Top News

ဘဏ္ဍာနှစ်သုံးနှစ်အတွင်း ကျပ် ၁၈ ဘီလျံကျော်အရှုံးပေါ်ခဲ့သည့် မြန်မာ့အမျိုးသားလေကြောင်းလိုင်း၏ လုပ်ငန်းလည်ပတ်မှုမှာ၂၀၁၈ ခြောက်လဘဏ္ဍာနှစ်တွင်လည်း ကျပ် ၃ ဒသမ ၇ ဘီလျံကျော် လိုငွေဖြစ်ပေါ်ကာ အရှုံးပြခဲ့ကြောင်း ပြည်ထောင်စုလွှတ်တော်၊ ပြည်သူ့ငွေစာရင်းပူးပေါင်းကော်မတီမှ သိရသည်။

ကုမ္ပဏီအသွင်ကူးပြောင်း၍ လုပ်ငန်းဆောင်ရွက်နေသည့် မြန်မာ့အမျိုးသားလေကြောင်းလိုင်းအနေဖြင့် အရှုံးပေါ်နေဆဲဖြစ်ပြီး ဘဏ္ဍာနှစ်သုံးနှစ်အတွင်း ကျပ် ၁၈ ဘီလျံကျော် အရှုံးပေါ်ခဲ့ကြောင်း ပြည်ထောင်စုလွှတ်တော် ပြည်သူ့ငွေစာရင်းပူးပေါင်းကော်မတီ “ပြည်ထောင်စုစာရင်းစစ်ချုပ်၏ ၂၀၁၆ -၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် လေ့လာတွေ့ရှိချက်နှင့် သဘောထားမှတ်ချက်” အစီရင်ခံစာတွင် ဖော်ပြထားသည်။

၂၀၁၃-၂၀၁၄ ခုနှစ်မှစ၍ ပြည်ထောင်စုဘဏ္ဍာရန်ပုံငွေပြင်ပမှ လုပ်ငန်းဆောင်ရွက်ခဲ့သည့် မြန်မာ့အမျိုးသားလေကြောင်းလိုင်း အနေဖြင့် မြန်မာ့လေကြောင်းက ပိုင်ဆိုင်ခဲ့သည့် ငွေကြေး၊ ရွှေ့ပြောင်း /မရွှေ့ပြောင်းနိုင်သည့် ပစ္စည်းများနှင့် ပြောင်းရွှေ့တာဝန်ထမ်းဆောင်သည့် ဝန်ထမ်းများ၏ ပင်စင်လစာများကိုလည်း တာဝန်ယူနေရပြီး ၂၀၁၅-၂၀၁၆ ဘဏ္ဍာနှစ်တွင် ကျပ် ၈ ဒသမ ၉၆၂ ဘီလျံ၊ ၂၀၁၆-၂၀၁၇ ဘဏ္ဍာနှစ်တွင် ကျပ် ၅ ဒသမ ၆၉၅ ဘီလျံနှင့် ၂၀၁၇-၂၀၁၈ ဘဏ္ဍာနှစ်တွင် ကျပ် ၃ ဒသမ ၄၀၁ ဘီလျံ အရှုံးပေါ်ခဲ့ကြောင်း သိရသည်။

ထို့ပြင် ၂၀၁၈ ဘဏ္ဍာနှစ်တိုတွင်လည်း  မြန်မာ့အမျိုးသားလေကြောင်းလိုင်းအနေဖြင့် မူလဝင်ငွေလျာထားချက်တွင် ကျပ် ၈၁၉၃၃ သန်းကျော် လျာထားပြီး အသုံးစရိတ်အဖြစ် ကျပ် ၇၈၅၁၁ သန်းကျော်လျာထားကာ ကျပ် သန်း ၃၄၀၀ ကျော် ပိုငွေပြရန် လျာထားခဲ့သော်လည်း ဝင်ငွေလျော့ကျမှုကြောင့် ယာယီစာရင်းတွင် ၂၀၁၈ ခြောက်လကာလအတွက် မြန်မာ့အမျိုးသားလေကြောင်းလိုင်း၏ ဝင်ငွေမှာ ကျပ် ၇၄၃၇၆ သန်းသာရှိခဲ့ပြီး အသုံးစရိတ်မှာ ကျပ် ၇၈၀၈၇ သန်းအထိရှိခဲ့သဖြင့် ကျပ်သန်း ၃၇၁၀ ကျော်လိုငွေပြကာ အရှုံးပေါ်ခဲ့ခြင်းဖြစ်ကြောင်း သိရသည်။

