Top News

မွန်ပြည်နယ်၌ ဒီဇင်ဘာ ၈ ရက်နှင့် ၉ ရက် နှစ်ရက်တာအတွင်း COVID-19 လူနာ သုံးဦးသေဆုံးခဲ့ပြီး သေဆုံးသူ စုစုပေါင်း ၁၇ ဦးအထိရှိလာကြောင်း ပြည်နယ်ပြည်သူ့ ကျန်းမာရေး ဦးစီးဌာန၏ ထုတ်ပြန်ချက်များအရ သိရသည်။

“သေဆုံးခဲ့တဲ့ Positive လူနာသုံးဦးမှာ တစ်ဦးက မော်လမြိုင်မြို့၊ ဇေယျာသီရိရပ်ကွက်က ထွန်းမြတ်စေတနာ ပရဟိတ လူမှုကူညီ ကယ်ဆယ်ရေးအသင်းက အသင်းသားတစ်ဦး ဖြစ်ပါတယ်။ သူက ဆေးရုံလာတက်တယ်။ ဒီဇင်ဘာလ ၈ ရက် မနက်ပိုင်းမှာ ဆုံးသွားတယ်ပေါ့။ အဲ့ဒီမှာ ဆေးစစ်ကြည့်တဲ့အခါမှာ Positive တွေ့ရတာပါ။ သူ့အတွက် ကျွန်တော်တို့လည်း အရမ်းကို စိတ်မကောင်း ဖြစ်ရပါတယ်။ နောက်တစ်ယောက်က သထုံမြို့၊ လိပ်အင်းရပ်ကွက်က အမျိုးသား တစ်ဦးပါ။ မော်လမြိုင်ပြည်သူ့ဆေးရုံကြီးမှာ ဆေးကုသမှု ခံယူနေသူ ဖြစ်ပါတယ်။ သူက ဒီဇင်ဘာလ ၈ ရက် ည ၁၁ နာရီလောက်မှာ ဆုံးသွားတာပါ” ဟု မော်လမြိုင် အရေးပေါ် လူမှုကူညီ ကယ်ဆယ်ရေးကွန်ရက် ဒုဥက္ကဋ္ဌဖြစ်သူ ကိုဇင်မိုးက ပြောကြားသည်။

၎င်းကဆက်လက်ပြီး “နောက်ထပ်တစ်ဦးမှာ မော်လမြိုင်မြို့ ပန်းဘဲတန်း ရပ်ကွက်ကပါ။ သူ့ကို သံသယလူနာ အဖြစ်နဲ့ PUI ထဲမှာ ဆေးကုသမှု ခံယူနေရသူပါ။ ညက ပြည်နယ်ပြည်သူ့ ကျန်းမာရေးဦးစီးဌာနက ထုတ်ပြန်တဲ့ Positive လူနာစာရင်းထဲမှာ ပါလာတယ်။ ဒီမနက် (ဒီဇင်ဘာ ၉ ရက်) ၅ နာရီလောက်မှာ ဆုံးသွားပါတယ်။ သုံးယောက်လုံးကို Covid နာရေးပုံစံအတွင်း သဂြိုလ်ပေးထားပါတယ်” ဟု ပြောကြားသည်။

Positive လူနာများ သေဆုံးမှုနှင့် ပတ်သက်ပြီး အရှေ့ပိုင်းတွင် ကင်ဆာရောဂါ၊ အရေပြားရောဂါ၊ လေးဘက်နာရောဂါ စသည်ဖြင့် ရောဂါအခံရှိသူများ သေဆုံးမှုများကြောင်း၊ နောက်ပိုင်းတွင် ဆီးချိုရောဂါသည်၊ ကျောက်ကပ်ရောဂါ စသည်ဖြင့် သေဆုံးသူများလည်း ရှိကြောင်းနှင့် ရောဂါအခံရှိသူများ COVID-19 ကူးစက်ကပ်ရောဂါ ကူးစက်ဖြစ်ပွားမှု မရှိစေရန် သတိထား နေထိုင်သင့်ကြောင်း ပြည်နယ်ပြည်သူ့ ကျန်းမာရေး ဦးစီးဌာန ဒုပြည်နယ်ဦးစီးမှူး (စီမံ/ဘဏ္ဍာ) ဒေါက်တာဝတ်မှုံက ပြောကြားသည်။

"အရင်ကဆိုရင် COVID-19 Positive ဖြစ်တဲ့သူတွေမှာ ရောဂါအခံရှိနေရင် သေဆုံးနိုင်ချေ များတယ်။ အခုနောက်ပိုင်းမှာဆိုရင် ဆီးချို၊ သွေးချိုရောဂါအခံ ရှိသူတွေလည်း သေဆုံးလာတာတွေ ရှိပါတယ်။ အဲ့ဒီအတွက်ကြောင့် ကျန်းမာရေးကိုလည်း အထူးဂရုစိုက်ကြဖို့နဲ့ ပိုးကူးစက် မခံရအောင်လည်း နေထိုင်ကြဖို့ တိုက်တွန်းချင်ပါတယ်” ဟု ဒေါက်တာဝတ်မှုံက ဆက်လက်ပြောကြားသည်။

မွန်ပြည်နယ်အတွင်း COVID-19 ကူးစက်ကပ်ရောဂါနှင့် ပတ်သက်ပြီး Positive လူနာ စတင်တွေ့ရှိခဲ့သည့် ဧပြီလ ၈ ရက်မှ ဒီဇင်ဘာလ ၈ ရက်အထိ မွန်ပြည်နယ် အပါအဝင် အခြားပြည်နယ်နှင့် တိုင်းဒေသကြီးများမှ Positive လူနာစုစုပေါင်း ၁၈၆၈ ဦးအထိရှိပြီး ရောဂါသက်သာ ပျောက်ကင်းသွားသည့်အတွက် ဆေးရုံမှ ဆင်းခွင့်ရသူ အရေအတွက်မှာ ၁၅၂၅ ဦးရှိကြောင်း ပြည်နယ် ပြည်သူ့ကျန်းမာရေး ဦးစီးဌာန၏ ထုတ်ပြန်ချက်များအရ သိရသည်။