Top News

ပြည်သူ့လွှတ်တော် တိုင်ကြားစာနှင့် အသနားခံစာဆိုင်ရာကော်မတီကို ၂၀၁၉ ခုနှစ် ဇန်နဝါရီတွင် စတင်ဖွဲ့စည်းပြီး ကော်မတီသက်တမ်း တစ်နှစ်အတွင်း တိုင်ကြားစာ ၁၈၀၀ ကျော်ရရှိကာ အများစုမှာ သိမ်းဆည်း လယ်ယာမြေကိစ္စဖြစ်သည်ဟု ကော်မတီဥက္ကဋ္ဌ ပုဇွန်တောင်မြို့နယ် ပြည်သူ့လွှတ်တော် ကိုယ်စားလှယ် ဦးမြင့်လွင်က ပြောကြားသည်။

ကော်မတီထံ ပြည်ထဲရေးဝန်ကြီးဌာနနှင့် တရားစီရင်ရေးတို့နှင့် စပ်လျဉ်း၍လည်း တိုင်ကြားမှု များပြားသည်ဟု ဇန်နဝါရီ ၁၅ ရက်ထုတ် ကြေးမုံသတင်းစာတွင် ဖော်ပြပါရှိချက်အရ သိရသည်။

ပြည်သူ့လွှတ်တော် တိုင်ကြားစာနှင့် အသနားခံစာဆိုင်ရာ ကော်မတီထံ တိုင်ကြားစာ၊ အသနားခံစာရောက်ရှိပါက တိုင်ကြားစာအပေါ် ဖြေရှင်းပေးနိုင်မည့် ဝန်ကြီးဌာနနှင့် ကော်မရှင်များကို အကြောင်းကြားစာပေးပို့ပြီး အချက်အလက်မပြည့်စုံသည့် တိုင်ကြားစာ၊ အသနားခံစာများကို မှတ်တမ်းအနေဖြင့် ထားရှိသည်ဟု ဦးမြင့်လွင်က ပြောကြားသည်။

“ ကျွန်တော်တို့ရဲ့ အလုပ်က အစိုးရရဲ့ စီမံခန့်ခွဲမှု လွဲနေတာ၊ ပြည်သူနစ်နာတာကို ဖြေရှင်းပေးဖို့ တာဝန်ရှိပါတယ်” ဟု ၎င်းက ဆိုသည်။

ပြည်သူ့လွှတ်တော် တိုင်ကြားစာနှင့် အသနားခံစာဆိုင်ရာကော်မတီသို့ ရောက်ရှိလာသည့် တိုင်ကြားစာများနှင့် ပတ်သက်၍ ဝန်ကြီးဌာနများကို ခေါ်ယူကြားနာခွင့်ရှိရာ စက်မှုဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်ထောင်စု တရားလွှတ်တော်ချုပ်၊ သိမ်းဆည်းခံ လယ်ယာမြေနှင့် အခြားမြေများစိစစ်ရေး ကော်မတီတို့ကို ခေါ်ယူဆွေးနွေးညှိနှိုင်းခဲ့သည်ဟု ကော်မတီဥက္ကဋ္ဌ ဦးမြင့်လွင်က ဆိုသည်။

လက်ခံရရှိသည့် တိုင်ကြားစာ ၁၈၀၀ ကျော်တွင် ဌာဆိုင်ရာသို့ ပြန်လည်ပေးပို့သည့် တိုင်စာ ၁၅၅၁ စောင် ရှိပြီး အကြောင်းပြန်ကြားမှု ၉၀၀ ကျော်ရှိသည်ဟု သိရသည်။

တိုင်ကြားစာများသည် တိုင်းပြည်တစ်ခုအတွက် အသုံးတည့်သည့် သတင်းအချက်အလက်များဖြစ်ပြီး ယင်းအပေါ်အခြေခံ၍ တိုင်းပြည်က ဆောင်ရွက်နေသည့်ကိစ္စရပ်များ၏ အားသာချက်၊ အားနည်းချက်များကို ဆုံးဖြတ်၍ ရနိုင်သည်ဟု ပြည်သူ့လွှတ်တော် တိုင်ကြားစာနှင့် အသနားခံစာဆိုင်ရာ ကော်မတီ အတွင်းရေးမှူး ရွှေကျင်မြို့နယ် ပြည်သူ့လွှတ်တော်ကိုယ်စားလှယ် ဦးစောသလေးစောက ပြောကြားသည်။

“ သေချာ အသုံးပြုမယ်ဆိုရင် အထောက်အကူ ဖြစ်စေပါတယ်။ တိုင်ကြားစာနဲ့ ပတ်သက်တဲ့ ကျွန်တော်တို့ရဲ့ ခံယူချက်တွေလည်း ပြောင်းလဲဖို့ လိုပါတယ်” ဟု ၎င်းက ဆိုသည်။