Top News

စာသင်ကျောင်းများ၌ အခမဲ့ကျွေးမွေးသည့်အစီအစဉ် ဆက်လက်ပြုလုပ်ရန် မဲခွဲမှုရှုံးနိမ့်သွားပြီးနောက် မန်ယူအသင်း၏ အင်္ဂလန်လက်ရွေးစင်တိုက်စစ်မှူး ရပ်ရှ်ဖို့ဒ်က ကလေးငယ်များမှာ ဆာလောင်မှုအပြင် ၎င်းတို့အနေဖြင့် တန်ဖိုးမရှိသလို ခံစားနေရကြောင်း တုံ့ပြန်ပြောကြားခဲ့သည်။

    

ရပ်ရှ်ဖို့ဒ်သည် ပြီးခဲ့သည့် ဇူလိုင်လအတွင်းက စာသင်ကျောင်းများ၌ ဆင်းရဲနွမ်းပါးသည့် မိသားစုမှ ကလေးများအား အခမဲ့ကျွေးမွေးမှု အစီအစဉ်ကို နွေရာသီကျောင်းပိတ်ရက် ကာလတွင်ပါ ဆက်လက်ပြုလုပ်ရန် ကြိုးပမ်းနိုင်ခဲ့သော်လည်း ယင်းအစီအစဉ်ကို အီစတာ ပွဲတော်အားလပ်ရက်အထိ ဆက်လက်ဆောင် ရွက်ရန် ကြိုးပမ်းမှုမှာ ရှုံးနိမ့်ခဲ့ခြင်းဖြစ်သည်။ 

လေဘာပါတီက တင်သွင်းသည့်အဆိုကို ဗုဒ္ဓ ဟူးနေ့က မဲခွဲဆုံးဖြတ်ရာ (၃၂၂-၂၆၁)မဲဖြင့် ရှုံးနိမ့်ခဲ့သည်။ 

သို့ဖြစ်ရာ ရပ်ရှ်ဖို့ဒ်က "ကလေး တော်တော်များများက ဒီညအိပ်ရာဝင်တဲ့အခါ ဆာလောင်မှုအပြင် သူတို့က အရေးပါတဲ့သူတွေမဟုတ်ဘူးလို့ ခံစားနေရမှာပါ။ ဘာဖြစ်လို့လဲဆိုတော့ ဒီနေ့အပြန်အလှန်ပြောဆိုခဲ့တဲ့ မှတ်ချက်တွေကြောင့်ပါ။ ကျွန်တော်တို့အနေနဲ့ ကဲ့ရဲ့ပြစ်တင်တာတွေ၊ ဆုံးဖြတ်တာတွေ၊ လက်ညှိုးထိုးနေတာတွေကို ရပ်တန့်ပစ်ရပါမယ်။ နိုင်ငံရေးဖုံးလွှမ်းမှုအောက်မှာ ကျွန် တော်တို့အမြင်တွေက မှေးမှိန်သွားရပါတယ်။ ဒီကလေးတွေက ဒီနိုင်ငံရဲ့ အနာဂတ်တွေပါ။ သူတို့တွေက အချက်အလက်တွေသက်သက် မဟုတ်ပါဘူး။ သူတို့ဆီမှာ ပြောနိုင်တဲ့အသံ တွေမရှိပေမဲ့ သူတို့ဘက်မှာ ကျွန်တော်ရှိပါတယ်"ဟု တုံ့ပြန်ပြောကြားခြင်းဖြစ်သည်။