Top News

အာဂျင်တီးနားလက်ရွေးစင်အသင်း အနေဖြင့် ၁၉၉၃ ကိုပါအမေရိကဖလားပြိုင်ပွဲတွင် ဗိုလ်စွဲပြီးနောက်ပိုင်း အဓိကနိုင်ငံတကာပြိုင်ပွဲများ၌ အောင်မြင်မှုဝေးကွာနေရာ စကာလိုနီက ယင်းကဲ့သို့ နောက်ပြောင်ပြောကြားခဲ့ခြင်းဖြစ်သည်။

အာဂျင်တီးနားလက်ရွေးစင်အသင်းနည်းပြ စကာလိုနီက ကိုပါအမေရိကဖလားပြိုင်ပွဲ၌ အနိုင်ရ ဗိုလ်စွဲလျှင် နည်းပြဘဝမှ အနားယူမည်ဖြစ်ကြောင်း နောက်ပြောင်ပြောကြားခဲ့သည်။

အာဂျင်တီးနားအသင်းသည် ၂၀၁၄ ကမ္ဘာ့ဖလားပြိုင်ပွဲ၊ ၂၀၁၅ ကိုပါအမေရိကဖလားပြိုင်ပွဲနှင့် ၂၀၁၆ ကိုပါအမေရိကဖလား နှစ် ၁၀၀ ပြည့်အထိမ်းအမှတ်ပြိုင်ပွဲများတွင် ဗိုလ်လုပွဲတက်ရောက်နိုင်ခဲ့သော်လည်း ချန်ပီယံဆုလွဲချော်ပြီး ဒုတိယဖြင့်ကျေနပ်ခဲ့ရသလို ၂၀၁၈ ကမ္ဘာ့ဖလားပြိုင်ပွဲတွင်လည်း ၁၆ သင်းအဆင့်မှ ထွက်ခဲ့ရသည်။ အာဂျင်တီးနားလက်ရွေးစင်အသင်း အနေဖြင့် ၁၉၉၃ ကိုပါအမေရိကဖလားပြိုင်ပွဲတွင် ဗိုလ်စွဲပြီးနောက်ပိုင်း အဓိကနိုင်ငံတကာပြိုင်ပွဲများ၌ အောင်မြင်မှုဝေးကွာနေရာ စကာလိုနီက ယင်းကဲ့သို့ နောက်ပြောင်ပြောကြားခဲ့ခြင်းဖြစ်သည်။

" တကယ်လို့ ကိုပါအမေရိကပြိုင်ပွဲမှာ ကျွန်တော်တို့ အနိုင်ရခဲ့မယ်ဆိုရင် ကျွန်တော်အနားယူလိုက်မှာပါ။ ဒီအသင်းက ကိုပါအမေရိကဗိုလ်လုပွဲကို နှစ်ကြိမ်ဆက် တက်ရောက်နိုင်ခဲ့ပါတယ်။ ဗိုလ်လုပွဲတက်နိုင်ဖို့ အရမ်းခက်ခဲပြီး ဆုဖလား ဘာမှမရခဲ့ဘူးဆိုတာကို သေသေချာချာစဉ်းစားကြည့်ဖို့ လိုပါတယ်။ အဲဒါက အရမ်းခက်ခဲပြီး ရှုပ်လည်းရှုပ်ထွေးပါတယ်။ ကျွန်တော်တို့က ဒီပြိုင်ပွဲမှာ ရှိသမျှပွဲအားလုံးကစားဖို့ ရောက်လာတာဖြစ်ပြီး ကစားသမားတွေကလည်း ဒီဂျာစီကိုဝတ်ဆင်နိုင်စွမ်းရှိတယ်ဆိုတာ ပြသသွားမှာပါ" ဟု ၎င်းက ပြောကြားခဲ့သည်။

ထို့ပြင် စကာလိုနီက လက်ရွေးစင်အသင်းနှင့် အောင်မြင်မှုမရဖူးသဖြင့် ဝေဖန်မှုများခံနေရသည့် အသင်းခေါင်းဆောင် မက်ဆီ၏ စိတ်အားထက်သန်မှုကို ကာကွယ်ပြောကြားမှုများ ပြုလုပ်ခဲ့သည်။ အာဂျင်တီးနားအသင်း သည် အုပ်စုအဖွင့် ပွဲအဖြစ် ယနေ့ နံနက်ပိုင်းက ကိုလံဘီယာအသင်းနှင့်ယှဉ်ပြိုင်ကစားရာ နှစ်ဂိုးပြတ်ရှုံးနိမ့်ခဲ့သည်။