Top News

ဘာစီလိုနာအသင်းဥက္ကဋ္ဌဖြစ်သူ လာပေါ်တာသည် ပြီးခဲ့သည့်တနင်္ဂနွေနေ့ကယှဉ်ပြိုင်ခဲ့သည့် လာလီဂါပွဲစဉ် (၂၆) ဘာစီလိုနာ (၄-ဝ) ဘီလ်အိုပွဲစဉ်အပြီးတွင် အသင်းနည်းပြဖြစ်သူ ဇာဗီအား ဖုန်းမက်ဆေ့ချ်ပေးပို့ကာ ဂုဏ်ပြုစကားဆိုခဲ့ကြောင်းသိရသည်။

ဘာစီလိုနာအသင်းသည် ယခုရာသီအစပိုင်းတွင် ရလဒ်ဆိုးများနှင့် ရုန်းကန်ခဲ့ရပြီး နည်းပြရော်နယ်လ်ကိုးမန်းအား ရာထူးမှထုတ်ပယ်ပြီးနောက် အသင်း၏ဂန္ထဝင်ကစားသမားဟောင်းဖြစ်သူ ဇာဗီအား နည်းပြသစ်အဖြစ် ပြောင်းလဲခန့်အပ်ခဲ့သည်။ ဇာဗီအနေဖြင့် ဘာစီလိုနာနည်းပြဘ၀ အစပိုင်းကာလတွင် ရလဒ်မတည်ငြိမ်မှုများနှင့် ဖိအားများခဲ့သော်လည်း လက်ရှိအချိန်တွင်မူ ဘာစီလိုနာအသင်းမှာ အကောင်းဆုံးခြေစွမ်းကိုရရှိနေပြီး ပြိုင်ပွဲစုံ (၇)ပွဲဆက်ရှုံးပွဲမရှိခဲ့သလို၊ ယခုရာသီတွင်ပထမဆုံးအဖြစ် နောက်ဆုံး (၃)ပွဲဆက်အနိုင်ရရှိပြီး ရလဒ်ကောင်းများ ပိုင်ဆိုင်နိုင်ခဲ့သည်။

ဘီလ်ဘာအိုအသင်းနှင့်ပွဲအပြီးတွင် လာပေါ်တာက ဇာဗီအား ''ဒါဟာ အောင်မြင်မှုတွေဆီ ချီတက်ဖို့ပါပဲ'' ဟု မက်ဆေ့ချ်ပေးပို့ခဲ့ခြင်းဖြစ်ပြီး ဇာဗီက ယင်းအကြောင်းအရာအား သူ၏ Twitter စာမျက်နှာပေါ်တွင် ရေးသားခဲ့ခြင်းဖြစ်သည်။

ဘာစီလိုနာအသင်းသည် ပြိုင်ပွဲစုံနောက်ဆုံး (၃)ပွဲတွင် ဗလင်စီယာအသင်းအား အဝေးကွင်းတွင် (၄-၁)ဂိုး၊ နာပိုလီအသင်းအား အဝေးကွင်းတွင် (၄-၂)ဂိုးနှင့် ဘီလ်ဘာအိုအသင်းအား အိမ်ကွင်းတွင် (၄-ဝ)ဂိုးတို့ဖြင့်အနိုင်ရရှိခဲ့ပြီး လက်ရှိတွင် လာလီဂါအမှတ်ပေးဇယား အဆင့် (၄)နေရာ၌ ရပ်တည်နေသလို၊ ယူရိုပါလိဂ်ပြိုင်ပွဲတွင်လည်း ရှုံးထွက် (၁၆)သင်းအဆင့်သို့ တက်ရောက်ထားနိုင်ခဲ့သည်။