန်ရှိနေပြီး အပျက်အစီးများနှင့်ရွှံ့နွံများကြောင့် ဝင်ရောက်သွားလာရန်ခက်ခဲသည့်နေရာများအား ဓာတ်အားပြန်လည်ပို့လွှတ်နိုင်ခြင်းမရှိသေးကြောင်း သိရသည်။

ထို့ပြင် ထိုင်း-မြန်မာနယ်စပ် အမှတ်(၁)ချစ်ကြည်ရေးတံတားရှိ ဌာနဆိုင်ရာရုံးခန်းများ၊ မကာဟိုခမ်းရပ်ကွက်ရှိ မေဖလားဝါးကွင်း၊ တာလော့ရပ်ကွက်နှင့် ပုန်းထွန်ရပ်ကွက်များသို့ ပုံမှန်အတိုင်း လျှပ်စစ်ဓာတ်အားပြန်လည်ပို့လွှတ်နိုင်ရန် တာချီလိတ်မြို့မီးလင်းရေးဦးဆောင်ကော်မတီမှတာဝန်ရှိသူများကစက်တင်ဘာ ၂၇ ရက်နံနက် ၁၀ နာရီခွဲမှ နေ့လည် ၁ နာရီအထိ ဆောင်ရွက်ခဲ့ကြကြောင်း သိရသည်။

ထို့အတူ လျှပ်စစ်ဓာတ်အားမရရှိသေးသော အပိုင်းများအား လျှပ်စစ်ဓာတ်အားအမြန်ပြန်လည်ရရှိနိုင်ရန် မြို့မီးလင်းရေးဦးဆောင်ကော်မတီမှ ကျွမ်းကျင်ဝန်ထမ်းများက ဆောင်ရွက်လျက်ရှိကြောင်း သိရသည်။