Top News

ဝင်ဘယ်လ်ဒန်ချန်ပီယံရှစ် ဂရင်းစလင်းတင်းနစ်ပြိုင်ပွဲ အမျိုးသမီးတစ်ဦးချင်း ဗိုလ်လုပွဲသို့ တူနီးရှားတင်းနစ်မယ် အွန်ယာဘာနှင့် ကာဇက်စတန်တင်းနစ်မယ် အယ်လီနာရီဘက်ကီနာတို့ တက်ရောက်ခဲ့ပြီး နှစ်ဦးစလုံး ဗိုလ်လုပွဲသို့ ပထမဆုံးအကြိမ် တက်ရောက်နိုင်ခြင်းဖြစ်သောကြောင့် ချန်ပီယံသစ်ထွက်ပေါ်မည်ဖြစ်ကြောင်း သိရသည်။

    

ကြာသပတေးနေ့က ယှဉ်ပြိုင်ကစားသည့် ဆီမီးဖိုင်နယ်ပွဲစဉ်များတွင် ယာဘာ (ဆီဒင် ၃)က ဂျာမနီတင်းနစ်မယ် မာရီယာ (ဆီဒင်မဲ့) ကို ၆-၂၊ ၃-၆၊ ၆-၁ ဖြင့်လည်းကောင်း၊ ရီဘက်ကီနာ (ဆီဒင် ၁၇) က ၂၀၁၉ ချန်ပီယံဟောင်း ရိုမေးနီးယားတင်းနစ်မယ် ဟာလပ် (ဆီဒင် ၁၆) ကို ၆-၃၊ ၆-၃ ဖြင့်လည်းကောင်း အနိုင်ရခဲ့သည်။ 

ယာဘာ (၂၇ နှစ်) နှင့် ရီဘက်ကီနာ (၂၃ နှစ်) တို့ နှစ်ဦးစလုံးမှာ ကစားသမားဘဝတစ်လျှောက် ဂရင်းစလင်းပြိုင်ပွဲ ဗိုလ်လုပွဲသို့ ပထမဆုံးအကြိမ် တက်ရောက်နိုင်ခြင်းဖြစ်သောကြောင့် ချန်ပီယံသစ်ထွက်ပေါ်မည်ဖြစ်ပြီး ၂၀၀၉ ခုနှစ်နောက်ပိုင်း ဥရောပတိုက်မှမဟုတ်သူနှစ်ဦး ပထမဆုံးယှဉ်ပြိုင်ရမည့် ဗိုလ်လုပွဲအဖြစ် မှတ်တမ်းဝင်မည်ဖြစ်သည်။

    

ထို့ပြင် တူနီးရှားနိုင်ငံသူ ယာဘာအနေဖြင့် မေဂျာပြိုင်ပွဲတစ်ခု၏ တစ်ဦးချင်းဗိုလ်လုပွဲသို့ ပထမဆုံးတက်ရောက်နိုင်သည့် အာရပ်ကစားသမားအဖြစ်လည်းကောင်း၊ ဝင်ဘယ်လ်ဒန်ဗိုလ်လုပွဲရောက်ရှိသည့် ဒုတိယမြောက် အာဖရိကတင်းနစ်မယ်အဖြစ်လည်းကောင်း၊ မေဂျာဗိုလ်လုပွဲတက်ရောက်နိုင်သည့် စတုတ္ထမြောက် အာဖရိကတင်းနစ်မယ်အဖြစ်လည်းကောင်း မှတ်တမ်းဝင်မည်ဖြစ်သည်။ 

ရုရှားနိုင်ငံဖွား ကာဇက်စတန်နိုင်ငံသူ ရီဘက်ကီနာမှာလည်း မေဂျာဗိုလ်လုပွဲတက်ရောက်နိုင်သည့် ပထမဆုံး ကာဇက်စတန်ကစားသမားအဖြစ် မှတ်တမ်းဝင်မည်ဖြစ်ကြောင်း သိရသည်။  ၎င်းတို့နှစ်ဦး ယှဉ်ပြိုင်ကစားမည့် ဗိုလ်လုပွဲကို ယနေ့ (စနေနေ့) မြန်မာစံတော်ချိန် ည ၇ နာရီခွဲတွင် ကျင်းပမည်ဖြစ်သည်။