Top News

အေစီမီလန်အသင်းတိုက်စစ်မှူး အီဘရာဟီမိုဗစ်သည် ယခုရာသီကုန်တွင် ကစားသမားဘဝမှ အနားယူဖွယ်ရှိနေကြောင်း La Gazzetta dello Sport သတင်းစာက ဖော်ပြခဲ့သည်။

ဆွီဒင်ဝါရင့်တိုက်စစ်မှူး အီဘရာဟီမိုဗစ်(၃၈ နှစ်)သည် ပြီးခဲ့သည့် ဇန်နဝါရီအပြောင်းအရွှေ့ တွင် အေစီမီလန်အသင်းသို့ (၆)လစာချုပ်ဖြင့် ရောက်ရှိလာခဲ့သူ ဖြစ်ပြီး တစ်နှစ်သက်တမ်းတိုးခွင့်ရှိနေကြောင်း သိရသည်။

သို့သော် အီဘရာဟီမိုဗစ်သည် အေစီမီလန်အသင်း၏ အနာဂတ်အစီအစဉ်များကို စိတ်ပျက်နေပြီး ယခုရာသီကုန်တွင် အသင်းနှင့်လမ်းခွဲဖွယ်ရှိနေကြောင်း သိရသည်။

Daily Mail ၏သတင်းတွင်မူ ကိုရိုနာဗိုင်းရပ်စ်ပျံ့နှံ့နေမှုကြောင့် သူ၏ကစားသမားဘဝကို အဆုံးသတ်ရန်စဉ်းစားနေကြောင်း ရေးသားခဲ့သည်။

အီဘရာဟီမိုဗစ်သည် အေစီမီလန်နှင့်လမ်းခွဲပြီးပါက ကစားသမားဘဝမှအနားယူပြီး ရိုင်အိုလာနှင့်လက်တွဲကာ အေးဂျင့်လောကသို့ဝင်ရောက်ဖွယ်ရှိကြောင်း အီတလီမီဒီယာများက ဖော်ပြခဲ့သည်။

ပြီးခဲ့သည့်ဒီဇင်ဘာလက အေစီမီလန်အသင်းသို့ ပြောင်းရွှေ့လာခဲ့သည့် အီဘရာဟီမိုဗစ်မှာ အသင်းအတွက် (၁၀)ပွဲကစားခဲ့ရာတွင် (၄)ဂိုးသွင်းယူထားသည်။

၎င်းသည် ဘာစီလိုနာ၊ မန်ယူ၊ ဂျူဗင်တပ်စ်၊ အင်တာမီလန်နှင့် PSG စသည့် ဥရောပထိပ်တန်းအသင်းများတွင်လည်း ကစားခဲ့ဖူးသူဖြစ်သည်။

အီတလီ၊ စပိန်နှင့် ပြင်သစ်တို့တွင် အမှတ်ပေးချန်ပီယံဆုများ ရယူနိုင်ခဲ့ပြီး မန်ယူအသင်းနှင့်မူ ယူရိုပါလိဂ်ဖလား ဆွတ်ခူးခဲ့သည်။

သို့သော် သူ၏ကစားသမားဘဝတွင် ချန်ပီယံလိဂ်ဖလားကို တစ်ကြိမ်မျှ မရရှိဖူးသေးကြောင်း သိရသည်။

အီဘရာဟီမိုဗစ်သည် ဆွီဒင်လက်ရွေးစင်အသင်းအတွက် (၁၁၆)ပွဲကစားခဲ့ရာတွင် (၆၂)ဂိုးသွင်းယူခဲ့ပြီး ဂိုးသွင်းအများဆုံး စံချိန်တင်ထားသည်။