Top News

လီဗာပူးလ်အသင်းသည် ပရီးမီးယားလိဂ်ပြိုင်ပွဲတွင် မန်စီးတီးကို (၅)မှတ်ဖြတ်ဦးဆောင်ထားပြီးနောက် ချန်ပီယံဖြစ်နိုင်ခြေ (၅၉.၃)ရာခိုင်နှုန်းဖြင့် ရေပန်းအစားဆုံးဖြစ်လာကြောင်း Opta ၏ စူပါကွန်ပျူတာက ခန့်မှန်းထုတ်ပြန်ခဲ့သည်။

နိုဝင်ဘာ နိုင်ငံတကာရက်သတ္တပတ်မတိုင်မီ ပရီးမီးယားလိဂ် ပွဲစဉ်(၁၁) ယှဉ်ပြိုင်ကစားအပြီးတွင် လီဗာပူးလ်အသင်းက (၂၈)မှတ်ဖြင့် ဦးဆောင်နေပြီး နောက်ဆုံးလေးနှစ် ဆက်ချန်ပီယံ မန်စီးတီးအသင်းကို (၅)မှတ်ဖြတ်ထားနိုင်ပြီ ဖြစ်သည်။ လီဗာပူးလ်အသင်းသည် နည်းပြသစ် အာနယ်ဆလော့လက်ထက်တွင် အကောင်းဆုံးပုံစံရရှိနေပြီး ကိုးပွဲနိုင်၊ တစ်ပွဲသရေ၊ တစ်ပွဲသာ ရှုံးနိမ့်ထားသလို (၂၁)ဂိုးသွင်းယူကာ ခြောက်ဂိုးသာ ပြန်လည်ခွင့်ပြုထားရသည်။

ထို့ကြောင့် Opta ၏ စူပါကွန်ပျူတာက ရာသီကြိုကာလ ချန်ပီယံဖြစ်နိုင်ခြေရာခိုင်နှုန်းနှင့် ပွဲစဉ် (၁၁)အပြီး ချန်ပီယံ ဖြစ်နိုင်ခြေရာခိုင်နှုန်းကို နှိုင်းယှဉ်ထုတ်ပြန်ခဲ့ခြင်းဖြစ်သည်။ ၂၀၂၄-၂၀၂၅ ရာသီ မစတင်မီ မန်စီးတီးအသင်းက ချန်ပီယံ ဖြစ်နိုင်ခြေ (၈၂.၂)ရာခိုင်နှုန်းဖြင့် ငါးနှစ်ဆက် ဗိုလ်စွဲရန် ရေပန်းအစားဆုံး သတ်မှတ်ခံခဲ့ရပြီး အာဆင်နယ်အသင်းက (၁၂.၂)ရာခိုင်နှုန်းဖြင့် ဒုတိယ၊ လီဗာပူးလ်အသင်းက (၅.၁) ရာခိုင်နှုန်းဖြင့် တတိယနေရာသာ သတ်မှတ်ခံခဲ့ရသည်။ 

သို့ သော် ပွဲစဉ် (၁၁)အပြီးတွင် လီဗာပူးလ်အသင်းက ချန်ပီယံဖြစ်နိုင်ခြေ (၅၉.၃)ရာခိုင်နှုန်းဖြင့် ရေပန်းအစားဆုံးဖြစ်လာပြီး မန်စီးတီးအသင်းက (၃၆.၂)ရာခိုင်နှုန်းဖြင့် ဒုတိယ၊ အာဆင်နယ်အသင်းက (၄.၁)ရာခိုင်နှုန်းဖြင့် တတိယနေရာသို့ ရောက်ရှိသွားကြောင်း သိရသည်။

သို့ဖြစ်ရာ လီဗာပူးလ်အသင်း၏ ချန်ပီယံဖြစ်နိုင်ခြေမှာ ရာသီမစတင်မီအချိန်နှင့် နှိုင်းယှဉ်ပါက (၅၄.၂)ရာခိုင်နှုန်း အထိ မြင့်တက်လာခြင်းဖြစ်သည်။ ရှုံးပွဲဆက်နေသည့် မန်စီးတီးအသင်းမှာမူ ချန်ပီယံဖြစ်နိုင်ခြေ (၄၆)ရာခိုင်နှုန်း ကျဆင်းသွားပြီး အာဆင်နယ်အသင်းမှာလည်း (၈.၁)ရာခိုင်နှုန်း ကျဆင်းသွားသည်။ နာမည်ကြီး လောင်းကစားကုမ္ပဏီများ၏ အလေးပေးမှုစာရင်းတွင်လည်း လီဗာပူးလ်အသင်းက ၆း၅ ဖြင့် ရေပန်းအစားဆုံးဖြစ်လာပြီး မန်စီးတီးအသင်းက ၂း၁၊ အာဆင်နယ်အသင်းက ၄း၁၊ ချယ်လ်ဆီးအသင်းက ၂ဝး၁ သတ်မှတ်ခံထားရသည်။

နိုင်ငံတကာရက်သတ္တပတ်ပြီးနောက် ပရီးမီးယားလိဂ် ပွဲစဉ် (၁၂) ကို နိုဝင်ဘာ (၂၃၊ ၂၄၊ ၂၅)ရက်တွင် ပြန်လည်ယှဉ်ပြိုင်ကစားမည်ဖြစ်သည်။