Top News

စပိန်ထိပ်သီး ရီးယဲလ်မက်ဒရစ်အသင်း၏ဘုတ်အဖွဲ့ဝင်အချို့သည် နာမည်ကျော် PSG တိုက်စစ်မှူး ဘာပေထက် အသင်းနှင့် ပိုကိုက်ညီမည့် နာပိုလီတိုက်စစ်မှူး အိုဆင်မန် ကို ခေါ်ယူရန် အလိုရှိနေကြကြောင်း စပိန်မီဒီယာများက ဖော်ပြနေကြသည်။ 

အသက် ၂၅ နှစ်အရွယ်ရှိ ပြင်သစ်လက်ရွေးစင်တိုက်စစ်မှူး ဘာပေသည် ယခုရာသီကုန်တွင် PSG အသင်းနှင့်စာချုပ်သက်တမ်း ကုန်ဆုံးမည်ဖြစ်ပြီး လက်ရှိတွင် ပြည်ပကလပ်များနှင့် အပြောင်းအရွှေ့ကိစ္စရပ်များအတွက် ဆွေးနွေးခွင့်ရရှိထားသည်။ သို့သော် PSG အသင်းသည် ဘာပေအား အသင်းတွင် ဆက်ထိန်းထားနိုင်ရန် ကြိုးပမ်းနေဆဲဖြစ်ပြီး အသင်းဥက္ကဋ္ဌ အယ်လ်ခီလိုင်ဖီကိုယ်တိုင်က ဘာပေကို ပါရီတွင်သာ ဆက်ရှိစေလိုကြောင်း ပြောကြားထားသည်။ 

ဘာပေအနေဖြင့် လာမည့် ၂၀၂၄ နွေရာသီတွင် ရီးယဲလ်မက်ဒရစ်အသင်းသို့ ပြောင်းရွှေ့ရန် သဘောတူညီမှု ရထားပြီဟု သတင်းထွက်ပေါ်ခဲ့သော်လည်း လက်ရှိအချိန်အထိ သဘောမတူညီမှု မရှိသေးကြောင်းလည်း သိရှိရသည်။ 

ယင်းအခြေအနေတွင် ရီးယဲလ်မက်ဒရစ် အသင်းဘုတ်အဖွဲ့ဝင်အချို့က ဘာပေထက် အသင်းနှင့်ပိုကိုက်ညီနိုင်သည့် နာပိုလီတိုက်စစ်မှူး အိုဆင်မန်ကို ခေါ်ယူရန် အလိုရှိနေကြကြောင်း သိရှိရသည်။ အသက် ၂၅ နှစ်အရွယ်ရှိ နိုင်ဂျီးရီးယားလက်ရွေးစင် တိုက်စစ်မှူး အိုဆင်မန်သည် ပြီးခဲ့သည့်ဒီဇင်ဘာလကမှ နာပိုလီအသင်းနှင့် ၂၀၂၆ ခုနှစ်အထိ သက်တမ်းရှိ စာချုပ်သစ်တစ်ရပ် ချုပ်ဆိုခဲ့သည်။ 

သို့သော် ယင်းစာချုပ်တွင် အိုဆင်မန်အား လျော်ကြေး ယူရိုသန်း ၁၃၀ ဖြင့် ခေါ်ယူခွင့်ရှိသည်ဆိုသော အချက်ပါဝင်ကြောင်း သိရှိရသည်။ ယင်းပမာဏမှာ ရီးယဲလ်မက်ဒရစ်အသင်း တတ်နိုင်သည့်ပမာဏဖြစ်ရာ မသေချာသည့် ဘာပေထက် အိုဆင်မန်ကိုခေါ်ယူရန် ရီးယဲလ်ဘုတ်အဖွဲ့ဝင်အချို့ အလိုရှိနေခြင်းဖြစ်သည်။