Top News

ဖေဖော်ဝါရီ ၉ရက်တွင် အိန်ဂျလီနာဂျိုလီက အိမ်တွင်းအကြမ်းဖက်မှုတိုက်ဖျက်ရေးအစီအမံများကို ချက်ချင်းအတည်ပြုပေး ကြရန် အမေရိကန်လွှတ်တော်အမတ်များအား တောင်းဆိုသွားခဲ့သည်။

အမေရိကန်လွှတ်တော်အဆောက်အအုံတွင်ပြုလုပ်သည့် သတင်းစာရှင်းလင်းပွဲတစ်ခုတွင် ဂျိုလီက အိမ်တွင်းအကြမ်းဖက် မှု၏သားကောင်ဖြစ်ရသူများကို ဆေးဝါးနှင့် ဥပဒေအထောက်အပ့ံပေးမည့်၊ အိမ်တွင်းအကြမ်းဖက်ခံရသည့်ကလေးငယ်များကို ကူညီပေးမည့် ဥပဒေပြန်လည်ပေါ်ပေါက်လာရေး ကို အားပေးကြောင်း ထုတ်ဖော်ပြောဆိုခဲ့ သည်။

“ကျွန်မတို့နိုင်ငံမှာ အိမ်တွင်းအကြမ်းဖက်ခံရမှုက ပုံမှန်အခြေအနေတစ်ခုဖြစ်နေတာဟာ အကျည်းတန်တဲ့အမှန်တရာ” ဟု လည်း ဂျိုလီကဆိုသည်။

ကြောက်လန့်ခံစားခဲ့ရသည့် ကလေးငယ်များနှင့် အိမ်တွင်းအကြမ်းဖက်ခံရသူအ များစုအတွက် သူ တောင်းဆိုနေသည့်ဥပဒေသည် နောက်ကျလွန်းနေပြီဟုလည်း ဂျိုလီက ပြောဆိုခဲ့ပြီး အမျိုးသမီးများအား အကြမ်းဖက်မှုတိုက်ဖျက်ရေးဥပဒေ (VAWA) ကို ပြန်လည်ခွင့်ပြုပေးရန် ဂျိုလီက မျက်ရည်ဝိုင်းလျက် တောင်းဆိုသွားခဲ့သည်။

၁၉၉၄ ခုနှစ်တွင် ဥပဒေအဖြစ် သက်ဝင်လာသည့် VAWA မူရင်းဥပဒေမူကြမ်း ကို ရေးဆွဲခဲ့သူက ဂျိုးဘိုင်ဒင် (ထိုစဉ်က အထက်လွှတ်တော်အမတ်) ဖြစ်ပြီး နောက်ပိုင်းမူကြမ်းများသည်လည်း ဒီမိုကရက်နှင့်  ရီပက်ဘလီကင် နှစ်ပါတီစလုံး၏ အခိုင်အမာ ထောက်ခံမှုဖြင့် အတည်ဖြစ်လာခဲ့သည်။

သို့သော် ၂၀၁၉ ခုနှစ် မူကြမ်းသည် အောက်လွှတ်တော်တွင် အတည်ပြုခံရသော်လည်း ထိုစဉ် ရီပက်ဘလီကင်တို့ ကြီးစိုးသည့် အထက်လွှတ်တော်တွင် တန့်သွားခဲ့သည်။ ရီပက်ဘလီကင်အမတ်များကြောင့် ၎င်းမူကြမ်းသည် နောက်ဆုံးမဲခွဲသည့်အဆင့်အထိ မရောက်ခဲ့ပေ။

ခင်ပွန်းဟောင်း ဘရတ်ပစ်က အကြီးဆုံးမွေးစားသား မက်ဒေါ့စ်ကို ၁၅ နှစ်သား အရွယ်တွင် ရိုက်နှက်ခဲ့သည်ဟုလည်း ဂျိုလီ က စွပ်စွဲခဲ့ဖူးသည်။ သို့သော်ထိုစွပ်စွဲချက်များမှာ မအောင်မြင်ခဲ့ပေ။

၂၀၁၆ ခုနှစ်တွင် ဂျိုလီဘက်က ကွာရှင်းခွင့် လျှောက်တင်ခဲ့ပြီးကတည်းက ဂျိုလီ နှင့် ဘရက်ပစ်တို့နှစ်ဦးသည် သားသမီးများ အုပ်ထိန်းခွင့်ရရေးအတွက် တရားရုံးတွင် ထိပ်တိုက်တွေ့လာခဲ့ကြသည်။ သူတို့နှစ်ဦးသည် ၂၀၀၄  ခုနှစ်က Mr and Mrs Smith အက်ရှင်ကား ရိုက်ရင်း ဆုံဆည်းခဲ့သည်။ ၁၀ နှစ်တာတွဲပြီးနောက် ၂၀၁၄ ခုနှစ်တွင်လက်ထပ်ကာ နှစ်နှစ်အကြာတွင် လမ်းခွဲလိုက်ကြ သည်။ ကွာရှင်းခွင့်လျှောက်ထားလိုက်ပြီး နောက်မကြာမီ ဘရက်ပစ်သည် ကလေးသူငယ်ညှဉ်းပန်းမှုဖြင့် စုံစမ်းစစ်ဆေးခံလိုက်ရသေးသည်။ သို့သော် ထိုအကြိမ်တွင်လည်းစွပ်စွဲချက်များမှ ကင်းလွတ်ခဲ့ပြန်သည်။