Top News

နော်ဝေကမ်းလွန်၌ မုန်တိုင်းဒဏ် ခံခဲ့ရပြီး ခရီးသည် ရာပေါင်းများစွာအား ရဟတ်ယာဉ်များဖြင့် ဘေးကင်းရာသို့ ကယ်ထုတ်နိုင်ခဲ့ပြီးနောက် ထိုဇိမ်ခံသင်္ဘောကြီးသည် ကိုယ်တိုင်ခုတ်မောင်း၍ မတ် ၂၄ ရက်တွင် ဆိပ်ကမ်းသို့ ပြန်လည် ဆိုက်ကပ်နိုင်ခဲ့သည်။ 

ထိုသင်္ဘောပေါ်မှ ခရီးသည် ၁၃၇၃ ဦးအနက် သုံးပုံ တစ်ပုံနီးပါးအား လေကြောင်းမှ ကယ်တင်နိုင်ခဲ့ပြီးနောက် ဆွဲသင်္ဘောများ ဝန်းရံလျက် Viking Sky သင်္ဘောသည် ဒေသစံတော်ချိန် ညနေ ၄ နာရီ ၁၅ မိနစ်ဝန်းကျင်တွင် မိုဒီဆိပ်ကမ်းသို့ ဆိုက်ကပ်ခဲ့သည်။

သင်္ဘောနစ်မြုပ်မှုများကြောင့် နာမည်ဆိုးဖြင့် ကျော်ကြားသော နော်ဝေ ကမ်းရိုးတန်းအလွန် ၁.၂ မိုင်အကွာတွင် ထိုသင်္ဘောသည် လျှပ်စစ်ဓာတ်အား ပြတ်တောက်ခဲ့ပြီး မတ် ၂၄ ရက် မွန်းလွဲ၌ စတင်မျောပါနေခဲ့သည်။ ယင်းနောက် သင်္ဘောကပ္ပတိန်က ခက်ခဲသော အခြေအနေများတွင် လေကြောင်း မှ ကယ်တင်ရန်အတွက် တာဝန်ရှိသူများထံ အကူအညီတောင်းခံခဲ့သည်။ ရဟတ်ယာဉ် ငါးစင်းဖြင့် ကယ်တင်ပေးခဲ့ပြီးနောက် လူ ၁၇ ဦးကို ဆေးရုံ တင်ပို့ခဲ့ရသည်။

မတ် ၂၅ ရက်တွင် အင်ဂျင် လေးလုံးအနက် သုံးလုံး ပြန်လည် အလုပ်လုပ်ခဲ့ပြီး ဆွဲသင်္ဘောနှစ်စင်း၏ အကူအညီဖြင့် Viking Sky သင်္ဘောကြီးသည် ကိုယ်တိုင်ခုတ်မောင်းလျက် မြို့တော် အော်စလို အနောက်မြောက်ဘက် မိုင် ၃၀၀ ခန့်အကွာ မိုဒီဆိပ်ကမ်းသို့ ဦးတည်ခဲ့သည်။ ထိုသင်္ဘောသည် ထရမ်ဆို မှ စတာဗန်ဂျာသို့ ခုတ်မောင်းစဉ် သင်္ဘောများ ဖြတ်သန်းရန် ခက်ခဲမှုအတွက် ကျော်ကြားသည့် Hustadvika  နေရာ၏ အလွန်ဧရိယာတွင် အင်ဂျင် ပြဿနာတက်ခဲ့ခြင်း ဖြစ်သည်။