Top News

ကချင်ပြည်နယ်၊ မြစ်ကြီးနားမြို့၊ နိုင်ငံကူးလက်မှတ်ထုတ်ပေးရေးရုံးအ‌နေဖြင့် ယနေ့ အောက်တိုဘာ (၁၄)ရက်မှစတင်၍ နိုင်ငံကူးလက်မှတ် ပြန်လည်လျှောက်ထားနိုင်ပြီဖြစ်ကြောင်း သိရသည်။

ကချင်ပြည်နယ်အတွင်း ပြီးခဲ့သည့် ဇူလိုင်လ (၂၁) ရက်မှစတင်၍ ဖုန်းလိုင်းနှင့် အင်တာနက်လိုင်းများပြတ်တောက်ခဲ့သည့်အတွက် နိုင်ငံကူးလက်မှတ်ထုတ်ပေးရေးရုံး လုပ်ငန်းစဉ်များလည်ပတ်နိုင်ခြင်းမရှိတော့ဘဲ ရပ်နားထားခဲ့ရာမှ ယနေ့တွင် ပြန်လည်လက်ခံဆောင်ရွက်ပေးခြင်းဖြစ်သည်။

နိုင်ငံကူးလက်မှတ်လျှောက်ထားခြင်းအတွက် ရုံးပိတ်ထားစဉ်ကာလအတွင်း ရန်ကုန်နှင့် မန္တလေးရုံးခွဲတို့တွင်လျှောက်ထားခွင့်ပြုခဲ့ပြီး ယနေ့မှစတင်ကာ မြစ်ကြီးနားရုံးတွင် ပြန်လည်လျှောက်ထားနိုင်ပြီဖြစ်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးမှ အသိပေးထုတ်ပြန်ထားသည်။

နိုင်ငံကူးလက်မှတ်လျှောက်ထားခြင်းကို လူကိုယ်တိုင်တန်းစီရသောစနစ်မှ အွန်လိုင်းရက်ချိန်းစနစ် အသစ်သို့ ပြီးခဲ့သည့် မေလ (၁) ရက်မှ စတင်ပြောင်းလဲခဲ့ပြီး www.passport.go v.mm ဝက်ဆိုဒ်တွင်ဝင်ရောက် လျှောက်ထားနိုင်ကြောင်း သိရသည်။

အွန်လိုင်းမှ ရက်ချိန်းရယူရာတွင် အိမ်ထောင်စုနှင့် မှတ်ပုံတင်မူရင်းအပြင် UID (Unique Identification Number) လိုအပ်မည်ဖြစ်ပြီး UID မရှိပါက နိုင်ငံကူးလက်မှတ် လျှော က်ထားနိုင်မည်မဟုတ်ဘဲ စက်တင်ဘာ(၁)ရက်မှစတင်ကာ စာအုပ်ဖိုးကို ကျပ်(၅၀၀၀)တိုးမြင့်ကောက်ခံနေပြီဖြစ်ကြောင်း သိရသည်။