Top News

ပြီးခဲ့သည့် ဇွန်လ နှင့် ဇူလိုင်လအတွင်းက မွန်ပြည်နယ် ကျိုက်ထိုမြို့နယ်အတွင်းရှိ ဆံတော်ရှင်ကျိုက်ထီးရိုးစေတီတော်ကြီးတည်ရှိရာ ကျိုက်ထီးရိုးဒေသသို့ ပြည်တွင်းပြည်ပဘုရားဖူး (၁၄၅၀၀) ကျော် လာရောက်ခဲ့ကြောင်း ဘဏ္ဍာတော်ထိန်းဂေါပကအဖွဲ့ထံမှ သိရသည်။

ဇွန်လအတွင်းက ကျိုက်ထီးရိုးဒေသသို့ ပြည်တွင်းဘုရားဖူး (၆၉၀၈) ဦးနှင့် ပြည်ပဘုရားဖူး (၃၄) ဦး လာရောက်ခဲ့ကြောင်း နှင့် ဇူလိုင်လအတွင်းက ပြည်တွင်းဘုရားဖူး (၇၄၈၀) ဦးနှင့် ပြည်ပဘုရားဖူး (၉၇) ဦး လာရောက်ခဲ့ကြကြောင်း ဆံတော်ရှင်ကျိုက်ထီးရိုးစေတီတော်မြတ်ကြီး၏ ဘဏ္ဍာတော်ထိန်းဂေါပကအဖွဲ့ဝင်တစ်ဦးကပြောကြားသည်။

၎င်းကဆက်လက်ပြီး “ပြည်ပဘုရားဖူးတွေထဲမှာက ထိုင်းနိုင်ငံကအများဆုံးလာရောက်ခဲ့ပါတယ်။ ပြီးခဲ့တဲ့ ဇူလိုင်လအတွင်းမှာ ပြည်ပဘုရားဖူး (၉၇) ဦးအနက်မှာ ထိုင်းနိုင်ငံက ဘုရားဖူး ထက်ဝက်ကျော်ပါဝင်ပါတယ်” ဟု ပြောကြားသည်။

ကျိုက်ထီးရိုးတောင်ပေါ်တွင်လည်း ဘုရားဖူးများ နားနေတည်းခိုနိုင်ရန် နှင့် စားသောက်နိုင်ရန် တည်းခိုခန်းများ ထမင်းဆိုင်များကိုလည်း ဖွင့်လှစ်ပေးထားကြောင်း၊ တောင်တက်မော်တော်ယာဉ်များကိုလည်း အလှည့်ကျစနစ်နဲ့ စီစဉ်ပေးထားပါကြောင်း ဂေါပကအဖွဲ့ထံမှ သိရသည်။

မွန်ပြည်နယ် ကျိုက်ထိုမြို့နယ်အတွင်းရှိ ဆံတော်ရှင်ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်ကြီးအား နှစ်စဉ် သီတင်းကျွတ်လပြည့်နေမှ ကဆုန်လပြည့်နေ့အထိ ကျင်းပပြုလုပ်လေ့ရှိကြောင်း နှင့် ပုံမှန်ကာလက နှစ်စဉ် ဘုရားဖူး (၃) သန်းခန့်လာရောက်လေ့ရှိကြောင်း ဘဏ္ဍာတော်ထိန်းဂေါပကအဖွဲ့ထံမှ သိရသည်။