Top News

ထားဝယ်မြို့တွင် ရွေးကောက်ပွဲမတိုင်မီ ရက်ပိုင်းအတွင်း လက်လုပ်ဗုံးများ တွေ့ရှိရသောကြောင့် ရွေးကောက်ပွဲရက်၌ လုံခြုံရေးတင်းကြပ်ထား

24htopnews | October 17, 2024 4:12 PM CST

တနသာင်္ရီတိုင်းဒေသကြီး ထားဝယ်မြို့တွင် ရွေးကောက်ပွဲမတိုင်မီ ရက်ပိုင်းအတွင်း လက်လုပ်ဗုံးများ တွေ ့ရှိရသောကြောင့် ယင်းသို့ ထပ်မံမဖြစ်စေရန် ရွေးကောက်ပွဲရက်တွင်လုံခြုံရေး တင်းကြပ်ထားကြောင်း တိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးက ပြောကြားသည်။

နိုဝင်ဘာ ၅ ရက်က ထားဝယ်မြို ့ ကြက်စားပြင်ရပ်ကွက် ကမ်းနားလမ်းပေါ်ရှိ တံတားထိပ်အနီး လမ်းနံဘေးခြုံအတွင်း၌ ပုလင်းနှင့်ဖုန်းကို ဝါယာကြိုးဖြင့် ဆက်ထားသော အဖြူရောင် ပလပ်စတစ်အိတ်ဖြင့် ထုတ်ထားသည့် မပေါက်ကွဲသေးသော လက်လုပ်မိုင်းတစ်ခုကို တွေ ့ရှိပြီးနောက် ရွေးကောက်ပွဲရက်တွင် ယင်းသို့ထပ်မံ မဖြစ်ပွားစေရန် လုံခြုံရေး ပိုမိုတိုးမြှင့်ထားကြောင်း၊ လက်ရှိတွင် တရားခံကို ဖမ်းဆီးရမိထားပြီး ဖြစ်သော်လည်း လုံခြုံရေးအခြေအနေအရ အသေးစိတ်ချပြ၍ မရသေးကြောင်း တိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်ဇေယျက ပြောကြားသည်။

"လောလောဆယ်တော့ ရွေးကောက်ပွဲကိစ္စနဲ့ လုံးပမ်းနေတယ်။ (ဗုံးထောင်သူ ဖမ်းမိထားခြင်းနှင့် ပတ်သက်၍) စီစဉ်နေတယ်၊ စိတ်မပူနဲ့၊ ကျွန်တော်တို့အားလုံး မိအောင်တော့ လုပ်ထားပါတယ်။ အဲလိုဖြစ်စဉ် မဖြစ်အောင်ပိုပြီး ကြပ်မတ်နေတယ်။ ကျွန်တော်တို့ကြိုပြီးတော့ မိလိုက်တဲ့အတွက်လည်း အဆင်ပြေသွားတာပေါ့ဗျာ။ ငြိမ်းငြိမ်းချမ်းချမ်း ဖြစ်သွားတာပေါ့။ လုံခြုံရေးကိစ္စတွေဆိုတာက ချပြလို့ရတာရှိတယ်၊ ချပြလို့မရသေးတဲ့ဟာတွေ ရှိတယ်။ ကျွန်တော်တို့ လုပ်စရာတွေ အများကြီးကျန်သေးလို့ပါ"ဟု ဗိုလ်မှူးကြီး ကျော်ဇေယျက ထားဝယ်အခြေစိုက် မီဒီယာများကို ပြောသည်။

ကြက်စားပြင်ရပ်ကွက် ကမ်းနားလမ်းပေါ်ရှိ တံတားထိပ်အနီး လမ်းနံဘေးခြုံအတွင်း၌ ပုလင်းနှင့်ဖုန်းကို ဝါယာကြိုးဖြင့် ဆက်ထားသော အဖြူရောင် ပလပ်စတစ်အိတ်ဖြင့် ထုတ်ထားသည့် အထုတ်တစ်ထုတ်ကို ငါးဖမ်းပိုက် လုပ်ကိုင်နေသူတစ်ဦးက စတင်မြင်တွေ ့ခဲ့ရာမှ ရပ်ကွက်အုပ်ချုပ်ရေးမှူးထံ အကြောင်းကြားခဲ့ပြီး အဆိုပါ ပလပ်စတစ်အိတ်အတွင်း၌ ဓာတ်ဆီနှင့် ခဲလုံးများ ထည့်ထားသည့် ပုလင်း တစ်လုံး၊ ပုလင်းအား ဝါယာကြိုးဖြင့် ဆက်ထားသည့် ဖုန်းတစ်လုံးတို့ကို တွေ ့ရှိခဲ့ရသည်ဟု ထားဝယ်မြို့နယ် ရဲတပ်ဖွဲ့ထံမှ သိရသည်။

