Top News

လာအို-မြန်မာ နှစ်နိုင်ငံအကြား အခြေခံကျသော အလုပ်သမားရေးရာ အခြေခံမူများနှင့် အလေ့အထများ ချမှတ်သွားရန်အတွက် လာအိုနိုင်ငံ အလုပ်သမားနှင့် လူမှုဝန်ထမ်းဝန်ကြီးဌာနနှင့် မြန်မာနိုင်ငံ အလုပ်သမားဝန်ကြီးဌာနတို့အကြား နှစ်နိုင်ငံ အလုပ်သမားရေးရာ ပူးပေါင်းဆောင်ရွက်မှု နားလည်မှုစာချွန်လွှာကို လာအိုနိုင်ငံ ဗီယင်ကျန်းမြို့တွင် လက်မှတ်ရေးထိုးခဲ့ကြကြောင်း သိရသည်။

အောက်တိုဘာလ ၁၂ ရက်က လာအိုနိုင်ငံတွင် ကျင်းပခဲ့သည့် လာအို-မြန်မာ နှစ်နိုင်ငံ အလုပ်သမားရေးရာ ပူးပေါင်းဆောင်ရွက်မှုဆိုင်ရာ ဝန်ကြီးအဆင့်အစည်းအဝေးအပြီးတွင် လက်မှတ်ရေးထိုးခဲ့ခြင်းဖြစ်ပြီး အလုပ်သမားဝန်ကြီးဌာန ပြည်ထောင်စုဝန်ကြီး ဦးမြင့်နောင် တက်ရောက်ခဲ့သည်။

အစည်းအဝေးတွင် ပြည်ထောင်စုဝန်ကြီးက ရွှေ့ပြောင်းအလုပ်သမားများသည် နိုင်ငံတစ်နိုင်ငံ၏ အရေးပါသော လုပ်အားသယံဇာတဖြစ်ပြီး၊ မူရင်းနိုင်ငံနှင့် လက်ခံသည့်နိုင်ငံများ၏ စီးပွားရေး၊ လူမှုရေးနှင့် ဖွံ့ဖြိုးတိုးတက်ရေးတို့အတွက် အထောက်အကူပြုနေသူများဖြစ်ကြောင်း ထည့်သွင်းပြောကြားခဲ့သည်။

နှစ်နိုင်ငံအကြား နားလည်မှုစာချွန်လွှာတွင် အလုပ်သမားများ၏ ကျွမ်းကျင်မှု ဖွံ့ဖြိုးတိုးတက်ရေး၊ အလုပ်အကိုင် နေရာချထားရေး၊ လူမှုဖူလုံရေး၊ အလုပ်သမား ကာကွယ်စောင့်ရှောက်ရေးနှင့် နည်းပညာဆိုင်ရာ ပူးပေါင်းဆောင်ရွက်ရေး စသည့် နယ်ပယ်များပါဝင်ကြောင်းလည်း သိရသည်။

ထို့အပြင် “မြန်မာ့အလုပ်သမားရေးရာနှင့် လူမှုစီးပွားဖွံ့ဖြိုးတိုးတက်မှု အခြေအနေများ မျှဝေခြင်း” ကဏ္ဍတွင် ပြည်ထောင်စုဝန်ကြီးက မြန်မာနိုင်ငံ၏ ဒီမိုကရေစီအသွင်ကူးပြောင်းရေး လုပ်ငန်းစဉ်များ၊ ငြိမ်းချမ်းရေးနှင့် ဖွံ့ဖြိုးတိုးတက်ရေး ဦးတည်ချက်များကို ရှင်းလင်းပြောကြားခဲ့သည်။

မြန်မာနိုင်ငံအနေဖြင့် ပြည်ပရောက် မြန်မာအလုပ်သမားများကို ကူညီဆောင်ရွက်နိုင်ရန် ကိုရီးယား၊ ထိုင်း၊ မလေးရှားနှင့် ဂျပန်နိုင်ငံတို့တွင် အလုပ်သမားသံအရာရှိများ ခန့်အပ်ထားပြီး၊ သံအရာရှိ မရှိသည့် နိုင်ငံများတွင် မြန်မာသံရုံးများမှတစ်ဆင့် ပူးပေါင်းဆောင်ရွက်ပေးလျက်ရှိသည်ဟု ပြောသည်။

ထို့အပြင် ပြည်ပအလုပ်အကိုင်ဆိုင်ရာ ဥပဒေကိုလည်း ခေတ်နှင့်အညီ ပြင်ဆင်ရေးဆွဲလျက်ရှိကြောင်း ပြည်ထောင်စုဝန်ကြီးက ထုတ်ဖော်ပြောကြားခဲ့ကြောင်း သိရသည်။