Top News

မြောက်ကိုရီးယားသည် တိုက်ချင်းပစ် ပဲ့ထိန်းဒုံးကျည်ပစ်လွှတ်ရန်အတွက် လောင်ချာတစ်ခုကို အသင့်အနေအထား ပြင်ဆင်ထားခဲ့ပြီး အမေရိကန်သမ္မတရွေးကောက်ပွဲပြုလုပ်မည့် အချိန်တွင် ထိုဒုံးကျည်ကို ပစ်လွှတ်ဖွယ်ရှိကြောင်း တောင်ကိုရီးယားလွှတ်တော်အမတ်များက စစ်ထောက်လှမ်းရေးသတင်းမျးကိုကိုးကားပြီး ပြောဆိုခဲ့သည်။

မြောက်ကိုရီးယားသည် နိုဝင်ဘာ ၅ ရက်တွင်ပြုလုပ်မည့် အမေရိကန်သမ္မတရွေးကောက်ပွဲနေ့ သို့မဟုတ် နီးစပ်သည့်အချိန်တွင် တာဝေးပစ်ဒုံးကျည်တစ်စင်းပစ်လွှတ်ခြင်း သို့မဟုတ် သတ္တမအကြိမ်မြောက် နျူကလီးယားစမ်းသပ်မှုပြုလုပ်ခြင်းတို့ဖြင့် ၎င်း၏ မဟာဗျူဟာမြောက် လက်နက်များ တိုးတက်မှုရှိနေသည့်အခြေအနေကို အလေးထားဖော်ပြရန် ကြိုးပမ်းဖွယ်ရှိနေသည်ဟု တောင်ကိုရီးယားအရာရှိများက ပြောသည်။

မြောက်ကိုရီးယားသည် တိုက်ချင်းပစ်ပဲ့ထိန်းဒုံးကျည်စမ်းသပ်ပစ်လွှတ်ရန်နှင့် ထိုဒုံးကျည်ထိပ်ဖူး လေထုအတွင်းသို့ ပြန်လည်ဝင်ရောက်မှုအတွက် နေရာဒေသတစ်ခုတွင် ဒုံးပစ်လောင်ချာကို အသင့်ပြင်ထားခဲ့ကြောင်း တောင်ကိုရီးယားလွှတ်တော်အမတ်တစ်ဦးဖြစ်သည့် လီဆောင်ကွမ်က အောက်တိုဘာ ၃၀ တွင် ပြောကြားခဲ့သည်။

လီသည် ကာကွယ်ရေးထောက်လှမ်းရေးအေဂျင်စီ (DIA) အရာရှိများနှင့် လွှတ်တော်တွင် တံခါးပိတ်ကြားနာစစ်ဆေးမှုပြုလုပ်ခဲ့ပြီးနောက် သတင်းထောက်များကို ပြောကြားခဲ့သည်။

မြောက်ကိုရီးယားသည် ထိုဒုံးပစ်လောင်ချာအသင့်ပြင်ထားသည့်နေရာသို့ ဒုံးကျည်ကို သယ်ယူပို့ဆောင်ခဲ့ဖွယ်ရှိသော်လည်း ဒုံးကျည်ကို လောင်ချာပေါ်တွင် မတင်ရသေးကြောင်း DIA က ယူဆခဲ့သည်ဟု နောက်ထပ်လွှတ်တော်အမတ်ဖြစ်သူ ပါ့ခ်ဆွန်ဝမ်က ပြောကြားခဲ့သည်။

Ref: Reuters

Photos-Reuters/AFP