Top News

COVID-19 အတည်ပြုလူနာ Case-84 နှင့် ထိတွေ့ခဲ့သူ တစ်ဦး ၊ COVID-19 အတည်ပြုလူနာ Case-108 နှင့် ထိတွေ့ခဲ့သူ တစ်ဦး စုစုပေါင်း COVID-19 ပိုးအသစ်တွေ့သူ  နှစ်ဦး ထပ်ထိုးပြီး မြန်မာနိုင်ငံတွင် COVID-19 ရောဂါပိုးတွေ့ရှိသူ စုစုပေါင်း (၁၂၃) ဦးရှိခဲ့ကာ ဓာတ်ခွဲအတည်ပြုလူနာများအနက် ရောဂါပိုးကင်းစင်သူ (၉) ဦးကို ဆေးရုံမှဆင်းခွင့်ပြုခဲ့ကြောင်း ကျန်းမာရေးနှင့်အားကစားဝန်ကြီးဌာန၏ ည ၈ နာရီ ထုတ်ပြန်ချက်အရ သိရသည်။

အဆိုပါထုတ်ပြန်ချက်တွင် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) ၏ (၂၂-၄-၂၀၂၀) ရက်နေ့၊ ညနေတွင် (ပထမအသုတ်) စစ်ဆေးပြီးစီးခဲ့သော ဓာတ်ခွဲနမူနာ (၁၈၀) ခုအနက် (၂) ဦး၏ ဓာတ်ခွဲနမူနာတွင် COVID-19 ရောဂါပိုး တွေ့ရှိပြီး ကျန် (၁၇၈) ခုတွင် COVID-19 ရောဂါပိုး မတွေ့ရှိကြောင်း ပါရှိသည်။

ထို့ပြင် မြန်မာနိုင်ငံရှိ ဓာတ်ခွဲအတည်ပြုလူနာများအနက် ရောဂါပိုးကင်းစင်သူ (၉) ဦး ရှိပြီး ၎င်းတို့အား ဆေးရုံမှဆင်းခွင့်ပြုခဲ့ကာ အသွားအလာ ဆက်လက်ကန့်သတ်ထားရှိပါသည်။ ဓာတ်ခွဲ အတည်ပြုလူနာများအနက် သေဆုံးသူ (၅) ဦးရှိပြီ ဖြစ်ပါသည်။ ကျန်လူနာ (၁၀၉) ဦးအား ဖော်ပြပါ ဇယားအတိုင်း သက်ဆိုင်ရာဆေးရုံများတွင် ဆက်လက်စောင့်ကြည့်ကုသမှုပေးလျက်ရှိပါသည်။ လူနာ (၁၀၉) ဦးအနက် ဝေဘာဂီအထူးကုဆေးရုံကြီးတွင် အထူးကြပ်မတ်ကုသမှုပေးလျက်ရှိသူ (၃) ဦးရှိပြီး ကျန် (၁၀၆) ဦး၏ ကျန်းမာရေးအခြေအနေမှာ သက်သာကောင်းမွန်လျက်ရှိကြောင်း ထုတ်ပြန်ချက်အရ သိရသည်။

ယနေ့ (ဧပြီ ၂၂ ရက်) ပထမအသုတ် ဓာတ်ခွဲစစ်ဆေးမှု၌ တွေ့ရှိရသော လူနာသစ် (၂) ဦးကို သက်ဆိုင်ရာဆေးရုံများသို့ လွှဲပြောင်း၍ သီးခြားထားရှိကုသမှု ပေးသွားမည်ဖြစ်ကြောင်း၊ ဧပြီ ၂၁ ရက်နေ့၊ နေ့လယ် (၁၂:၀၀) နာရီမှ ဧပြီ ၂၂ ရက်နေ့၊ နေ့လယ် (၁၂:၀၀) နာရီအတွင်း တွေ့ရှိရသော စောင့်ကြည့်လူနာအသစ် (၁၂၁)ဦး ရှိကြောင်း ကျန်းမာရေးနှင့်အားကစားဝန်ကြီးဌာန၏ ထုတ်ပြန်ချက်အရ သိရသည်။