Top News

ဆိုင်ကလုန်းမုန်တိုင်း Amphan ကြောင့် ရခိုင်ပြည်နယ်အတွင်းရှိ ဒေသအချို့တွင် မိုးသက်လေပြင်းများ တိုက်ခတ်ပြီး ကမ်းရိုးတန်းအတွင်း ရေယာဉ်များ သွားလာခြင်းကို တားမြစ်ထားကြောင်း သိရသည်။

ဘင်္ဂလားပင်လယ်အော်တွင် ဖြစ်ပေါ်နေသော မုန်းတိုင်အရှိန်ကြောင့် မေလ ၁၉ ရက်နေ့မှစတင်ကာ ရခိုင်ပြည်နယ်အတွင်း ဒေသအချို့တွင် မိုးသက်လေပြင်းများ တိုက်ခတ်ခဲ့ပြီး စစ်ဘေးရှောင်များ ယာယီနေထိုင်ရာ စစ်ဘေးရှောင်စခန်းများတွင် အမိုးအကာများ ပျက်စီးခဲ့မှုလည်း ဖြစ်ပေါ်ခဲ့ကြောင်း သိရသည်။

“ရေယာဉ်တွေကိုတော့ မုန်တိုင်းရှိတဲ့အတွက် ရပ်နားထားပါတယ်။ မုန်တိုင်းပြီးသွားမှ ပြန်လည်ပြေးဆွဲသွားမှာ ဖြစ်ပါတယ်။ ငါးဖမ်းလှေတွေကိုတော့ ဘယ်လိုအမိန့် ထုတ်ထားတယ် ဆိုတာတော့ မသိဘူးဗျ” ဟုလည်း အမြန်ရေယာဉ်လိုင်း တစ်ခုမှ ပြောရေးဆိုခွင့်ရှိသူ တစ်ဦးက ပြောကြားသည်။

မုန်တိုင်းကြောင့် ပင်လယ်ပြင်အတွင်း လှိုင်းအနည်းငယ် ပြင်းထန်သည့်အတွက် ပင်လယ်ကမ်းခြေ များတွင်လည်း လှိုင်းအနည်းငယ် ကြီးနေသည် တွေ့ရကြောင်းလည်း ဒေသခံများက ပြောကြားသည်။

ယင်းနှင့် ပတ်သက်ပြီး သံတွဲမြို့နယ် ငပလီကမ်းခြေက ရေလုပ်ငန်း လုပ်ကိုင်နေသူ ကိုဘစောဖြူက “လေကတော့ သိပ်မပြင်းပါဘူး၊ နည်းနည်းတိုက်တယ်။ ပင်လယ်ရေမျက်နှာပြင် နည်းနည်းမြင့်လာတယ်။ ဒီရေနည်းနည်း တိုးတဲ့သဘောပေါ့။ အခုဆိုရင် လေကတော့ လျော့ကျသွားပါပြီ၊ မိုးကလည်း နည်းနည်းတော့ ရွာခဲ့တယ်။ သိပ်တော့ ထူးထူးခြားခြား မဟုတ်သေးပါဘူး။ ဒါပေမယ့် စက်လှေတွေကတော့ မထွက်ကြဘူး” ဟုလည်း ပြောကြားသည်။

မေလ ၂၀ ရက်နေ့တွင် မြို့နယ်အချို့တွင် မိုးရွာသွန်းမှုအနည်းငယ် ရှိခဲ့သော်လည်း လွန်စွာရွာသွန်းခြင်း မဟုတ်ကြောင်းနှင့် စစ်တွေမြို့တွင်လည်း မိုးအနည်းငယ် ရွာသွန်းနေကြောင်း ဒေသခံများထံမှ သိရသည်။

“စစ်တွေမှာ မိုးကတော့ နည်းနည်းရွာတယ်။ တခြားနေရာတွေမှာလည်း အနည်းနည်းစီ ရွာတယ်လို့ သိရတယ်။ ရေလှိုင်းကတော့ ကမ်းစပ်မှာ နည်းနည်းကြီးတာပေါ့။ လေကတော သိပ်မပြင်းပါဘူး။ ကမ်းရိုးတန်းသွား ရေယာဉ်တွေ ပြေးဆွဲမှု ရပ်နားထားတယ်လို့ သိရပါတယ်” ဟု စစ်တွေမြ်ို့ ဒေသခံတစ်ဦးက ပြောကြားသည်။