မြန်မာ့အမျိုးသားလေကြောင်းလိုင်းအနေဖြင့် အရှုံးပေါ်နေဆဲဖြစ်သော်လည်း အရှုံးသက်သာမှုရှိလာနေပြီး လတ်တလောတွင် လေယာဉ် ၁၅ စင်းဖြင့် ပြည်တွင်းခရီးစဉ် မြို့ပေါင်း ၂၇ မြို့နှင့် ပြည်ပခရီးစဉ်များ ပြေးဆွဲမှုများ ပြုလုပ်နေသည်။ ထိုသို့ပြေးဆွဲနေမှုများကြောင့်  ၂၀၁၅-၂၀၁၆ ဘဏ္ဍာနှစ်တွင် ခရီးသည် ၅၈၇ç၂၇၂ ဦး၊ ၂၀၁၆-၂၀၁၇ ဘဏ္ဍာနှစ်တွင် ခရီးသည် ၁ç၀၂၇ç ၉၀၄ ဦး၊ ၂၀၁၇-၂၀၁၈ ဘဏ္ဍာနှစ်တွင် ခရီးသည် ၁ç၄၂၅ç၄၃၉ ဦးအထိ တိုးတက်စီးနင်းခဲ့သည်ဟု “ပြည်ထောင်စုစာရင်းစစ်ချုပ်၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက်အစီရင် ခံစာအပေါ်လေ့လာတွေ့ရှိချက်နှင့် သဘောထားမှတ်ချက်” အစီရင်ခံစာတွင် ဖော်ပြထားသည်။

ထိုသို့ အရှုံးပေါ်နေမှုများအတွက် ပြည်ထောင်စုစာရင်းစစ်ချုပ်က အကြံပြုရာတွင် ဝယ်ယူပြီးနှစ်နှစ်အတွင်း လေယာဉ်များပျက်စီးမှုမှာ မြန်မာ့အမျိုးသားလေကြောင်းအနေဖြင့် ဝယ်ယူရေးတွင် အားနည်းချက်များ ရှိနေသဖြင့် ဝယ်ယူရေးဆိုင်ရာမူဝါဒ၊ လုပ်ထုံးလုပ်နည်းအားနည်းချက်များကို ပြန်လည်သုံးသပ် စိစစ်သင့်ကြောင်းနှင့် မြန်မာ့အမျိုးသားလေ ကြောင်းလိုင်း၏ ငွေစာရင်းဖွင့်လှစ်မှုများအား စီမံကိန်းနှင့်ဘဏ္ဍာရေးဝန်ကြီးဌာန၏ အမိန့်ကြော်ငြာစာနှင့်အညီ လိုက်နာရန် လိုအပ်နေကြောင်း အကြံပြုခဲ့သည်။ ထို့ပြင် အရှုံးဖြစ်ပေါ်မှုလျော့နည်း၍ အမြတ်များ ပိုမိုရရှိလာစေရန် ကုန်ကျစရိတ်လျှော့ချ၍ ဝင်ငွေများ ပိုမိုရရှိလာစေမည့် ပိုမိုကောင်းမွန်သည့် နည်းလမ်းကောင်းများ၊ စျေးကွက်စီးပွားရေးစနစ် နှင့် လိုက်လျောညီထွေဖြစ်ပြီး ပိုမိုယှဉ်ပြိုင်နိုင်စေမည့် ကောင်းမွန်သောဝန်ဆောင်မှုများ၊ ဘေးကင်းလုံခြုံ၍ အများပြည်သူယုံကြည်စိတ်ချရသည့် လေကြောင်းလိုင်းအဖြစ် နာမည်ကောင်းရစေမည့် အစီအမံများ ရေးဆွဲချမှတ် အကောင်အထည်ဖော် ဆောင်ရွက်သင့်ကြောင်း အကြံပြုထားသည်။