Top News

တရုတ်အစိုးရပြဋ္ဌာန်းထားသော ဟောင်ကောင်အမျိုးသားလုံခြုံရေး ဥပဒေကိုအသုံးပြု၍ ဟောင်ကောင်အာဏာပိုင်များက ပိုင်ဆိုင်မှု ထိန်းချုပ်ရေးအာဏာကို  ပထမဆုံးအကြိမ် ကျင့်သုံးခဲ့ပြီးနောက် ယင်း လုပ်ဆောင်မှုသည် ဟောင်ကောင်ရှိ စီးပွားရေးလုပ်ငန်းများ ရင်ဆိုင်ရမည့် အန္တရာယ် မြင့်တက်လာနေသည်ကို ပြသနေခြင်းဖြစ်ကြောင်း ထိုင်ဝမ်က မေ ၁၅ ရက်တွင် သတိပေးခဲ့သည်။

အမျိုးသားလုံခြုံရေးဥပဒေကို ချိုးဖောက်မှုစွဲချက်ဖြင့် ဒီမိုကရေစီလိုလားသော မီဒီယာလုပ်ငန်းရှင် သူဌေး ဂျင်မီလိုင်၏ သတင်းမီဒီယာလုပ်ငန်းမှ ရှယ်ယာများအပါအဝင် လိုင်၏ ပိုင်ဆိုင်မှုများကို ဟောင်ကောင်အာဏာပိုင်များက ထိန်းချုပ်ခဲ့ပြီး နောက် ထိုင်ဝမ်၏ သတိပေးချက် ထွက်ရှိလာခဲ့ခြင်းဖြစ်သည်။

ထိုလုပ်ဆောင်ချက်သည် အမျိုးသား လုံခြုံရေးဥပဒေ၏ခြိမ်းခြောက်မှုများကို မီးမောင်းထိုးပြသနေသလို ဟောင်ကောင်ရှိ စီးပွားရေးလုပ်ငန်းများအတွက် အန္တရာယ်မြင့်တက်လာနေသည်ကို နိုင်ငံတကာအသိုက်အဝန်းထံ သတင်းပို့နေခြင်းလည်းဖြစ်ကြောင်း၊ ဟောင်ကောင်ဒီမိုကရက်များအပေါ် ဖိနှိပ်နေခြင်းကို ရပ်တန့်ရန် သက်ဆိုင်ရာအဖွဲ့အစည်းများကို မိမိတို့ နောက်တစ်ကြိမ် တောင်းဆိုကြောင်း ထိုင်ဝမ်ပြည်တွင်း ရေးကောင်စီက ထုတ်ပြန်ခဲ့သည်။

ကိုယ်ပိုင်အုပ်ချုပ်ခွင့်ရ ထိုင်ဝမ်သည် ဟောင်ကောင်၌ ဖြစ်ပွားသော ဒီမိုကရေစီ အရေးတက်ကြွ လှုပ်ရှားမှုများကို ထောက်ခံကြောင်း ပြောကြားခဲ့ဖူးပြီး ဟောင်ကောင်မှ ထွက်ပြေးလာကြသူများကိုလည်း တိတ်တဆိတ် ခိုလှုံခွင့်ပြုခဲ့သည်။

မီဒီယာလုပ်ငန်းကုမ္ပဏီ၏ ရှယ်ယာအများစုကို ပိုင်ဆိုင်ထားသော အစုရှယ်ယာရှင် ၏ရှယ်ယာများကို ထိန်းချုပ်သည့် ဟောင်ကောင်အာဏာပိုင်များ၏လုပ်ရပ်သည် စီးပွားရေးအချက်အချာ ဟောင်ကောင်၌ ရင်း နှီးမြုပ်လိုသူများ၏ သဘောထားကို ပြောင်းလဲသွားစေလိမ့်မည်ဖြစ်သည်။

ပြီးခဲ့သည့်နှစ်တွင် ပြဋ္ဌာန်းခဲ့သော လုံခြုံရေးဥပဒေအရ ဟောင်ကောင်၏အမျိုး သားလုံခြုံရေးကို ထိပါးခြိမ်းခြောက်နေသည် ဟု ယူဆရသော မည်သည့်လူပုဂ္ဂိုလ် သို့မဟုတ် ကုမ္ပဏီ၏ ပိုင်ဆိုင်မှုများအား ထိန်းချုပ် နိုင်သည့် အာဏာကို ဟောင်ကောင်အစိုးရ အရာရှိများထံ အပ်နှင်းထားသည်။

မေ ၁၄ ရက် အမိန့်ထုတ်ပြန်ချက်အရ Next Digital မီဒီယာလုပ်ငန်းအဖွဲ့တွင်းရှိ လိုင်၏ ရှယ်ယာများ၊ ၎င်းင်းပိုင်ဆိုင်သော ကုမ္ပဏီသုံးခု၏ ဒေသတွင်းဘဏ်စာရင်း များထဲမှ ပိုင်ဆိုင်မှုငွေကြေးများကို ထိန်းချုပ် ခဲ့သည်။

အသက် ၇၃ နှစ်အရွယ် ဘီလျံနာ ဂျင်မီ လိုင်သည် ဒီမိုကရေစီကို ထောက်ခံသော အကြောင်းအရာများနှင့် တရုတ်အစိုးရအဖွဲ့ ကို ဝေဖန်သောအကြောင်းအရာများ ရေး သားထုတ်ဝေမှုကြောင့် တရုတ်အစိုးရက ၎င်းအား ကာလရှည်ကြာ အမြင်မကြည်ဖြစ် ခဲ့သည်။