Top News

ဖားကန့်မြို့နယ် လုံးခင်းကျေးရွာအုပ်စု ကထန်ကျေးရွာအနီး ကျောက်စိမ်းအရိုင်းတုံးများ တစ်နေရာတည်းတွင် တွေ့ရှိသဖြင့် လူများစွာ ရှာဖွေနေ

24htopnews | October 24, 2024 1:12 AM CST

ကချင်ပြည်နယ်၊ ဖားကန့်- လုံးခင်းရတနာနယ်မြေ၊ လုံးခင်းကျေးရွာအုပ်စု၊ ကထန်ကျေးရွာအနီး၊ မတ်စ်ကုမ္ပဏီ၏ လုပ်ကွက်ဟောင်းအတွင်း စျေးကွက်ဝင် ကျောက်စိမ်းအရိုင်းတုံးများ တစ်နေရာတည်းတွင် တွေ့ရှိမှုကြောင့် ချက်ချင်းသတင်းပျံ့နှံ့ကာ ရေမဆေးရှာဖွေသူအများအပြား အလုအယက် လာရောက်တူးဖော်နေကြောင်း သတင်းရရှိသည်။

“အရင်နေ့တွေကတည်းက သိတဲ့သူ အနည်းစုကတော့ သူတို့ဟာသူတို့ ကြိတ်တူးနေကြတာ။ ဒီနေ့ နေ့လယ်ပိုင်းက သတင်းပေါက်ကြားသွားတယ်လို့ သိတယ်။ လိုင်းပေါ်လည်း တင်လိုက်ကြတာဆိုတော့ အခု လာရှာသူ တအားများသွားတာ။ ကျောက်က အရင်ကလုပ်ကွက်ဟောင်းနေရာထဲကဆိုတော့ ဒီလောက်ကျောက်ကြီးတွေ တနေရာတည်း စုနေတာ စဉ်းစားစရာပါ။ ကျောက်ကြောငနေ သဘာဝရှိနေတဲ့ ကျောက်တွေမဟုတ်ပါဘူး။ ကျောက်ကတော့ ကျောက်ကောင်းလုံးစွပ်တွေအထိ ပါတယ်” လို့ အဆိုပါနေရာမှာ ရေမဆေးကျောက် လာရောက်ရှာဖွေနေတဲ့ လူတစ်ဦးက ပြောသည်။

အဆိုပါနေရာ၌ တွေ့ရှိရသည့် ကျောက်စိမ်းအရိုင်းတုံးများမှာ ဆိုက်စုံရွယ်စုံ မျိုးစုံဖြစ်ပြီး များသောအားဖြင့် အရွယ်အစား ပိဿာချိန် (၃၀၀) ပိဿာအချိန်အထိ ကျောက်စိမ်းတုံးများ တွေ့ရှိရကြောင်း လာရောက်တူးဖော် ရှာဖွေနေကြသူများထံမှ သိရသည်။

ဖားကန့်-လုံးခင်း ရတနာနယ်မြေ၌ COVID-19 ရောဂါဖြစ်ပွါးနေတာကြောင့် ကျောက်မျက်တူးဖော်ရေး ကုမ္ပဏီများ (၄) လအကြာအထိ ရပ်နားထားလျက်ရှိသည်။ တူးဖော်ရေးကုမ္ပဏီများအား မှီခိုအားထားလျက်ရှိသည့် ရေမဆေးရှာဖွေသူ အများအပြား ကျောက်စိမ်းရှာဖွေဖို့ အခက်အခဲ ရှိနေလျက်ရှိကြောင်း စုံစမ်းသိရှိရသည်။