Top News

Online ပေါ်တွင် နိုင်ငံရေးအကြောင်းအရာများ ဝေဖန် ပြောဆိုမှုများ ပြုလုပ်သည့် ဦးငါးမင်းဆွေ ရာဇသတ်ကြီး ပုဒ်မ ၅၀၅(က) ဖြင့် အမှုဖွင့် ဖမ်းဆီးခံရကြောင်း သိရသည်။

ရန်ကုန်တိုင်းဒေသကြီး၊ လှိုင်မြို့နယ်ရဲစခန်း၌ ရာဇသတ်ကြီးပုဒ်မ ၅၀၅ (က) ဖြင့် ဦးငါးမင်းဆွေ အား အမှုထားခြင်းဖြစ်ပြီး ယနေ့(နိုဝင်ဘာ ၉ ရက်)တွင် မွန်ပြည်နယ်၊ ကျိုက်ထိုရဲစခန်းမှ ၎င်းအား ဖမ်းဆီးလိုက်ခြင်းဖြစ်ကြောင်း သိရသည်။

ဖမ်းဆီးခံရသည့် ကိစ္စနှင့်ပတ်သက်၍ ဦးငါးမင်းဆွေက " ကျွန်တော် နှုတ်ဆက်စကားလေးပေါ့ဗျာ။ ကျွန်တော်ကို အခု ကျိုက်ထိုရဲစခန်းက စခန်းမှူး​က လာခေါ်တယ်ဗျ။ လာခေါ်ရတဲ့အကြောင်းက ရန်ကုန် လှိုင်မြို့နယ်မှာ ကျွန်တော်ကို ၅၀၅(က)နဲ့ အမှုဖွင့်ထားပါတယ်တဲ့။ အဲ့ဒီကိစ္စနဲ့ ကျွန်တော်ကို လာခေါ်တာပေါ့ဗျာ။ ကျွန်တော်ကို ရန်ကုန် ပို့မှာပေါ့။ ၅၀၅(က)နဲ့ ကျွန်တော်ကို တရားစွဲထားတယ်ဗျ။ အဲ့လိုတော့ အကြမ်းဖျင်း သိရတယ်။ အသေးစိတ်တော့ ဘာမှမသိဘူး။ ကျွန်တော်ကို လာခေါ်ပြီ။ ကျွန်တော် လိုက်သွားရတော့မယ်ဗျ။ ချစ်လှစွာသော မြန်မာများ အားလုံးကို ကျွန်တော် နှုတ်ဆက်ပါတယ်။ မြန်မာပြည်ကြီး အမြန်ဆုံး ငြိမ်းချမ်းပါစေ။ ကျွန်တော်က ငြိမ်းချမ်းရေးပဲ လုပ်တာပါ" ဟု ၎င်း၏ Tik Tok အကောင့်တွင် ပြောကြားထားသည်။

ပြီးခဲ့သည့် NLD အစိုးရလက်ထက်ကလည်း ဒေါ်အောင်ဆန်းစုကြည်အား ဝေဖန်ပြောဆိုရေးသားမှုများကြောင့် ဦးမင်းဆွေ(ခ)ငါးမင်းဆွေသည်နိုင်ငံတော်အကြည်ညိုပျက်စေမှု ပုဒ်မ ၁၂၄ (က) ဖြင့် တရားစွဲခံရကာ ၂၀၁၈ ခုနှစ် စက်တင်ဘာလအတွင်းတွင် ထောင်ဒဏ်( ၇)နှစ်နှင့် ဒဏ်ငွေ ကျပ် တစ်သိန်း ပြစ်ဒဏ်ချမှတ်ခံခဲ့ရကြောင်း သိရသည်။

၎င်းသည် နစက အစိုးရလက်ထက် ၂၀၂၁ ခုနှစ်အတွင်းတွင် လွတ်ငြိမ်းသက်သာခွင့်ရရှိကာ ပြန်လွတ်မြောက်လာသူဖြစ်ကြောင်းလည်း သိရသည်။

ထိုသို့ဦးငါးမင်းဆွေအား အမှုဖွင့်ဖမ်းဆီးမှုနှင့်ပတ်သက်၍ နစက သတင်းထုတ်ပြန်ရေးအဖွဲ့က တစ်စုံတစ်ရာထုတ်ပြန်ထားခြင်းမရှိသေးပေ။