Top News

ပြည်တွင်း၌ စိုက်ပျိုးထွက်ရှိသည့် လက်ဖက်အစိုကို ပြည်ပဈေးကွက်သို့ တိုးမြှင့်တင်ပို့နိုင်ရန်အတွက် အပင်များကို ပြုပြင်ထိန်းသိမ်းရန် လိုအပ်ကြောင်း မြန်မာနိုင်ငံလက်ဖက်စိုက်ပျိုးထုတ်လုပ်တင်ပို့ရောင်းချသူများအသင်းထံမှ သိရသည်။

လွန်ခဲ့သည့် ၂၀၁၇ ခုနှစ်မှစတင်ကာ မြန်မာ့ လက်ဖက်အစိုကို ပြည်ပပို့ နှစ်စဉ် တန် (၂၀) ခန့် တင်ပို့လျက်ရှိပြီး တစ်ပိဿာလျှင် အမေရိကန်ဒေါ်လာ (၃) ဒေါ်လာရှိကြောင်း သိရသည်။

လက်ရှိတွင် မြန်မာ့လက်ဖက်အစိုကို ဒူဘိုင်း၊ တရုတ်၊ ထိုင်ဝမ်၊ ဗြိတိန် စသည့် နိုင်ငံများသို့ စမ်းသပ်တင်ပို့နေသလို ကိုရီးယားနိုင်ငံသို့လည်း တင်ပို့လျက်ရှိကြောင်း သိရသည်။

နိုင်ငံတကာ ဈေးကွက်သို့ ပိုမိုတင်ပို့ရောင်းချနိုင်ရန် လက်ဖက်ပင် စိုက်ပျိုးထုတ်လုပ်မှုကို တိုးချဲ့လုပ်ကိုင်ရန် လိုအပ်သလို ရာသီဥတုအခြေအနေများကြောင့် ပျက်စီးမှု များပြားလာနေသည့်အတွက် အပင်များကို ပြုပြင်ထိန်းသိမ်းရန်လည်း လိုအပ်ကြောင်း သိရသည်။

သို့သော်လည်း ပြီးခဲ့သည့်လတွင် ရေနစ်မြုပ်မှုကြောင့် လက်ဖက်စိုက်ခင်းများ ထိခိုက်ပျက်စီးခဲ့ရပြီး တောင်သူများအနေဖြင့်အခက်အခဲများ ဖြစ်ပေါ်ခဲ့ကြောင်း သိရသည်။

လက်ဖက်ပင်သည် နှစ်ရှည်ပင်ဖြစ်ပြီး တရုတ်၊ အာသံ၊ ကိုးကန့်၊ အင်ဒိုချိုင်းနား စသည့် မျိုး (၄) မျိုးရှိပြီး မြန်မာနိုင်ငံတွင် အာသံမျိုးကိုသာ အဓိကစိုက်ပျိုးကြပြီး လက်ဖက်ကို နှစ်စဉ် ဖေဖော်ဝါရီမှ မေလဆန်းအထိကို ရွှေဖီချိန်ဟုခေါ်ကြပြီး ထိုကာလအတွင်း ထွက်ရှိသည့် လက်ဖက်သည် အရည်အသွေးအကောင်းဆုံးဖြစ်ကြောင်း သိရသည်။