Top News

မိုးသည်းထန်စွာရွာသွန်းမှုကြောင့် မန္တလေးတိုင်း၊ မြစ်သားမြို့နယ်ရှိ ပန်းလောင်မြစ်ရေမြင့်တက်ခဲ့ရာ အောက်တိုဘာ ၁ ရက်တွင် မြို့နယ်အတွင်းရှိ ရပ်ကွက်/ကျေးရွာ(၂၁)ခုအတွင်းသို့ ရေများဝင်ရောက်ခဲ့မှုကြောင့် ဒေသခံလူဦးရေ(၂)သောင်းခန့် ထပ်မံရေဘေးသင့်ခဲ့ကြောင်း သိရသည်။

ပန်းလောင်မြစ်ရေမြင့်တက်ခဲ့မှုကြောင့် မြစ်ကမ်းဘေးရှိ ရွာခိုင်ကြီးကျေးရွာ၊ အိမ်ရှေ့တောင်ကျေးရွာ၊ ကဆွန်ကျေးရွာ၊ မြစ်ဆုံကြီးကျေးရွာ၊ ရွှေပေါ်ကျွန်းကျေးရွာတို့တွင် မြစ်ရေ(၄)ပေခန့်၊ ကျွန်းတောရပ်ကွက်၊ မြို့မ(အရှေ့/အနောက်)နှင့်ဘူတာရပ်ကွက်၊ ကျွန်းလှကျေးရွာ၊ မရှက်ကျေးရွာ၊ နွားကူးလေးကျေးရွာ၊ လောင်းတော်ဦးကျေးရွာ၊ ရွာမုန်းကြီးကျေးရွာ၊ ဟွေးကျေးရွာ၊ လက်ပံဆိပ်ကျေးရွာ၊ အုန်းကုန်းကျေးရွာတို့တွင် မြစ်ရေ (၅)ပေခန့်၊ မင်းကုန်းရပ်ကွက်၊ ရှမ်းပွဲရပ်ကွက်၊ ရွှေသူဌေးရပ်ကွက်နှင့် အုပ်ရှစ်ကုန်းရပ်ကွက်တို့တွင် မြစ်ရေ(၃)ပေခန့်စီ ရေဝင်ရောက်လျက်ရှိကြောင်း သိရသည်။

ထို့ကြောင့် ယင်း ရပ်ကွက်/ကျေးရွာ(၂၁)ခုအ တွင်းရှိ အိမ်ထောင်စု(၅၂၂၆)စုမှ လူဦးရေ (၁၉၈၄၅)ဦးသည် ရေဘေးအခက်အခဲထပ်မံကြုံတွေ့နေရသဖြင့် ဖွင့်လှစ်ခဲ့ရသည့် ယာယီရေဘေးကယ်ဆယ်ရေးစခန်း(၂၇)ခုသို့ လုံခြုံရေးအဖွဲ့ဝင်များ၊ မီးသတ်တပ်ဖွဲ့ဝင်များ၊ တာဝန်ရှိသူများနှင့် လူမှုကူညီရေးအသင်းဝင်များက ကူညီပို့ဆောင်ပေးခဲ့ကြကြောင်း သိရသည်။

ထို့ပြင် ရေဘေးသင့်သူများ စားသောက်မှုအဆင်ပြေစေရန် စားသောက်ဖွယ်ရာများ ထောက်ပံ့ပေးခြင်း၊ ကျန်းမာရေးဝန်ထမ်းများမှ ကျန်းမာရေးစောင့်ရှောက်ပေးခြင်းများကို ပြုလုပ်ပေးလျက်ရှိကြောင်း သိရသည်။

လက်ရှိဖြစ်ပေါ်နေသည့် မြစ်သားမြို့နယ်အတွင်း ရေကြီးရေလျှံမှုမတိုင်မီ တာဝန်ရှိသူများက အသိပေးတိုက်တွန်းနှိုးဆော်ခြင်းများ၊ ကူညီရွှေ့ပြောင်းပေးခြင်းများကို အချိန်မီဆောင်ရွက်ပေးနိုင်ခဲ့၍ ဒေသခံများမှာ ‌ေ-သဆုံးမှုနှင့်ထိခိုက်ဒဏ်ရာရရှိမှုမရှိခဲ့ကြောင်း သိရသည်။