Top News

လာဆာ၊အောက်တိုဘာ ၂၉

တရုတ်သိပ္ပံပညာရှင်များသည် ချင်းဟိုင်ရှင်ဇန်းကုန်းပြင်မြင့်ရှိ အထူဆုံးရေခဲမြစ်မှ ၃၂၄ မီတာရှိသော ရေခဲအူတိုင်ကို အောင်မြင်စွာထုတ်ယူနိုင်ခဲ့ကြောင်း အင်္ဂါနေ့ကကြေငြာခဲ့သည်။

အဆိုပါ‌ရေခဲအူတိုင်သည် ချင်းဟိုင်ရှင်ဇန်းကုန်းပြင်မြင့်ပေါ်၌ တူးဖော်ဖူးသမျှထဲတွင် အရှည်ဆုံးရေခဲအူတိုင်ဖြစ်ကာ ဝင်ရိုးစွန်းဒေသများ၏ပြင်ပ၌ တွေ့ရှိဖူးသမျှရေခဲအူတိုင်များအနက် ကမ္ဘာပေါ်တွင် အရှည်ဆုံးဖြစ်သည်ဟုလည်းသိရသည်။

ယခုလိုအောင်မြင်စွာထုတ်ယူနိုင်ရေးအတွက် လေနှင့်ဆီးနှင်းများဒဏ်ကိုကြံ့ကြံ့ခံ့ကာ တရုတ်သိပ္ပံအကယ်ဒမီမှပညာရှင်များသည် ပင်လယ်ရေမျက်နှာပြင်အထက် မီတာ ၅,၀၀၀ ရှိသည့် Tsonyi ကောင်တီရှိ Purog Kangri ရေခဲမြစ်၌ တစ်လကျော်ကြာကြိုးပမ်းခဲ့ရခြင်းလည်းဖြစ်သည်။

ယခုရယူနိုင်ခဲ့သည့် ရေခဲအူတိုင်သည် ၁,၉၉၂ ခုနှစ်က တရုတ်နှင့်အမေရိကန်ပညာရှင်များ ရယူနိုင်ခဲ့သည့် ၃၀၈ ဒသမ ၆ မီတာရှည် သော ရေခဲ အူတိုင်ကိုကျော်လွန်ခဲ့သည်။

ရေခဲအူတိုင်များသည် ကမ္ဘာ့ရာသီဥတုသမိုင်းနှင့် ပတ်သက်သော အရေးကြီးသည့်သတင်းအချက်အလက်များကို ပေးနိုင်သည်ဟုလည်းပညာရှင်များကဆိုကြသည်။

စာကြွင်း : ရေခဲအူတိုင်ဟူသည် ရေခဲမြစ်များနှင့်ရေခဲလွှာများမှတူးဖော်ရသည့် ဆလင်ဒါပုံရေခဲတောင့်များဖြစ်ပြီး အေးခဲနေသည့်အချိန်များတွင် သိပ္ပံပညာရှင်များအတွက် အတိတ်ကရာသီဥတုများကိုပြန်လည်ခန့်မှန်းနိုင်ရန်အထောက်အကူပြုသည်။ရေခဲအူတိုင်များ၌ပါဝင်သည့် အလွှာများသည် နှစ်များနှင့်ရာသီများနှင့်ကိုက်ညီသည်ဟုလည်းဆိုကြသည်။

Source : ရှင်းဟွာ