Top News

တနင်္သာရီမြို့နယ် သကျက်ချောင်းအတွင်းမှ ကာလတန်ဖိုး ကျပ်သိန်း ၉၀၀ ကျော်ရှိ ဘိန်းစာမှုန့် ၃၇ အိတ် ဖမ်းဆီးရမိခဲ့ကြောင်း သိရသည်။

တနင်္သာရီမြို့နယ် ရဲတပ်ဖွဲ့မှ နယ်ထိန်း ခေါင်းဆောင် ဒုရဲအုပ် သော်တာမျိုး ဦးဆောင်သော အဖွဲ့သည် သြဂုတ် ၁၈ ရက်က သကျက်ကျေးရွာအုပ်စု တောင်ဘိန်း (၁) ကျေးရွာ (ဒေသအခေါ် အထက်ကဏန်းကွင်း) သကျက်ချောင်းအတွင်း နယ်မြေသတင်း စုံစမ်းနေစဉ် မသင်္ကာဖွယ် စက်လှေတစ်စင်းကို တွေ့၍ ရှာဖွေစစ်ဆေးခဲ့ကြောင်း သိရသည်။

စက်လှေပေါ်တွင် ရှာဖွေရာ ဟိန်းစိုး (မဲတောကျေးရွာနေ) နှင့် အောင်ဇော်ဦး (ပလောက်စုရပ်ကွက် မြိတ်မြို့နယ်နေသူ) တို့ နှစ်ဦးအား တွေ့ရှိရပြီး စက်လှေပေါ်တွင် ဆာလာအိတ်ဖြင့် ထည့်ထားသည့် ဘိန်းစာမှုန့် ၃၇ အိတ်အား ဖမ်းဆီးရမိခဲ့ကြောင်း သိရသည်။

“ဒီဘိန်းစာမှုန့်တွေကို တနင်္သာရီမြို့နယ် သကျက်ချောင်းကနေ ကျွန်းစုမြို့နယ် မဲတောရွာကို သယ်ဆောင်ဖို့ လုပ်နေတာ ဖြစ်ပါတယ်။ တရားခံတွေကို ဖမ်းဆီးရမိထားပါပြီ။ ဒါပေမဲ့ သကျက်က ရောင်းချလိုက်တဲ့ ကွင်းဆက်ကို ဖမ်းဆီးရမိရေး ဆက်လက် ဆောင်ရွက်နေဆဲပါ” ဟု တနင်္သာရီမြို့နယ်မှ ရဲတပ်ဖွဲ့ဝင်တစ်ဦး က ပြောကြားသည်။

ဘိန်းစာမှုန့်များမှာ လေးချိန်အားဖြင့် ၉၆၅ ကီလိုဂရမ် (တစ်ကီလိုဂရမ်လျှင် ကာလပေါက်စျေး တစ်သိန်း) ကာလပေါက်စျေးအားဖြင့် ကျပ် ၉၆၅၀၀၀၀၀ ရှိကြောင်း သိရသည်။ ဖြစ်စဉ်နှင့် ပတ်သက်ပြီး ဘိန်းစာမှုန့်များအား လက်ဝယ်တွေ့ရှိသူ ဟိန်းစိုးနှင့် အောင်ဇော်ဦးတို့အား တနင်္သာရီမြို့မရဲစခန်းက (ပ)၁၇ / ၂၀၁၉၊ မူးစိတ်ပုဒ်မ  ၁၉ (က)/၂၁ ဖြင့် အမှုဖွင့် ဆောင်ရွက်ထားကြောင်း သိရသည်။