Top News

ပရီးမီးယားလိဂ်လက်ရှိချန်ပီယံ မန်စီးတီးအသင်းသည် ဂျူဗင်တပ်စ်အသင်း၏ ပေါ်တူဂီလက်ရွေးစင်နောက်ခံလူ ကန်ဆယ်လိုအား အသင်း၏နောက်ခံလူ ဒန်နီလိုနှင့် ငွေသားယူရို သန်း (၃၀)အလိုက်ပေးကာ ခေါ်ယူ နိုင်ရန် နီးစပ်နေပြီဖြစ်ကြောင်း သိရှိရသည်။

အသက် (၂၅)နှစ်အရွယ်ရှိ ကန်ဆယ်လိုသည် ဂွါဒီယိုုလာစိတ်ကြိုက် ကစားသမားတစ်ဦးဖြစ်ပြီး ပြီးခဲ့သည့် ရာသီကတည်းက ခေါ်ယူရန် ကြိုးပမ်းခဲ့ဖူးသူလည်းဖြစ်သည်။

ယခုရာသီတွင်လည်း ကန်ဆယ်လို၏ အပြောင်းအရွှေ့အတွက် ကလပ်အသင်းနှစ်သင်းသည် ရက်သတ္တပတ်ပေါင်းများစွာဆွေးနွေးခဲ့ကြပြီးနောက် ယခုအချိန်တွင် သဘောတူညီမှု ရရှိခဲ့ခြင်းဖြစ်ပြီး လာမည့် (၄၈)နာရီအတွင်း အပြီးသတ် စာချုပ်ချုပ်ဆိုတော့မည်ဟု အီတလီနှင့် အင်္ဂလန်မီဒီယာများက ဖော်ပြခဲ့ကြသည်။

ကန်ဆယ်လိုသည် ပြီးခဲ့သည့်ရာသီကမှ ဗလင်စီယာအသင်းထံမှ ဂျူဗင်တပ်စ်အသင်းထံသို့ ပြောင်းရွှေ့လာခဲ့သူဖြစ်ပြီး ဂျူဗင်တပ်စ်အသင်းအတွက် ၂၀၁၈-၁၉ ရာသီတွင် စီးရီး အေ (၂၅)ပွဲအထိ ကစားခွင့်ရခဲ့သူဖြစ်သည်။

မန်စီးတီးအသင်းက ကန်ဆယ်လိုအား (၅)နှစ်စာချုပ် ချုပ်ဆိုသွားမည် ဖြစ်ပြီး အခြားတစ်ဖက်တွင် ဂျူဗင်တပ်စ်အသင်းကလည်း ဒန်နီလိုကို (၅)နှစ်စာချုပ်ချုပ်ဆိုသွားမည်ဟု သိရှိရသည်။

ကန်ဆယ်လိုသည် အင်တာမီလန်အသင်းတွင် အငှားဖြင့်တစ်ရာသီကစားပြီးနောက် မိခင်ကလပ် ဗလင်စီယာသင်းထံမှ ဂျူဗင်တပ်စ်သို့ ပေါင် (၃၅)သန်းဖြင့် ပြောင်းရွှေ့ခဲ့သူဖြစ်ပြီး ဒန်နီလိုကိုမူ မန်စီးတီးအသင်းက ရီးယဲလ်ထံမှ ၂၀၁၇ ခုနှစ်က ပေါင် (၂၆.၅)သန်းဖြင့် ခေါ်ယူခဲ့ခြင်းဖြစ်သည်။