Top News

မြန်မာနိုင်ငံအနှံ့အပြားရှိ ဘုရားစေတီများတွင် စက်ရွှေဆိုင်းမသုံးဘဲ မျက်ပါးရပ် လက်ခတ်ရွှေဆိုင်းများကိုသာ အသုံးပြုရန် ရွှေဆိုင်းလုပ်ငန်းရှင်များက မေတ္တာရပ်ခံသွားမည်ဟုဆို

24htopnews | October 17, 2024 11:12 AM CST

မန္တလေးမြို့ မျက်ပါးရပ်ရှိ ရွှေဆိုင်းလုပ်ငန်းများမှာ လက်ရှိတွင် စျေးကွက်အတွင်း၌ စက်ရွှေဆိုင်းများနှင့် စျေးနှုန်းယှဉ်ပြိုင်ရလျက်ရှိကာ စျေးနှုန်းကွာဟမှုကြောင့် လက်ရွှေဆိုင်း လုပ်ငန်းရှင်များ အခက်အခဲဖြစ်ပေါ်လျက်ရှိပြီး လက်ရွှေဆိုင်းလုပ်ငန်းများရေရှည် ရပ်တည်နိုင်ရန် နိုင်ငံအနှ့ံအပြားရှိ ဘုရားစေတီများတွင် လက်ရွှေဆိုင်းကိုသာ အသုံးပြုရန် မေတ္တာရပ်ခံသွားမည်ဖြစ်ကြောင်း သိရသည်။

၂၀၁၄ ခုနှစ်ခန့်မှ စတင်ကာ စက်ရွှေ ဆိုင်းလုပ်ငန်းများ ပေါ်ပေါက်လာပြီး စျေးကွက်တွင် ယှဉ်ပြိုင်ရမှုများရှိလာကာ လက်ရွှေဆိုင်းလုပ်ငန်းများအနေဖြင့် ရပ်တည်ရန်ခက်ခဲလာသည့်ကြားမှ တန်ခိုးကြီးဘုရားများတွင် ရွှေဆိုင်းတင်ဒါများခေါ်ယူရာ၌ စက်ရွှေဆိုင်းများကိုပါ တင်ဒါခေါ်ယူ အသုံးပြုမှုများရှိသည့်အတွက် လက်ရွှေဆိုင်းလုပ်ငန်းရှင်များအနေဖြင့် မန္တလေးမြို့တွင် ဆန္ဒထုတ်ဖော်တောင်းဆိုမှုများပြုလုပ်ခဲ့ရကာ ဆက်လက်၍ လက်ရွှေဆိုင်များကိုသာ အသုံးပြုပေးရန် မေတ္တာရပ်ခံဆောင်ရွက်မှုများပြုလုပ်သွားမည်ဖြစ်ကြောင်း သိရသည်။

