Top News

နိုင်ငံတော်၏ငြိမ်းချမ်းရေးဆွေးနွေးရေးအဖွဲ့နှင့် ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော်၊ ငြိမ်းချမ်းရေးကောင်စီ(KNU/KNLA-PC)၊ ဒီမိုကရေစီအကျိုးပြုကရင်တပ်မတော်(DKBA) ငြိမ်းချမ်းရေးကိုယ်စားလှယ်အဖွဲ့တို့သည် နေပြည်​​တော်တွင် ငြိမ်းချမ်း​ရေး​ဆွေး​နွေးမှု ဒုတိယ​နေ့အဖြစ် စက်တင်ဘာ ၁၆ ရက်တွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန အစည်းအဝေးခန်းမတွင် ​တွေ့ဆုံ​ဆွေးနွေးခဲ့​ကြောင်း နိုင်ငံ​တော်စီမံအုပ်ချုပ်​ရေး​ကောင်စီ သတင်းထုတ်ပြန်​ရေးအဖွဲ့က ထုတ်ပြန်ထားသည်။

​ဒုတိယ​နေ့ဆွေး​နွေးပွဲတွင် ပထမ​​နေ့ ​ဆွေး​နွေးချက်များအ​​ပေါ် နှစ်ဖက်သ​ဘောထားများအား ရှင်းလင်း​ဆွေးနွေးခဲ့ကြပြီး​နောက် ပြည်​ထောင်စုသ​ဘောတူစာချုပ် အစိတ်အပိုင်း(၁)၊ (၂)နှင့် (၃)တို့ပါ သဘောတူညီချက်များအား ပြည်​ထောင်စုသမ္မတနိုင်ငံ​တော် ဖွဲ့စည်းပုံအ​ခြေခံဥပ​ဒေ(၂ဝဝ၈ ခုနှစ်)၊ တည်ဆဲဥပဒေများနှင့် ကိုက်ညီမှု ရှိ/မရှိ ​လေ့လာစိစစ်ချက်များနှင့်ပတ်သက်၍ ညှိုနှိုင်း​ရေး​ကော်မတီအဖွဲ့ဝင် ဒုတိယဗိုလ်ချုပ်ကြီးဝင်းဗိုလ်ရှိန်က တစ်ချက်ချင်းအလိုက် ရှင်းလင်းတင်ပြ​ကြောင်း သိရသည်။

ထို့နောက် တက်​ရောက်လာကြသူများမှ မိမိတို့၏ သ​ဘောထားများ၊ လိုလားချက်များကို အပြန်အလှန် ​ဆွေးနွေးညှိုနှိုင်းခဲ့ကြပြီး ​တွေ့ဆုံ​ဆွေး​နွေးပွဲ ဒုတိယ​နေ့ကို ရပ်နားခဲ့​ကြောင်းနှင့် တတိယ​နေ့ ​ဆွေး​​နွေးပွဲကို စက်တင်ဘာ ၁၇ ရက်တွင် ဆက်လက် ကျင်းပမည်ဖြစ်​ကြောင်း သိရသည်။

အဆိုပါတွေ့ဆုံ ဆွေးနွေးပွဲသို့ နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်၊ ပြည်ထောင်စုအစိုးရအဖွဲ့ရုံးဝန်ကြီးဌာန(၁) ပြည်ထောင်စုဝန်ကြီး၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီဥက္ကဌ၊ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီးရာပြည့်၊ အဖွဲ့ဝင်များဖြစ်ကြသည့် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒုတိယဗိုလ်ချုပ်ကြီးမိုးမြင့်ထွန်း၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ အတွင်းရေးမှူး ဒုတိယဗိုလ်ချုပ်ကြီးမင်းနောင်နှင့် ဒီမိုကရေစီအကျိုးပြုကရင်တပ်မတော်(DKBA)စစ်ဦးစီးချုပ် စောစတီး၊ စစ်ရေးချုပ်စောစိန်ဝင်း၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော် ငြိမ်းချမ်းရေးကောင်စီ(KNU/KNLA-PC)မှ ဒုတိယဥက္ကဋ္ဌ ဒေါက်တာနော်ကပေါ်ထူး၊ အထွေထွေအတွင်းရေးမှူးချုပ်စောကျော်ညွန့်တို့ တက်ရောက်ကြကြောင်း သိရသည်။