Top News

ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) သို့ တရုတ်နိုင်ငံက နိုဝင်ဘာ ၁၀ ရက်တွင် အမေရိကန်ဒေါ်လာသုံးသိန်း လာရောက်လှူဒါန်းခဲ့ပြီး တရုတ်နိုင်ငံအနေဖြင့် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်ကို ဆက်လက်အားပေးထောက်ခံနေကြောင်း တရုတ်နိုင်ငံ နိုင်ငံခြားရေးဝန်ကြီးဌာန အာရှရေးရာအထူး ကိုယ်စားလှယ် မစ္စတာဆွန်ကော့ရှန်က ပြောကြားသည်။

ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် JMC-Uဥက္ကဋ္ဌ ဒုတိယဗိုလ်ချုပ်ကြီး ရာပြည့်နှင့် အာရှရေးရာအထူးကိုယ်စားလှယ် မစ္စတာဆွန်ကော့ရှန်တို့ နိုဝင်ဘာ ၁၀ ရက် မွန်းလွဲပိုင်းတွင် တွေ့ဆုံခဲ့ကြပြီး အဆိုပါတွေ့ဆုံမှုတွင် အာရှရေးရာအထူးကိုယ်စားလှယ် မစ္စတာဆွန်ကော့ရှန်က ထိုသို့ထည့်သွင်းပြောကြားခဲ့ခြင်းဖြစ်ကြောင်း အဆိုပါတွေ့ ဆုံပွဲနှင့်ပတ်သက်၍ သတင်းထုတ်ပြန်ရာတွင် JMC က ဖော်ပြခဲ့သည်။

JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်နှင့် တရုတ်နိုင်ငံ နိုင်ငံခြားရေးဝန်ကြီး ဌာန အာရှရေးရာအထူးကိုယ်စားလှယ် မစ္စတာဆွန်ကော့ရှန်တို့၏ တွေ့ဆုံမှုတွင် တစ် နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် လက်မှတ်ရေးထိုးထားပြီးသော တိုင်းရင်းသားလက်နက်ကိုင်အဖွဲ့ အစည်းများနှင့်အတူ ဆောင်ရွက်လျက်ရှိသည့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ အဆင့်ဆင့်၏ လုပ်ငန်းဆောင်ရွက်မှု အခြေအနေများအား ဆွေးနွေးခဲ့ကြကြောင်း သိရသည်။

တရုတ်အစိုးရက တရုတ်-မြန်မာ ချစ်ကြည်ရေးကို ရှေးရှု၍ ပစ်ခတ်တိုက်ခိုက်မှုရပ် စဲရေးဆိုင်ရာပူးတွဲစောင့်ကြည့် ရေးကော်မတီအား ပံ့ပိုးကူညီမှုအဖြစ် အမေရိကန်ဒေါ်လာ သုံးသိန်းကို မစ္စတာဆွန်ကော့ရှန်က ပေးအပ်လှူဒါန်းခဲ့ရာ JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်နှင့် ကော်မတီဝင်များက လက်ခံရယူခဲ့ပြီး ကျေးဇူးတင်စကား ပြန်လည်ပြောကြားခဲ့ကြောင်း သိရသည်။

ယခုတွေ့ဆုံပွဲသို့ ဒုတိယဗိုလ်ချုပ်ကြီး ရာပြည့် ဦးဆောင်သော JMC-U ကော်မတီဝင်များ၊ တရုတ်နိုင်ငံခြားရေးဝန်ကြီးဌာန အာရှရေးရာအထူးကိုယ်စားလှယ် မစ္စတာ ဆွန်ကော့ရှန် ဦးဆောင်သော ကိုယ်စားလှယ် အဖွဲ့ဝင်များနှင့် မြန်မာနိုင်ငံဆိုင်ရာ တရုတ်သံရုံးမှ တာဝန်ရှိသူများ တက်ရောက်ခဲ့ကြကြောင်း သိရသည်။

တရုတ်နိုင်ငံခြားရေးဝန်ကြီးဌာန အာရှရေးရာ အထူးကိုယ်စားလှယ် မစ္စတာဆွန်ကော့ရှန် ဦးဆောင်သော တရုတ်နိုင်ငံကိုယ်စားလှယ်အဖွဲ့သည် နိုဝင်ဘာ ၉ ရက်တွင် နေပြည်တော်ရှိ နိုင်ငံတော်အတိုင်ပင်ခံရုံး ဝန် ကြီးဌာနတွင် NRPC ဒုတိယဥက္ကဋ္ဌ ပြည်ထောင်စုဝန်ကြီး ဦးကျော်တင့်ဆွေနှင့် တွေ့ဆုံခဲ့ပြီး ထိုသို့တွေ့ဆုံရာတွင်လည်း NRPC သို့ တရုတ်နိုင်ငံက အမေရိကန်ဒေါ်လာသုံးသိန်း လှူဒါန်းခဲ့သည်။

ထို့ပြင် ငြိမ်းချမ်းရေးကော်ရှင်ဥက္ကဋ္ဌ ဒေါက်တာတင်မျိုးဝင်းနှင့် တရုတ်နိုင်ငံခြားရေးဝန်ကြီးဌာန အာရှရေးရာအထူးကိုယ်စားလှယ် မစ္စတာဆွန်ကော့ရှန်တို့သည် နိုဝင်ဘာ ၈ ရက်ကလည်း နေပြည်တော်ရှိ အမျိုး သားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် တွေ့ဆုံခဲ့ကြပြီး ထို သို့တွေ့ဆုံရာတွင်လည်း တရုတ်နိုင်ငံက ငြိမ်းချမ်းရေးကော်မရှင်အတွက် အမေရိကန်ဒေါ်လာသုံးသိန်း လှူဒါန်းခဲ့သည်။