Top News

မန္တလေးမြို့တွင် လက်ဖက်ရည်ဆိုင်၀န်ထမ်းတစ်ဦးက ဓားဖြင့်ခုတ်သဖြင့် ဆိုင်ပိုင်ရှင်အမျိုးသမီးနှင့် ဆိုင်၀န်ထမ်း တစ်ဦးသေဆုံးပြီး နှစ်ဦးဒဏ်ရာရရှိ

24htopnews | November 3, 2024 12:12 AM CST

မန္တလေးမြို့တွင် လက်ဖက်ရည်ဆိုင်၀န်ထမ်းတစ်ဦးက အောက်တိုဘာ၂၅ ရက် နံနက် ၂နာရီခန့်တွင်ဓားဖြင့်ခုတ်သဖြင့် ဆိုင်ပိုင်ရှင်နှင့် ဆိုင်၀န်ထမ်းတစ်ဦးသေဆုံးပြီး နှစ်ဦးဒဏ်ရာရရှိခဲ့ကြောင်း သတင်းရရှိသည်။

အောင်မြေသာစံမြို့နယ်၊ ဒေါနဘွားရပ်ကွက် ၁၇လမ်း ၆၃လမ်းနှင့် ၆၄လမ်းကြားရှိ၊ ငွေကောင်းလက်ဘက်ရည်ဆိုင်တွင် အသက် ၁၈ နှစ်အရွယ်ဆိုင်၀န်ထမ်းအမျိုးသားတစ်ဦးက ဆိုင်တွင်းရှိအလုပ်သမားများနှင့် ဆိုင်ပိုင်ရှင်လင်မယားတို့ကို ဓါးဖြင့်ခုတ်သတ်ခဲ့ခြင်းဖြစ်သည်။

အလုပ်သမားဖြစ်တစ်ဦးသူ ရဲပိုင်ရွှေသည် ဆိုင်တွင်အတူတူလုပ်ကိုင်သူ မျိုးထက်အောင်အား စားဖိုမှူးသုံးဓါးဖြင့်ခုတ်ရာ လည်ပင်းတွင်ပြတ်ရှဒဏ်ရာဖြင့်မျိုးထက်အောင် သေဆုံးခဲ့ပြီး အနီးတွင်အိပ်နေသည့် ဆိုင်အလုပ်သမားဖြစ်သူတစ်ဦးအား ဓားဖြင့်ထပ်မံခုတ်ရာ အဆိုပါ ဓားဖြင့်ခုတ်ခံရသည့်

ဆိုင်၀န်ထမ်းက အော်ဟစ်အကူအညီတောင်းခံကြောင်း သိရသည်။

ထိုသို့အော်ဟစ်မှုကြောင့် ဆိုင်အောက်ထပ်ရှိ ဆိုင်ရှင်ဇနီးမောင်နှံရောက်ရှိလာစဉ် ၎င်းတို့ကို ရဲပိုင်ရွှေက ဓားဖြင့်ထပ်မံခုတ်ခဲ့ရာ ဆိုင်ရှင်ဇနီးမောင်နှံအနက်အမျိုသမီးဖြစ်သူမှာ လည်ပင်းတွင်ပြတ်ရှဒဏ်ရာရှိသဖြင့် ဆေးရုံသို့ပို့ဆောင်စဥ် သေဆုံးခဲ့ပြီး အမျိုးသားဖြစ်သူမှာ ပခုံး၊ လက်မောင်းနှင့် နှာခေါင်းတို့တွင် ပြတ်ရှဒဏ်ရာများ အသီးသီးရရှိခဲ့ကြောင်း သိရသည်။

ထိုသို့ ဓားဖြင့်ခုတ်သတ်မှု ကျူးလွန်ခဲ့သူ ရဲပိုင်ရွှေသည် အခင်းဖြစ်ပွားပြီးနောက် တိမ်းရှောင်ထွက်ပြေးသဖြင့် သက်ဆိုင်ရာက ရှာဖွေဖမ်းဆီးရာတည်းခိုခန်းတစ်ခုတွင် ဖမ်းဆီးရမိခဲ့ကြောင်း သိရသည်။