Top News

ဖွဲ့စည်းပုံ အခြေခံဥပဒေ ပြင်ဆင်ရေး ထောက်ခံသည့် လူထုထောက်ခံပွဲကို လားရှိုးမြို့တွင် မေ ၁၁ ရက် နံနက်ပိုင်းက ပြုလုပ်ခဲ့ကြောင်း သိရသည်။

လူထုထောက်ခံပွဲကို လားရှိုးမြို့ ရပ်ကွက် (၄) ဗောဓာရုံကျောင်းတိုက် အနီးရှိ စုရပ်မှစ၍ ရေကန်လမ်း၊ လမ်းမတော်လမ်း၊ သိန္နီလမ်းအတိုင်း ရပ်ကွက် (၈) မြို့မအားကစားကွင်း အတွင်းသို့ လမ်းလျှောက်ပြီး ‘၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး တို့အရေး၊၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး ပြည်သူလူထု ပူးပေါင်းပါဝင်ရေး တို့အရေး၊ ဒီမိုကရေစီမဲ့သော ပြဋ္ဌာန်းချက်ဥပဒေများ ပြင်ဆင်ပေး ပြင်ဆင်ပေး၊ ဖက်ဒရယ် ပြည်ထောင်စု ပေါ်ပေါက်ရေး တို့အရေး တို့အရေး၊ ၂၀၀၈ ဖွဲ့ စည်းပုံအခြေခံဥပဒေ ပြင်ဆင်ရေး ပူးပေါင်းကော်မတီ အောင်ရမည် အောင်ရမည်’ ဟူသော ကြွေးကြော်သံများဖြင့် ချီတက်ခဲ့ကြကြောင်း သိရသည်။

“၂၀၀၈ ဖွဲ့စည်းပုံ အခြေခံဥပဒေ ပြင်ဆင်ဖို့အတွက် ကျွန်တော်တို့ တိုင်းပြည်က အမှန်တကယ် လိုအပ်နေတယ်လေ။ အဲဒီတော့ ဒီအခြေခံဥပဒေက ပြောမယ်ဆိုရင် ဒီမိုကရေစီ စံချိန်စံညွှန်းနဲ့ မညီဘူး။ နောက်ပြီးတော့ အရှေ့အနောက် မညီဘူး။ ဒီလိုမညီမျှတာကို ပြုပြင်ရမယ်။ ကာလအားဖြင့်လည်း ၂၀၀၈ ဖွဲ့စည်းခဲ့တာဆိုတော့ ၂၀၁၈ ဆိုရင် ၁၀ နှစ်တောင် ကျော်ခဲ့ပြီ။ ခေတ်နဲ့မဆီလျော်တော့ဘူး။ ဒါတွေကို ပြုပြင်ပြောင်းလဲဖို့ လိုလာတယ်။ လိုလာတဲ့အတွက် ကျွန်တော်တို့က တာဝန်ယူ တာဝန်ခံပြီးတော့ အဖွဲ့ခေါင်းဆောင် အနေနဲ့ ဒီအခြေခံဥပဒေ ပြင်ဆင်ရေး လွှတ်တော်ကော်မတီကို ထောက်ခံမယ်။ နောက်တစ်ခါ ဒီပြင်ဆင်ရေးကိုလည်း ထောက်ခံမယ်” ဟု တရားလွှတ်တော်ရှေ့နေ ဦးထွေးအောင်ကျော်က ပြောကြားသည်။

ဖွဲ့စည်းပုံ အခြေခံဥပဒေ ပြင်ဆင်ရေးကို ထောက်ခံသည့် ချီတက်လာကြသူများသည် လားရှိုးမြို့ ရပ်ကွက် (၈) မြို့မအားကစားသို့ ရောက်ရှိရာ ဦးစိုင်းခမ်းကော်၊ ဦးထွေးအောင်ကျော်၊ စာရေးဆရာ ရန်ငြိမ်းသူတို့က ထောက်ခံပွဲသို့ လာရောက်ကြသူများအား ဖွဲ့စည်းပုံ အခြေခံဥပဒေ ပြင်ဆင်ရေး ဆိုင်ရာများနှင့် ပတ်သက်၍ ဟောပြောခဲ့ကြကြောင်း သိရသည်။

ဖွဲ့စည်းပုံ အခြေခံဥပဒေ ပြင်ဆင်ရေးကို ထောက်ခံသည့် လူထုထောက်ခံပွဲသို့ လားရှိုးမြို့ပေါ်ရပ်ကွက် အသီးသီးမှ စိတ်ဝင်စားသူများ၊ ပါတီအဖွဲ့အစည်းများ၊ လူမှုကူညီရေး အဖွဲ့အစည်းများ၊ ယဉ်ကျေးမှုအဖွဲ့များ၊ ရပ်ရွာများမှ တက်ကြွလှုပ်ရှားသူများနှင့် အခြားစိတ်ဝင်စားသူများ ပါဝင်ချီတက်ကာ ထောက်ခံခဲ့ကြကြောင်း သိရသည်။