Top News

မန်စီးတီးအသင်း၏ အင်္ဂလန်လက်ရွေးစင်တောင်ပံကစားသမား စတာလင်သည် လူမျိုးရေးခွဲခြားမှုတိုက်ဖျက်ရေးအတွက် လူမှု ကွန်ရက်မှတစ်ဆင့် လှုံ့ဆော်ပြောကြားမှုများ ပြုလုပ်ခဲ့သောကြောင့် ဂုဏ်ပြုဆုချီးမြှင့်ခံရ ကြောင်း သိရသည်။

ဗြိတိန်အခြေစိုက် BT Sport ရုပ်သံက လန်ဒန်မြို့၌ပြုလုပ်သည့် BT Sport Industry Awards ဆု ချီးမြှင့်ပွဲအခမ်းအနားတွင် စတာလင်အား The Integrity and Impace Award ချီးမြှင့်ခဲ့ခြင်းဖြစ်သည်။ 

စတာလင်သည် ပြီးခဲ့သည့် ဒီဇင်ဘာက ချယ်လ်ဆီးအသင်းနှင့်ပွဲတွင်လည်းကောင်း၊ မတ်လအတွင်း မွန်တီနီဂရိုး အသင်းနှင့် ယူရိုခြေစစ်ပွဲတွင်လည်းကောင်း ပြိုင်ဘက်အသင်းပရိသတ်များ၏ လူမျိုးရေးခွဲခြားမှုခံရကြောင်း လူသိရှင်ကြားထုတ်ဖော် ပြောကြားခဲ့သည်။ 

ထို့ပြင် ၎င်းသည် ဘောလုံးပွဲများ၌ လူမျိုးရေးခွဲခြားမှုအား အမြစ်ဖြတ်ချေမှုန်းနိုင်ရန် အခြားကစားသမားများအနေ ဖြင့်လည်း ထုတ်ဖော်ပြောကြားသင့်ကြောင်း Instragram မှတစ်ဆင့် လှုံ့ဆော်ပြောကြားခဲ့ သလို လူမျိုးရေးခွဲခြားမှုတိုက်ဖျက်ရေး ကြေ ညာစာတမ်းတွင်လည်း ပါဝင်လက်မှတ်ရေး ထိုးခဲ့ကြောင်း သိရသည်။

''နောက်ထပ်မျိုးဆက်တစ်ခုရောက်လာတဲ့အချိန်မှာ ခင်ဗျားက စံနမူနာတစ်ယောက် ဖြစ်နေရမှာပါ။ ကျွန်တော် လီဗာပူးလ်အသင်းမှာကစားတုန်းက စတီဗင်ဂျရတ်တို့လိုလူတွေ ကိုကြည့်ပြီး ကြီးပြင်းခဲ့တာပါ။ သူ့ကိုကြည့်ပြီးတော့ သူ့လိုမျိုးပဲ လူတွေနဲ့ ကစားသမားတွေရဲ့ကိုယ်စား ကိုယ်ဘာလုပ်နိုင်မလဲဆိုပြီး တွေးခဲ့ဖူးပါတယ်။ ကျွန်တော်က ကိုယ့်အတွေ့အကြုံ ကို ပြောပြခဲ့တာပါ။ အခုလို စိတ်ဝင်စားမှုတွေ အများကြီးရမယ်လို့ မမျှော်လင့်ထားပါဘူး။ ကျွန်တော်က Instragram မှာရှိတဲ့သူတွေကို သိစေချင်ရုံလောက်ပဲ ပြောပြတာပါ။ လူတွေက အဲဒီလိုပြောတာကို နားထောင်ပြီးတော့ ပိုကောင်းလာအောင် ကြိုးစားနေတာတွေ့ရလို့ တကယ်ကျေနပ်မိပါတယ်''ဟု ၎င်းက ဆု လက်ခံရယူပြီးနောက် ပြောကြားသည်။

ထို့ပြင် အင်္ဂလန်ဘောလုံးအဖွဲ့ချုပ်(FA)  နှင့် အင်္ဂလန်အသင်းမှာလည်း Leadership in Sport Award ချီးမြှင့်ခံရသည်။