Top News

ပြည်သူများ ရှင်းရှင်းလင်းလင်း သိနိုင်ရန် ဒုသမ္မတ ဦးဟင်နရီဗန်ထီးယူနှင့် မိသားစုဝင်များ၊ အနီးကပ် ထိတွေ့သူများ စုစုပေါင်း ၃၀ ဦးအား COVID-19 ရှိမရှိ ယနေ့ စစ်ဆေးမည်ဖြစ်ကြောင်း နိုင်ငံတော်သမ္မတရုံးမှ ပြောရေးဆိုခွင့်ရှိသူ ဦးဇော်ဌေးက ပြောကြားသည်။

လူမှုကွန်ရက် စာမျက်နှာများတွင် ကိုရိုနာဗိုင်းရပ်စ် ကူးစက်ခံရသည့် အင်းစိန်တရားဟောဆရာနှင့် ဒုသမ္မတတို့ တွေ့ဆုံသည့် ဓာတ်ပုံများ ထွက်ပေါ်လာပြီးနောက်တွင် လူအများအကြား စိုးရိမ်မှုများ မြင့်တက်လာခဲ့ခြင်း ဖြစ်သည်။

ယင်းဖြစ်စဉ်များနှင့် ပတ်သက်ပြီး ဦးဇော်ဌေးက "အဆိုပါ ပုံများဟာ ဖေဖော်ဝါရီလ ၉ ရက်နေ့ကလို့ စိစစ် သိရှိရပါတယ်။ မြန်မာနိုင်ငံမှာ အစောဆုံး ကူးစက်မှု တွေ့ရှိခဲ့တာက မတ်လ ၂၃ ရက်နေ့ ဖြစ်ပါတယ်။ အဆိုပါ ဘာသာရေးအဖွဲ့နဲ့ ဒီရက်နောက်ပိုင်း တွေ့ဆုံမှု မရှိဘူးလို့ သိရပါတယ်။ သို့သော်လည်းပဲ အခုလို ထိတွေ့မှု သတင်းတွေအပေါ် လူထုစိုးရိမ်မှု မြင့်တက်နေတာ တွေ့ရှိရတဲ့အတွက် ရှင်းရှင်းလင်းလင်း သိနိုင်အောင် ဒုတိယသမ္မတကြီးနဲ့ မိသားစုဝင်တွေ၊ အနီးကပ် ထိတွေ့မှုရှိသူတွေ အားလုံး၊ စုစုပေါင်း လူသုံးဆယ်လောက်ကို ဒီနေ့ဓါတ်ခွဲနမူတွေ ရယူပြီးစစ်မှာ ဖြစ်ပါတယ်။ နိုင်ငံတော် အကြီးအကဲတွေရဲ့ ကျန်းမာရေးအတွက် နေအိမ်အဝင်အထွက်တွေ၊ တွေ့ဆုံမှုတွေကို ကျန်းမာရေး guideline တွေနဲ့အညီ အထူးကြပ်မတ် စိစစ်မှုတွေ ဆောင်ရွက်ထားပါတယ်" ဟု ဦးဇော်ဌေးက အိမ်တော် သတင်းထောက်များအား ပြောကြားသည်။