Top News

တေးသံရှင်ဇော်ဝင်းထွဋ်သည် အမရာဆောင်တွင် Quarantine ဝင်လျက်ရှိရာမှ COVID-19 ရောဂါပိုး ရှိ မရှိ ဆေးစစ်ချက် အဖြေမှာ ယနေ့နံနက်ပိုင်းတွင် သိရှိရပြီဖြစ်ကာ Negative ဖြစ်ကြောင်း ဇနီးဖြစ်သူဒေါ် မေခင်အုန်းနှင့် အင်ပါယာတီးဝိုင်းမှကိုသန့်ဇော်တို့၏ လူမှုကွန်ရက်စာမျက်နှာများထက် တွင်ရေးသားဖော်ပြထားသည်။

နဝရတ်စတူဒီယိုပိုင်ရှင်ကိုဝေထွန်း၏ COVID-19 ဆေးစစ်ချက်အဖြေမှာ positive ထွက်ရှိခဲ့ပြီး နောက် ဧပြီလဆန်းပိုင်းတွင် ကိုဝေထွန်းနှင့် အချိန်ခဏမျှတွေ့ဆုံနှုတ်ဆက်ခဲ့သည့်အတွက် တေးသံရှင်ဇော်ဝင်းထွဋ်မှာ Quarantine ဝင်နေခြင်းဖြစ်သည်။ တေးသံရှင်ဇော်ဝင်းထွဋ်၏ဆေးစစ်ချက်အဖြေ negative ဟုသိရှိရသဖြင့် အနုပညာရှင်များ နှင့်ပရိသတ်များကဝမ်းမြောက်ကြောင်းများ ရေးသားဖော်ပြခဲ့ကြသည်။

“အမရာ Quarantine Center က အားလုံးက all negative ပါ။ အားလုံး negative ဆိုလို့ ထပ်ဆင့်ဝမ်းသာရပါတယ်။ ဒီမှာတူတူ ရှိနေတဲ့ ကိုယ့်မိတ်ဆွေ သူငယ်ချင်းတွေအတွက်ရော၊ အိမ်သာရေချိုးခန်း အများဆုံး ဆိုတော့ လာမိမှ ကိုယ့်ကို ပိုးကူးမှာလား စိတ်ထင့် နေရတာ အတွက်ပေါ့” ဟု တေးသံရှင်ဇော်ဝင်း ထွဋ်၏ဇနီးဖြစ်သူဒေါ်မေခင်အုန်းက လူမှုကွန်ရက်စာမျက်နှာထက်တွင် ရေးသားဖော်ပြထားသည်။

အင်ပါယာတီးဝိုင်းမှကိုသန့်ဇော်ကလည်း “ညီထွဋ်ဆေးစစ်ချက်အဖြေသိရပါပြီ။ ညီထွဋ်နဲ့အတူ Quarantine အတူဝင်ကြတဲ့ ၉၈ ယောက်လုံးလည်း အားလုံး Negative ပါ။ ဘော်ဒါတွေအားလုံးသိရအောင်ပါ” ဟု လူမှုကွန်ရက်စာမျက်နှာမှတစ်ဆင့်အသိပေးထားသည်။

တေးသံရှင်ဇော်ဝင်းထွဋ်၏ ပရိသတ်များ စုပေါင်းဖွဲ့စည်းထားသည့် official emperor fan club တွင်လည်း ယင်းသတင်း အားမျှဝေပေးလျက်ရှိကာ ဝမ်းမြောက်ကြောင်း သတင်းစကားများရေးသားဖော်ပြကြသည်။ ထို့အပြင်အနုပညာရှင်များစွာကလည်း တေးသံရှင်ဇော်ဝင်းထွဋ်၏ ဆေးစစ်ချက်အဖြေအတွက် ဝမ်းမြောက်ကြောင်းများ ရေးသားဖော်ပြလျက်ရှိသည်။ လက်ရှိတွင် တေးသံရှင်မျိုးကြီး၊ နီတာ၊ နဝရတ်စတူဒီယိုပိုင်ရှင် ကိုဝေထွန်းစသူတို့မှာ COVID-19 Positive ဖြစ်သည့်အတွက် ဆေးကုသမှုခံယူ ရလျက်ရှိကာ အမြန်ဆုံးသက်သာပျောက်ကင်းစေရန်အတွက်လည်း အနုပညာရှင်များနှင့်ပရိသတ်များက ဆုတောင်းစကားများ ပြောကြားပေးလျက်ရှိသည်။