Top News

နေပြည်​တော်တွင် ကိုဗစ်-၁၉ ​ရောဂါ ကူးစက်မှုများ ရှိ​​နေခြင်း​ကြောင့် ​Quarantine Center ​လေးခု ပြန်လည်ဖွင့်လှစ်ထား​ကြောင်း သိရသည်။

ကိုဗစ်-၁၉ ​ရောဂါ ကူးစက်မှုများ ရှိ​​နေခြင်း​ကြောင့် ​​နေပြည်​တော်တွင် ပြန်လည် ဖွင့်လှစ်​ပေးထား​သော Quarantine Center ​လေးခုသည် New Ayear ဟိုတယ်၊ ဒက္ခိဏသီရိ ကုတင်(၅၀)၊ ဥတ္တရသီရိ ကုတင်(၅၀)နှင့် လယ်​ဝေးအားကစားရုံတို့ဖြစ်​ကြောင်း သိရသည်။

၂၀၂၂ ခုနှစ် စက်တင်ဘာ ၁၄ ရက်အထိ အဆိုပါ Quarantine Center ​လေးခုတွင် ထားရှိ​သော ထိ​တွေ့သူအ​ရေအတွက်သည်  ၇၀ ဦး ရှိ​ကြောင်းနှင့် ယင်း​နေ့အထိ ကိုဗစ်-၁၉ ​ရောဂါ အတည်ပြုလူနာ ၁၆၇ ဦး ရှိ​ကြောင်း သိရသည်။

​ကိုဗစ်-၁၉ ​ရောဂါ ကူးစက်ပြန့်ပွားမှု ကာကွယ်တားဆီးနိုင်​ရေးအတွက် ပြည်သူများ Mask တပ်ရန်အတွက် Mask Campaign များ ​ဆောင်ရွက်ခြင်း၊ ​ကျောင်းများတွင် ဆရာ/ဆရာမများနှင့် ​ကျောင်းသား၊ ​ကျောင်းသူများ ​နေ့စဉ် Mask တပ်၍ စာသင်ကြားရန်နှင့် ဖျားနာခြင်း၊ သံသယလက္ခဏာများ​တွေ့ရှိပါက ကျန်းမာ​ရေးဌာနသို့ အ​​ကြောင်းကြားရန် အသိ​ပေးခြင်းနှင့် စား​သောက်ဆိုင်များ၊ ​စျေးများနှင့် လူစုလူ​ဝေးရှိ​သော ​နေရာများတွင် Mask တပ်ရန် ​ဆော်သြခြင်းများ ​ဆောင်ရွက်ထား​ကြောင်း ကျန်းမာ​ရေးဝန်ကြီးဌာနက ဆိုသည်။

နေပြည်တော်တွင် ကိုဗစ်-၁၉ ​ရောဂါ စတင်ဖြစ်ပွားသည့် ကိုဗစ်​ပထမလှိုင်းမှ လက်ရှိအချိန်အထိ ကိုဗစ်-၁၉ ​ရောဂါ အတည်ပြုလူနာ စုစုပေါင်း (၂၂၆၅၄)ဦးနှင့် သေဆုံးသူ စုစုပေါင်း (၇၅၆)ဦးအထိရှိ​ကြောင်း သိရသည်။