Top News

စစ်ကိုင်းတိုင်း​ဒေသကြီး၊ မုံရွာခရိုင်၊ မုံရွာမြို့နယ်တွင် စက်တင်ဘာ ၂၃ ရက် နံနက်ပိုင်းက လက်ကိုကြိုးဖြင့်တုပ်၍ ပီနံအိတ်အတွင်းထည့်ကာ ဓာတ်ဆီ​လောင်းမီးရှို့သတ်ဖြတ်ခံထားရသည့် အသက် (၂၀) ဝန်းကျင်အရွယ်ရှိ အမျိုးသမီးတစ်ဦး၏ ရုပ်အ​လောင်း​တွေ့ရှိခဲ့​ကြောင်း မြန်မာနိုင်ငံလူမှုကယ်ဆယ်ရေးအဖွဲ့(မုံရွာ)ထံမှ စုံစမ်းသိရသည်။

အဆိုပါအမျိုးသမီးတစ်ဦး၏ ရုပ်အ​လောင်းကို မုံရွာမြို့ စက်မှုဇုန်အနီး မြို့ပတ်လမ်း​ဘေး၌ လက်အားကြိုးဖြင့်တုပ်ထားပြီး ဦး​ခေါင်းဒဏ်ရာနှင့် ပီနံအိတ်အတွင်းထည့်ကာ ဓာတ်ဆီ​လောင်၍ မီးရှို့သတ်ဖြတ်ခံထားရသည်ကို ​တွေ့ရှိခဲ့ရ​ကြောင်း အထက်ပါလူမှုကယ်ဆယ်​ရေးအဖွဲ့ထံမှ သိရသည်။

“ကျွန်​တော်တို့အဖွဲ့ ဖုန်းသတင်းရလို့ထွက်ခွာတာက မနက်(စက်တင်ဘာ ၂၃ ရက်) ၉ နာရီ ၄၀ မိနစ်လောက်မှာဖြစ်ပါတယ်။ အမျိုးသမီးရဲ့အသက်က​တော့ ခန့်မှန်း​ခြေအသက် ၂၀ ​ဝန်းကျင်အရွယ်လို့ ခန့်မှန်းရပါတယ်။ သူ့ကို လက်မှာကြိုးနဲ့တုပ်ထားတယ်။ ဦး​ခေါင်းမှာလည်း ရိုက်နှက်ခံထားရတဲ့ပုံစံနဲ့ ဒဏ်ရာ​တွေ့ရတယ်။ ပီနံအိတ်ထဲမှာထည့်ပြီး​တော့ ဓာတ်ဆီ​လောင်းပြီး မီးရှို့ထားတာ​တွေ့ရပါတယ်။ ဓာတ်ဆီ​လောင်းပြီး​တော့ မီးရှို့ထား​ခဲ့ပေမယ့် မုံရွာမှာညကမိုးရွာ​နေ​တော့ သူ့ရဲ့ခန္ဓာကိုယ်ကိုအကုန်​လောင်မသွားတာကိုလည်း ​တွေ့ရပါတယ်။ သူ့ရဲ့မျက်နှာက​တော့ မီး​လောင်ထား​တော့ ကွဲကွဲပြားပြားမသိရ​တော့ပါဘူး” ဟု မြန်မာနိုင်ငံလူမှုကယ်ဆယ်​ရေးအဖွဲ့(မုံရွာ)မှ တာဝန်ရှိသူတစ်ဦးက ​ပြောကြားသည်။

အဆိုပါမီးရှို့သတ်ဖြတ်ခံထားရသည့် အမျိုးသမီးရုပ်အ​လောင်းကို မုံရွာပြည်သူ့​ဆေးရုံကြီး ရင်ခွဲရုံသို့မြန်မာနိုင်ငံလူမှုကယ်ဆယ်​ရေးအဖွဲ့(မုံရွာ)မှ ကူညီပို့​ဆောင်​ပေးခဲ့​ကြောင်း သိရသည်။ အဆိုပါ အမည်မသိအမျိုးသမီးတစ်ဦး(စိစစ်ဆဲ)သတ်ဖြတ်ခံခဲ့ရသည့် လူသတ်မှုဖြစ်စဉ်နှင့်ပတ်သက်၍ သက်ဆိုင်ရာတာဝန်ရှိသူများမှ စုံစမ်းစစ်​ဆေး​ဆောင်ရွက်လျက်ရှိ​ကြောင်းလည်း သိရသည်။