ယင်းသို့ တွေ ့ရှိပြီးနောက် လုံခြုံရေးကို တိုးမြှင့်ချထားခဲ့ပြီး ကျူးလွန်သူကို နိုဝင်ဘာလ ၆ ရက်တွင် လောင်းလုံးမြို့နယ် သဘော့ဆိပ်ကျေးရွာ၌ ဖမ်းဆီးရမိခဲ့ပြီး ၎င်းနေအိမ်၌ ဖောက်ခွဲရေးသုံး ပစ္စည်းများဖြစ်သည့် ယမ်းစိမ်း၊ ကန့်မှုန် ့၊ဘောလုံးယမ်းနှင့် ဒီတိုနေတာ အပါအဝင် လက်ကိုင်ဖုန်းများ၊ ဓာတ်ခဲများစသည့် ပစ္စည်း ၃၁ မျိုးကို သိမ်းဆည်းရမိခဲ့သည်ဟု သိရသည်။ လက်ရှိတွင် အဆိုပါကျူးလွန်သူကို ဖမ်းဆီး စစ်ဆေးနေဆဲဖြစ်ပြီး ထားဝယ်မြို့ပေါ်ရှိ နေရာ သုံးခု၌ ၎င်းထောင်ထားသည့် လက်လုပ်ဗုံး သုံးလုံးကိုလည်း ညတွင်းချင်း လိုက်လံသိမ်းဆည်း ရှင်းလင်းခဲ့ကြောင်း၊ ၎င်းအား မောင်းမကန်နယ်မြေရဲစခန်း၌ (ပ) ၃၃/၂၀၂၀ ၁၉၀၈ ခုနှစ်ပေါက်ကွဲစေတတ်သော ဝတ္ထုပစ္စည်းများ အက်ဥပဒေပုဒ်မ-၅ ဖြင့်အမှုဖွင့်လှစ်ထားကာ စစ်ဆေးနေဆဲဖြစ်ကြောင်း သိရသည်။

ထားဝယ်မြို ့လက်လုပ်ဗုံးထောင်ခဲ့သူအား ဖမ်းမိခဲ့သည်ကို တွေ ့ရစဉ်

အဆိုပါကိစ္စနှင့်ပတ်သက်၍ ရဲတပ်ဖွဲ့က လုပ်ဆောင်နေမှုအပေါ် မေးမြန်းရန် တနသာင်္ရီတိုင်းဒေသကြီး ရဲတပ်ဖွဲ ့တာဝန်ရှိသူထံ ဖုန်းဖြင့်အကြိမ်ကြိမ် ဆက်သွယ်ခဲ့သော်လည်း ပြန်လည်မဖြေကြားခဲ့သည့်အပြင် ရုံးသို့ သွားရောက် မေးမြန်းခဲ့သော်လည်း တရားဝင်ဖြေကြားခဲ့ခြင်း မရှိပေ။

အဆိုပါ လက်လုပ်ဗုံးများ တွေ ့ရှိခဲ့ရမှုနှင့်ပတ်သက်၍ ဒေသခံများအကြား စိုးရိမ်မှုမြင့်တက်ခဲ့သော်လည်း ရွေးကောက်ပွဲ ကျင်းပသည့် နိုဝင်ဘာလ ၈ ရက် နံနက်ပိုင်းမှစ၍ ထားဝယ်မြို့၌ ဆန္ဒမဲပေးသူများမှာ ပုံမှန်အတိုင်း ဆန္ဒမဲပေးလျက်ရှိကြောင်း၊ ရဲတပ်ဖွဲ့မှလည်း လှည့်ကင်းကားများဖြင့် မြို့အနှံ ့ကင်းလှည့်မှုများ ပြုလုပ်နေကြောင်း သိရသည်။