Top News

ဧရာဝတီတိုင်းဒေသကြီး ပုသိမ်ခရိုင် ရွေးကောက်ပွဲကော်မရှင်အဖွဲ့ခွဲရုံးမှ အဖွဲ့ဝင် နှစ်ဦးတွင် COVID-19 ရောဂါပိုး စစ်ဆေးတွေ့ရှိခဲ့ကြောင်း ပုသိမ်ခရိုင် ရွေးကောက်ပွဲ ကော်မရှင်အဖွဲ့ခွဲရုံးမှ သိရသည်။

ပုသိမ်ခရိုင်ရွေးကောက်ပွဲေ ကာ်မရှင်ရုံးခွဲအဖွဲ့ဝင်များ အနေဖြင့် မူအရ ခရိုင်အဖွဲ့ဝင်များမှ တာဝန်ကျရာမြို့များသို့ သွားရောက် ကြီးကြပ်ရမှာ ဖြစ်သဖြင့် ခရီးထွက်ရမည် ဖြစ်သောကြောင့် နိုဝင်ဘာ ၆ ရက်တွင် COVID-19 နှင့် ပတ်သက်၍ စစ်ဆေးခဲ့ရာတွင် ပုသိမ်ခရိုင် ကော်မရှင်အဖွဲ့ရုံးမှ အဖွဲ့ဝင်တစ်ဦး နှင့် ဌာနဆိုင်ရာဘက်မှ ခရိုင်စာရင်းစစ်ရုံး ခရိုင်ဦးစီးတို့တွင် COVID-19 ရောဂါပိုးစစ်ဆေးတွေ့ရှိခဲ့ကြောင်း ပုသိမ်ခရိုင်ရွေးကောက်ပွဲ ကော်မရှင်အဖွဲ့ခွဲရုံး ဥက္ကဋ္ဌ ဦးတင့်လွင်ထံမှသိရသည်။

" သူတို့နှစ်ယောက်စလုံးက ကျောင်းကုန်းမြို့နယ် တာဝန်ခံတွေဖြစ်နေတယ်။ သူတို့ကလည်း ကျောင်းကုန်းမြို့နယ်ကို ဆင်းရမယ်နေရာမှာ သုံးယောက်သတ်မှတ်ထားတဲ့နေရာမှာ တစ်ယောက်ကတော့ ခရိုင်ဥပဒေအရာရှိပါ။ သူကတော့ ကျောင်းကုန်းကိုသွားပါပြီး။ ကျန်တဲ့ Positive ဖြစ်တဲ့သူ နှစ်ယောက်ကိုတော့တိုင်းရင်ဆေးရုံကို တစ်ခါတည်းပို့ပါတယ်” ဟု  ပုသိမ်ခရိုင်ရွေးကောက်ပွဲ ကော်မရှင်အဖွဲ့ခွဲရုံး ဥက္ကဋ္ဌ  ဦးတင့်လွင်ကပြောကြားသည်။

ကျောင်းကုန်းမြို့နယ်သို့ အစားထိုးသွားရောက်ရန် ကြိုတင်စီစဉ်ထားသော အဖွဲ့ဝင်များနှင့် ခရိုင်အဆင့်အရာရှိများရှိကြောင်းသိရသည်။

ဧရာဝတီတိုင်းဒေသကြီး ပြည်သူကျန်းမာရေးနှင့်ကုသရေးဦးစီးဌာမှ နိုဝင်ဘာ ၇ ရက် နံနက် ၉ နာရီထုတ်ပြန်ချက်အရ ဧရာဝတီတိုင်းဒေသကြီးအတွင်း COVID-19 ပိုတွေ့ အတည်ပြုလူနာ စုစုပေါင်း  ၁၃၈၆ ဦး ရှိကာ ဆေးရုံဆင်းခွင့်ရရှိသူ ၈၉၇ ဦး နှင့် သေဆုံးသူ နှစ်ဦးရှိပြီဖြစ်ကြောင်း သိရသည်။