Top News

မန်ယူနည်းပြ တန်ဟက်ဂ်က အသင်းတောင်ပံကစားသမား ဆန်ချို၏ အနာဂတ်နှင့်ပတ်သက်ပြီး ဆွေးနွေးရန် ငြင်းဆန်ခဲ့ပြီး အသင်းအတွက် ကစားနိုင်ခြင်းမရှိသည့် ကစားသမားအကြောင်း မပြောလိုကြောင်း ပြောကြားခဲ့သည်။

အသက် (၂၃) နှစ်အရွယ်ရှိ အင်္ဂလန်တောင်ပံကစားသမား ဆန်ချိုသည် အာဆင်နယ်အား (၁-၃) ဂိုးဖြင့် ရှုံးနိမ့်သည့်ပွဲတွင် အသင်းလူစာရင်း၌ မပါဝင်ခြင်းနှင့်ပတ်သက်ပြီး တန်ဟက်ဂ်၏ ပြောဆိုမှုများမှာ မဟုတ်မှန်ကြောင်း လူမှုကွန်ရက်တွင် ဖြေရှင်းပြီးနောက် တန်ဟက်ဂ်နှင့် ဆက်ဆံရေး အဆင်မပြေဖြစ်နေသည်။

ယင်းနောက်တွင် မန်ယူအသင်းတာဝန်ရှိသူများက ဆန်ချိုအား တန်ဟက်ဂ်ကို တောင်းပန်ရန် ညွှန်ကြားခဲ့သော်လည်း ကစားသမားအနေဖြင့် တောင်းပန်ခြင်းမရှိသည့်အတွက် အသင်းကြီးနှင့်ပူးပေါင်းခွင့် ပိတ်ပင်ခံထားရပြီး လေ့ကျင့်မှုများကိုလည်း တစ်ဦးတည်းပြုလုပ်နေရကြောင်း သိရှိရသည်။

ထို့ပြင် ဂျာမန်သတင်းစာများ၏ ဖော်ပြချက်အရ ဆန်ချိုသည် Xbox ဂိမ်းစ်များကို ညမအိပ်ဘဲ ကစားလေ့ရှိသည့်အတွက် ကစားသမားဘဝအပေါ် ထိခိုက်မှုများရှိနေကြောင်း သိရှိရသည်။ ခရစ္စတယ်ပဲလေ့စ်အား (၃-ဝ) ဂိုးဖြင့် အနိုင်ရသည့်ပွဲအပြီး ပြုလုပ်သည့် သတင်းစားရှင်းလင်းပွဲတွင် သတင်းထောက်များက ဆန်ချို Xbox ဂိမ်းစ်ကစားခြင်းကို သိသလားဟု မေးမြန်းခဲ့ရာ တန်ဟက်ဂ်က ၎င်းအကြောင်း မပြောလိုကြောင်း ပြန်ဖြေခဲ့ခြင်းဖြစ်သည်။

တန်ဟက်ဂ်က "ပုဂ္ဂိုလ်ရေးအကြောင်းတွေကို ကျွန်တော် မပြောချင်ပါဘူး။ ပြီးတော့ အသင်းအတွက် မကစားနိုင်တဲ့ ကစားသမားတွေအကြောင်းကို ကျွန်တော် မပြောချင်ပါဘူး" ဟု ပြောကြားခဲ့သည်။ ထို့ပြင် ဆန်ချိုအနေဖြင့် ၎င်း၏ Instagram အကောင့်ကို Deactive လုပ်ခြင်းနှင့်ပတ်သက်ပြီး သတင်းထောက်တစ်ဦး၏ မေးမြန်းမှုကိုလည်း တန်ဟက်ဂ်က "အဲဒီကိစ္စကို ကျွန်တော် မသိပါဘူး။ ဒါက သူ့ကိစ္စပါ။ ကျွန်တော့်အနေနဲ့ အသင်းလူစာရင်းမှာ မပါဝင်တဲ့ ကစားသမားတွေအကြောင်းကို မှတ်ချက်မပေးချင်ပါဘူး" ဟု ပြောကြားခဲ့သည်။