Top News

မန်ယူအသင်းသည် တနင်္လာနေ့က ထုတ်ပြန်လိုက်သော နောက်ဆုံးဘဏ္ဍာရေးရှင်းတမ်းအရ အကြွေးပေါင်သန်း(၁၄၀)နီးပါး ထပ်တိုးလာခဲ့ကြောင်း သိရှိရသည်။

မန်ယူအသင်းသည် ၂၀၁၉-၂၀ ရာသီ၏ ပထမ(၃)လပတ်အတွက် ဘဏ္ဍာရေးရှင်းတမ်းကို ထုတ်ပြန်လိုက်ရာ ယခင်က အေကြွေးပမာဏ ပေါင်(၂၄၇.၂)သန်းသာရှိရာမှ ယခုအခါ ပေါင်(၃၈၄.၅)သန်းအထိ ရှိလာခဲ့ကြောင်း သိရှိရသည်။

ယင်းအတွက်ကြောင့် မန်ယူအသင်း၏ကြွေးမြီပမာဏမှာ (၅၅)ရာခိုင်နှုန်းအထိ မြင့်တက်လာခဲ့ပြီး အသင်းပိုင်ရှင် ဂလေဇာမိသားစုနှင့် အမှုဆောင်ဒုဥက္ကဋ္ဌ အက်ဒ်ဝုဒ်ဝက်ဒ်၏စီမံခန့်ခွဲမှုများကို မနှစ်သက်သည့် အသင်းပရိသတ်များအတွက် ပိုမိုဒေါသထွက်စရာဖြစ်စေခဲ့သည်။

မန်ယူအသင်းသည် လူကာကူနှင့် ဆန်းချက်ဇ်တို့ကို အရောင်း/အငှားပြုလုပ်ခြင်းဖြင့် လစာငွေပေးချေရမှုကို လျှော့ချနိုင်ခဲ့သလို၊ ဝင်ငွေလည်းပိုမိုရရှိအောင် စွမ်းဆောင် နိုင်ခဲ့သော်လည်း ကစားသမားသစ်များ ခေါ်ယူခဲ့ခြင်းကြောင့် အကြွေးပိုတိုးလာခဲ့ခြင်းဖြစ်သည်။

၂၀၁၉-၂၀ ရာသီ၏ ပထမ(၃)လပတ်တွင် မန်ယူအသင်းမှာ ဝင်ငွေ ပေါင်(၁၃၅.၄)သန်းရရှိခဲ့ပြီး ယင်းပမာဏမှာ ပြီးခဲ့သည့်ရာသီထက် ပေါင်(၄)သိန်း ပိုများခဲ့သည်။

စပွန်ဆာစာချုပ်များအပါအဝင် Commercial ဝင်ငွေမှာ ပေါင်(၈၀.၄)သန်းရှိပြီး ပြီးခဲ့သည့်နှစ်ကာလတူထက် (၅.၉)ရာခိုင်နှုန်း မြင့်တက်ခဲ့သည်။

၂၀၂၀ ဘဏ္ဍာရေးနှစ်အတွက်မူ မန်ယူအသင်း၏ဝင်ငွေမှာ ပေါင် ၅၆၀-၅၈၀ သန်းကြားသာ ရရှိမည်ဖြစ်သောကြောင့် ၂၀၁၉ နှစ် ပေါင်(၆၂၇.၁)သန်းထက် လျော့နည်းမည်ဖြစ်သည်။

သို့သော် မန်ယူအသင်းသည် ဇန်နဝါရီအပြောင်းအရွှေ့ကာလတွင် ထိပ်တန်းကစားသမားများ ခေါ်ယူရန်အတွက် ငွေကြေးသုံးစွဲရန် စီစဉ်နေဆဲဖြစ်ကြောင်း သိရသည်။