Top News

ကူဝိတ်နိုင်ငံအတွင်း အာဆီယံ၏ လှုပ်ရှားမှုများနှင့် အခန်းကဏ္ဍ ပိုမိုမြှင့်တင်နိုင်ရေးအတွက် ကူဝိတ်နိုင်ငံရှိ အာဆီယံကော်မတီ သံအမတ်ကြီးများအဆင့် အစည်းအဝေးတွင် ထည့်သွင်းဆွေးနွေးကြရာ မြန်မာသံအမတ်ကြီး ဦးချမ်းအေးလည်း တက်ရောက်ဆွေးနွေးခဲ့ကြောင်း နိုင်ငံခြားရေးဝန်ကြီးဌာန ထုတ်ပြန်ချက်အရ သိရသည်။

ကူဝိတ်နိုင်ငံဆိုင်ရာ ထိုင်းနိုင်ငံသံအမတ်ကြီး H.E. Mr. Ekapol Poolpipat မှ ဦးဆောင်၍ ၎င်း၏နေအိမ်၌ ကျင်းပခဲ့သည့် ယင်းအစည်းအဝေးကို အောက်တိုဘာ (၂၇) ရက်က ကျင်းပခဲ့ခြင်း ဖြစ်ပြီး ကူဝိတ်နိုင်ငံ၌ အာဆီယံ၏ လှုပ်ရှားမှုများနှင့် အခန်းကဏ္ဍကို ပိုမိုမြှင့်တင်နိုင်ရန်အတွက် ရှေ့ဆက်ဆောင်ရွက်သင့်သည့် အစီအစဉ်များ၊ မကြာသေးမီက ကာတာနိုင်ငံတွင် ကျင်းပပြီးစီးခဲ့သည့် တတိယအကြိမ် ACD ထိပ်သီးအစည်းအဝေးနှင့် ပတ်သက်သည့်ကိစ္စရပ်များကို ဆွေးနွေးခဲ့ကြောင်း သိရသည်။

ထို့ပြင် လာအိုနိုင်ငံတွင် ကျင်းပပြီးစီးခဲ့သည့် (၄၄)ကြိမ်နှင့် (၄၅)ကြိမ်မြောက် အာဆီယံထိပ်သီး အစည်းအဝေးတို့နှင့် ပတ်သက်သည့် ကိစ္စရပ်များ အပါအဝင် ဒေသတွင်းနှင့် နိုင်ငံတကာ အခြေအနေတို့အပေါ် အမြင်ချင်း ဖလှယ်ဆွေးနွေးခဲ့ကြကြောင်း သိရသည်။

ယင်းအစည်းအဝေးအပြီး အထူးဧည့်သည်တော် အာရှပူးပေါင်းဆောင်ရွက်ရေးဆွေးနွေးဖက်အဖွဲ့ (Asi a Cooperation Dialogue -ACD) ၏ အတွင်းရေးမှူးချုပ် H.E. Nasser Raden Thaamer Al-Motairi အား ဧည့်ခံသည့် အလွတ်သဘော နေ့လည်စာ စားပွဲကို ဆက်လက်ကျင်းပခဲ့ကြောင်း သိရသည်။

အဆိုပါ အစည်းအဝေးနှင့် နေ့လည်စာ စားပွဲတို့သို့ မြန်မာသံအမတ်ကြီး ဦးချမ်းအေးမှ ကူဝိတ်အခြေစိုက် အာဆီယံသံရုံးများမှ သံအမတ်ကြီးများ၊ သံရုံးအကြီးအကဲများနှင့်အတူ တက်ရောက်ခဲ့ကြောင်း သိရသည်။