“ကျွန်တော်တို့တွေ စက်ရွှေဆိုင်းလုပ်ငန်းတွေကို ကန့်ကွက်နေတဲ့ကြားကနေ အခုစိတ်မကောင်းစရာ တစ်ခုကြုံရတယ်။ ဘာလဲဆိုတော့ ပုသိမ်ရွှေမုဋ္ဌောဘုရား ရွှေဆိုင်းတင်ဒါခေါ်တဲ့ ကြေညာစာမှာ စက်ရွှေဆိုင်း သီးသန့်ပဲခေါ်တာကို တွေ့ရတယ်။ ဂေါပကကိုယ်တိုင်က စက်ရွှေဆိုင်းလို့ နာမည်တပ်ပြီး တင်ဒါခေါ်ယူတာကို တွေ့ရတယ်။ ရွှေတိဂုံစေတီတော်မြတ်ကြီး တင်ဒါတောင်မှ စက်ရွှေဆိုင်းလို့ နာမည်မတပ်ဘဲ စျေးပြိုင်ရွှေဆိုင်းတင်ဒါလို့ပဲ သုံးခဲ့တာပါ။ ဒါလက်မှုရွှေဆိုင်းကို တစ်ပြည်လုံးသိဖို့ဆောင်ရွက်နေတဲ့အချိန်မှာ အခုလိုမျိုး ကြုံရတဲ့အတွက် လက်မှုရွှေဆိုင်းတွေအတွက် များစွာဝမ်းနည်းစရာ ကောင်းပါတယ်။ ဒါကြောင့် အခုကိစ္စကို ကျွန်တော်တို့တွေအနေနဲ့ သက်ဆိုင်ရာဂေါပကကိုလည်း မေတ္တာရပ်ခံစာပို့သွားမှာဖြစ်သလို သက်ဆိုင်ရာတိုင်းဒေသကြီးအစိုးရ အဖွဲ့ဆီကိုလည်း စာပို့သွားမယ်။ နောက်ထပ်အနေနဲ့ လက်မှုရွှေဆိုင်းကိုလည်း မြန်မာနိုင်ငံအနှံ့က ဘုရားတွေ တင်ဒါခေါ်ယူတဲ့အခါ ပါဝင်စေဖို့ကိုလည်း စာတင်သွားဖို့ရှိပါတယ်”ဟု အောင်တံခွန်ရွှေဆိုင်းလုပ်ငန်းမှ ကိုဇော်မင်းအောင်က ဆိုသည်။

စက်ဖြင့်ပြုလုပ်သည့် ရွှေဆိုင်းများမှာစျေးကွက်တွင် ရွှေဆိုင်းတစ်ချပ်လျှင် ကျပ် ၅၀၀၀ ခန့်လျော့နည်းပြီး ရွှေဆိုင်းအချပ်အရေအတွက်များစွာ ဝယ်ယူပါက ပိုမိုစျေးလျှော့ပေးနိုင်ခြင်းများရှိပြီး အရည်အသွေး၊ အရောင် နှင့် ရွှေဆိုင်းတစ်ချပ်ရွှေပါဝင်နှုန်းမှာ လက်မှုရွှေဆိုင်းကို မမီကြောင်း သိရသည်။ လက်မှုရွှေဆိုင်းများမှာ ရိုးရာလုပ်ငန်းအဖြစ် လူအင်အားနှင့် အဆင့်ဆင့်အသေးစိပ်ပြုလုပ်ရခြင်းကြောင့် ကုန်ကျစရိတ်များပြားသည့်အတွက် စက်ဖြင့်ပြုလုပ်သည့် ရွှေဆိုင်းကို စျေးကွက်မယှဉ်ပြိုင်နိုင်ခြင်းဖြစ်ကြောင်း သိရသည်။

ထို့ကြောင့် လက်ရှိတွင် လက်ခတ်ရွှေဆိုင်းလုပ်ငန်းများ မတိမ်ကောရန်နှင့် အရှည်တည်တံ့ရန်ရည်ရွယ်၍ ရွှေဆိုင်းထုတ်လုပ်ပုံအဆင့်ဆင့်ပြပွဲနှင့် မြန်မာ့လက်မှုရွှေဆိုင်း လုပ်ငန်းအကြောင်း ဟောပြောဆွေးနွေးပွဲကို မန္တလေးမြို့တွင် ပြုလုပ်သွားရန် စီစဉ်လျက်ရှိကြောင်း သိရသည်။

မန္တလေးမြို့တွင် ရွှေဆိုင်းလုပ်ငန်းများ လုပ်ကိုင်သော မျက်ပါးရပ်ရပ်ကွက်မှာ မင်းတုန်းမင်းလက်ထက်ကတည်းက ရွှေမျက်ပါး ခတ်ပညာရှင်များအား နေရာချထားပေးခဲ့ခြင်းဖြစ်ပြီး အစဉ်အဆက်ဆောင်ရွက်နေဆဲဖြစ်ကာ လက်ရှိတွင် အရင်ထက် လုပ်ကိုင်သူ ဦးရေမှာလျော့နည်းသွားကြောင်း သိရသည်။