Top News

ရေကျသွားသော်လည်း အင်းလေးတွင် ပြန်လည်ထူထောင်ရေးအတွက် အခက်အခဲများရှိနေ

24htopnews | October 24, 2024 9:12 AM CST

ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသတွင် ရေအများစု ပြန်ကျလာသော်လည်း ပြန်လည်ထူထောင်ရေးအတွက် အခက်အခဲများရှိနေကြောင်း ဒေသခံများက ပြောသည်။

“ရေကတော့ကျလာပါပြီ၊ ကျွန်မတို့ ဘုန်းကြီးကျောင်းက ပြန်လာပြီ။ ရေကျသွားတော့ အလှူရှင်လည်း နည်းသွားပြီလေ၊ အဲတော့ ရပ်ထားတဲ့ စီးပွါးရေးတွေ ပြန်မစနိုင်သေးခင် စားရေးသောက်ရေးအခက်အခဲကြုံနေရတယ်” ဟု အင်းဒေသခံ အမျိုးသမီးတစ်ဦးက ပေါ်ပြူလာနယူးကို ပြောသည်။

ယခုရက်သတ္တပတ်အတွင်း ညောင်ရွှေမြို့သို့ သွားရောက်လှူဒါန်းခဲ့သည့် တောင်ကြီးမြို့ခံ ပရဟိတအသင်း၏ ပြောပြချက်အရလည်း အင်းလေးတွင် ရေဘေးအလွန်ကာလ စားသောက်ရေးအတွက် အခက်ကြုံနေရသည်ဟု ဆိုသည်။

“ရေကြီးကာစက ဘုန်းကြီးကျောင်းက ဒိုင််ခံကျွေးထားတာ၊ အခုအလှူရှင်နည်းသွားတော့ ဘုန်ကြီးကျောင်းမှာပါ ကျွေးစရာမရှိတော့ဘူး၊ ရပ်ထားတဲ့ စီးပွါးရေးတွေကလည်း ပြန်မစနိုင်သေးတော့ ငွေအခက်အခဲတွေဖြစ်နေကြတာ” ဟု အထက်ပါ အသင်းက ရှင်းပြသည်။

လက်ရှိတွင် သီတင်းကျွတ်ကာလ ရုံးပိတ်ရက်ရှည်၌ အင်းလေးဒေသသို့ လာရောက်လည်ပတ်သူများကြောင့် ဝင်ငွေအနည်းငယ်အဆင်ပြေကာ ရပ်ဆိုင်းထားရသည့် စိုက်ပျိုးရေး၊စီးပွါးရေးလုပ်ငန်းများကို ပြန်လည်စတင်နိုင်ရန် ကြိုးစားနေကြသည်ဟုလညိး သိရသည်။

သို့သော် အင်းလေးဒေသသည် ခရီးသွားအမှီပြုလုပ်ကိုင်ကြသည့် လုပ်ငန်းများ ဖြစ်သည့်အတွက် လက်ရှိ သီတင်းကျွတ်အလွန်၌ ခရီးသွားပြန်လည်လျော့နည်းမှုကြောင့် ပြည်တွင်းပြည်ပ ခရီးသွားများကိုလည်း စောင့်မျှော်နေရကြောင်း သိရသည်။

“ဈေးက ရေလုံးလုံးကျပြီးတာတောင် တော်တော်ကြာမှ ဖွင့်ကြမှာ။ နှုန်းမြေတွေရှင်းတာတောင် အချိန်တော်တော်ပေးရမှာ။ ဈေးပတ်သမားတွေလည်း နားကြတာပေါ့။ တခြားဈေး သွားရောင်းလည်း မကိုက်ဘူးလေ” ဟု အင်းလေးဒေသခံတစ်ဦးက ပြောသည်။

အင်းလေးဒေသတွင် ယာဂီမုန်တိုင်း နောက်ဆက်တွဲအရှိန်ကြောစက်တင်ဘာလ ၁၁ ရက်မှ အောက်တိုဘာလအထိ ရေကြီးရေလျှံဖြစ်မှုဖြစ်ပွါးခဲ့ပြီး ရွာပေါင်း ၁၇၁ ရွာအထိ ရေဘေးသင့်ခဲ့ကာ အိမ်ခြေ သောင်းချီ ရေမြုပ်ပျက်စီးခဲ့ရသည်။