Top News

ရန်ကုန်တိုင်း မြောက်ပိုင်းခရိုင် ရွေးကောက်ပွဲကော်မရှင်အဖွဲ့ခွဲဥက္ကဌ အပါအဝင် အခြားခရိုင်များမှ ရွေးကောက်ပွဲကော်မရှင်အဖွဲ့ဝင်များနှင့် မိသားစုဝင်များစုစုပေါင်း ၈၃ ဦး COVID-19 ရောဂါပိုး ကူးစက်ခံရကြောင်း ရန်ကုန်တိုင်းဒေသကြီး ရွေးကောက်ပွဲကော်မရှင်အဖွဲ့ခွဲမှ အတွင်းရေးမှူး ဦးတင်မောင်အေးက ပြောကြားသည်။

လက်ရှိတွင် ရောဂါပိုးကူးစက်ခံရသူများကို ပြုစုစောင့်ရှောက်မှုများပေးနေပြီး ကျန်းမာရေးနှင့် အားကစားဝန်ကြီးဌာန၏ ညွှန်ကြားမှုများအတိုင်း ဆောင်ရွက်လျက်ရှိကြောင်း ဦးတင်မောင်အေးက ပြောကြားသည်။

“ရောဂါကူးစက်ခံရတဲ့သူတွေကိုတော့ သက်ဆိုင်ရာကုသရေးစင်တာတွေမှာ ကုသပေးနေပါတယ်။ ကျန်းမာရေးဝန်ကြီးဌာနရဲ့ ညွန်ကြားချက်အတိုင်း ဆောင်ရွက်နေတယ်” ဟု အတွင်းရေးမှူး ဦးတင်မောင်အေးကပြော ကြားသည်။

ယင်းသို့ ရွေးကောက်ပွဲကော်မရှင်အဖွဲ့ဝင်များ ရောဂါပိုးကူးစက်ခံရခြင်းကြောင့် Quarantine ဝင်နေပြီး စစ်ဆေးမှုများ ပြုလုပ်ခဲ့ရာ နှစ်ကြိမ်တိတိ Negative အဖြစ်ထွက်ရှိကြောင်း ရန်ကုန်တိုင်းဒေသကြီး ရွေးကောက်ပွဲကော်မရှင်အဖွဲ့ခွဲဥက္ကဌ ဦးကြည်မြင့်က ပြောကြားသည်။

“နှစ်ကြိမ်စလုံး ပြတယ်။ ဒါပေမဲ့ ထိတွေ့ခဲ့သူဖြစ်တော့ Quarantine ဝင်နေပါတယ်။ ကျန်တာကိုတော့ အတွင်းရေးမှူးကို မေးလိုက်ပါ” ဟု ဥက္ကဌဦးကြည်မြင့်က ပြောကြားသည်။

ရောဂါပိုးကူးစက်ခံရသူများမှာ ရန်ကုန်တိုင်းဒေသကြီးအတွင်းရှိ မြောက်ပိုင်းခရိုင် ရွေးကောက်ပွဲကော်မရှင်ဥက္ကဌ၊ အခြားမြို့နယ်များမှ ဥက္ကဌများလည်းပါဝင်ပြီး ၎င်းတို့၏ မိသားစုဝင်များ၊ မဲရုံဝန်ထမ်းများလည်း ပါဝင်ကြောင်း ရန်ကုန်တိုင်းဒေသကြီး ရွေး ကောက်ပွဲကော်မရှင်အဖွဲ့ခွဲမှ ထုတ်ပြန်ချက်များအရ သိရသည်။

ရောဂါပိုးကူးစက်ခံရသည့် မြောက်ပိုင်းခရိုင် ရွေးကောက်ပွဲကော်မရှင်ဥက္ကဌမှာ ရွေးကောက်ပွဲနေ့နှင့် ရွေးကောက်ပွဲအပြီးတွင် ရောဂါပိုးကူးစက်ခံရခြင်းဖြစ်ကြောင်း ကော်မရှင်အဖွဲ့ခွဲ၏ ထုတ်ပြန်ချက်တွင် ဖော်ပြထားသည်။

ရန်ကုန်တိုင်းဒေသကြီအတွင်း ရွေးကောက်ပွဲကော်မရှင် အဖွဲ့ခွဲ အဆင့်ဆင့်မှ ၂၀၂၀ ပြည့်နှစ် အထွေထွေရွေးကောက်ပွဲလုပ်ငန်းများ ဆောင်ရွက်စဉ် ရောဂါကူးစက်ခံရခြင်းဖြစ်ပြီး  ကူးစက်ခံရပြီးစာရင်း တင်ပြရန် ကျန်ရှိခြင်း၊ ထပ်မံဆင့်ပွားကူးစက်ခြင်း၊ ရောဂါလက္ခဏာမပြသေး၍ မသိရှိသဖြင့် ကျန်ရှိခြင်းများ ရှိနိုင်သေးကြောင်း ကော်မရှင်အဖွဲ့ခွဲ၏ ထုတ်ပြန်ချက်တွင် ဖော်ပြထားသည်။